CHAP CHÂR A NI LO, Chapchàr zâwk a ni

Tunlai hian Mizo ṭawng thumal phel darha sawi fiah kan chîng a; a ṭhat viau rualin kan duh dan kawhtir tum vanga sawi fiah dik loh a awm ṭhin bâkah, sawi fiahna dik lo a awm bawk.

CHAP RO CHÁR SAWINA A NI EM? : Chap ro chár sawina a nih vangin, CHAP CHÂR tia ziah hran tur tih pawh Vanglaini-ah kan chhiar kha. Chap ro chár sawina a ni lo; ni se chuan chár hi ri sáng tur a ni; mahse, engtik lai mahin a ri sáng ngai lo.

CHAP A RO CHÁR NGAI EM?: Chapah chuan thing, mau, luang leh hmunphiah bâkah hrui lam chi a tel ṭhin. Hêngho ro chár hi i hre ngai lo ang; a ro fîp zâwk ṭhin vângin. Chem hriam ṭha loa mau, luang, hmunphiah leh hrui ro fîp han sah chu a tlèu zak mai, kan ti ṭhin zâwk a ni; an ro chár ngai lo e. Thing duap pawh a ro fîp chu chemin a duh chuang lo; chuvangin, CHAP CHÁR ni loin, CHAPCHÀR ngei a ni zawk.

ENG NGE RO CHÁR ṬHIN? Lei maw le. Ruah a sur duh si lo a, lei a ro chár tlat a, buh tuh pawhin kan chêk lawlh lawlh mai, rawnâl hmun phei chu a ro phiar tlat zu nia, kan ti ṭhin a ni. Sawntlung lei zám khawro phei chu ro chár thei tak a ni, tuthlawh hnu hi a mám han thei. Feh kawng, fûra diak pawh a ro châr meuh chuan a khi phan ṭuk ṭhîn. Vaimimte pawh a ro chár ṭhin a, vaimimah chuan ro hi kan telh ngai lem lo thung.

CHAPCHÂR THU MAL KAN NEI ZAWK A NI: Chapchâr awmzia chu tilang, hai lang, pho lang tihnate a ni. Thû ringawtah chuan, inchachhuah nen a inpáwl.

Entirna han siam ila: Kan chêt chhiat thu, mi hriat atána kan duh vak loh an sawi chuan, "Mi va chapchâr chiang deuh ve," kan tih ṭhin hi. Kan zêp tlat kha an rawn hai lang ta a ni.

Khaw ṭhenawmah tlangval chaka sawi ve ve an awm a, ṭawngkain an incho fo a; 'mi zâwn inchuh awm se, inmal beihtir ila, han inchapchâr law law se,' an ti ṭhin. Tu nge chak zâwk han tilang se, tihna a ni.

Inhmun ramri inchuh an awm a, pakhat zawk chuan, "Keini lo inhnial a ngai lo e, Revenue-ah inchapchâr zawk ang," a ti a; Complaint a thehlût ta a. Tu nge dik lo, Revenue-in rawn pho lang rawh se, a tihna a ni. An han teh chuan a lo lang ta mai rêng a; a dik leh dik lo chu an rawn chapchâr ta a ni.

Lo kan vât a, kan vah zawh chuan kan lo tûr chu kan chapchâr ta ut mai a, vahchap chu kan pho lang ut a; ral khat aṭang pawhin a fiah êm êm a ni. Chu chu Chapchâr chu a ni ta bawk a; Lo vah zawh âwllên hmingah kan hmang bawk a nih hi. Lo vah zawh veleh, la hring dup mah se kan chapchâr nghâl a; ro eng ang mah se, kan hâl hma chuan chapchâr a ni reng bawk. Chap ro chu kan hâl a, chapchâr a tâwp daih a nih ngai hi! Chap ro sawina ni se, vah zawh ni-ah kan chapchâr hauh lo ang; mahse, kan chapchâr tlat si! A awmzia ni loa sawi fiah vanga a ziah dân thlenga tihdanglam tum hi a dik lo a, a ṭûl na hek lo.

- R.Nelsona