MZ - 09 MAW!

Ni 21 September (Ningani) 2017 khan ka scooty lei thar ve MZ 09 - 0015 chu intithei takin Aizawl ka kalpui a. A bo pawha chhui chhuah zung zung theihna tur tia kan lo hriat mai ṭhin number plate (high security plate) vuah tura zu kal ka ni. Tih tur tam tak ka neih avangin hna an thawh ṭan hun ni-a an sawi zing dar 10 hma deuhvin ka thleng a, traffic police tih inziak awrhtu pa fel tak hian dahna tur min lo kawhhmuh a, fel ka ti khawp mai.

Dar 10 a rik chuan mahni number tur zawngin inchhungah kan buai hle mai a, hmanhmawh naka laiin ka number plate tur ka hmu zo ve ta hlek lo mai a. Buai rilru tak maiin pawna lo buaipuitute chu ka’n zawt a; ka number MZ 09 a nih thu ka’n sawi veleh chuan a hmaa polite taka hunna tur min hrilhtu khan kan bul vela awm zawng zawngte hriat phak ngeiin “MZ 09 maw, khuuuu.... tah khuan” tiin nui hui chungin min hrilh a. A thusawi thluk fan dan vel aṭang kha chuan khu-ah khu-ah mi zawng zawng kawmthlangah, sihal u-na bul chite kam velah ni awm tak a ni. Mahse, “Khuuuu.…tah” a tihna lam kan hawi thlak chuan a lo khu teh lua lo; a thlang chiah building mai chu a ni.

Hmanhmawh leh thinrim rilru ṭeuhva ka kal hnu chuan a “Khuuuu..…tah” rilru put hmang khan ka thin a tirim telh telh mai a. Kei chu patling, kumin a la phak loh deuh vang chauhva Upa pawla la inziak lut lo ka ni a, a mi chhan dan vel khan mi tizak lo, mi tithinrim zawk. Mahse, khawpui pawn nula leh tlangval, a bikin tleirawl lam tan phei chuan a aw thluk kha zah fe-na tham, zakzum deuh tan phei chuan kimkit chawih chawihna tur a nih avangin ching chhunzawm tawh lo se ka duh hle mai.

Kei chu kei ka ni a, kan nula leh tlangval ten an thiam loh vang ni hauh lo va, inti khawpui mi vang mai maia zahna an hmachhawn tur hi ka duh lo a ni.

Aizawl khawpui pawn, Aizawl district a awm ve si-te hian lirthei hi kan mamawh avangin kan lei ve zel dawn a. Registration felfai zawk nana khawpui pawn lamte MZ 09 min pek pawh hi keini chuan kan zahpui lo; mahse, thawktu ṭhenkhatten nuihsawh leh deu nana min lo hman a, nghapih leh dangpuithu rim nam dawn dawna min lo chhuah a nih chuan nuih liam­pui mai har kan ti deuh ang.

- R.Lalfakawma, Seling