Sports Department insawifiahna a fiah zo lo!

Mizoram sawrkar Sports and Youth Services department chuan niminpiaha Mizoram Congress (MPCC) aiawha press conference neia MPCC Media Department-in an thu sawi, Sports Council hnuaiah lockdown lai, May thla aṭanga June 23 inkarah contract hna pasarih, cheng nuai 825 (vaibelchhe 8.25) man pekchhuah a ni” tih an chhanna ni ngeia langah nimin khan thu chhuahin, “Hmun hrang hranga sports infrastructure dinna atan kum kal ta, 2019-2020 khan Finance Department-in Sports & Youth Services Department hnenah hman phalna nen Rs 8.25 crore a pe (allocate) a. He pawisa hi nikum (2019-2020)-a dah fel vek tawh - hmun danga hman rem tawh loh leh hemi atan chauha hman tur a nih avangin a nihna tur ang takin hman tura chhawp chhuah a ni” a ti a.

Sports Department chuan hnate chu hmanhmawh taka furpui lo thlen hma ngeia bul ṭan a, hunbi tuk chhung ngeia zawh tura ruahman, dan leh hrai (financial rules) anga Restricted Tender tihchhuah a, thawktu tur thlan fel a, work order tih chhuah a ni, a ti. 

A hmanna tur awm sa (works specific)-a pawisa pek a nih ang ngeiin, Sports & Youth Services Department chuan, Covid-19 hripui lengin min chen chilh lai mah ni se, a hun taka hna hi thawh zawh a nih theih nan chak takin hma a la a ni a ti a. He mi chungchangah Chief Minister leh Sports Minister te chu kawng engkima kaihruaitu, sports sector hmasawnna ngai pawimawh tak zettu an ni tiin an chungah lawmthu a sawi bawk a ni.

Sports department sawi­fiahna chu department sawi dan tur awm tak pawh a ni a. Amaherawhchu, ram din­hmun pangngaia sawrkar emaw department emaw kal dan an sawi mai niin a lang a ni. 

Covid-19 avangin ram a buai zo va, ram dinhmun a pangngai loh avangin sawrkarin sum a nei lo va, Minister leh MLA te pawhin an hlawh la full lovin eng emaw zat Covid-19 dona atan an pe a, an MLALADS Fund te thlengin Covid-19 do nana pek a ni a. Chu mai pawh ni lovin, sawrkar hna thawkte chuan an hlawh aṭangin sawrkar mitmei ven avangin eng emaw zat tihluihna ni chiah lo, ni deuh reuhin an pe a. Chu bakah kumin chhunga an thlatin hlawh batsak a la tum ta a ni. 

Dinhmun a pangngai loh avangin, Chief Minister Relief Fund for Covid-19 te siamin mipuiah thawhlawm khawn a ni a, nimin thleng khan mi tlawmngaiten an la chhung lut a ni. 

Chu mai chu a la ni lo va, ramri vengin ram daiah mi tam tak an riaklut a, sawrkar tih ngei ngei tur hlawh pawh phut lovin an ti a. Chungte chu sawrkarin ṭanpui lovin mimal leh tlawmngaiten sumfaiin a ni emaw, kawng dangin emaw an ṭanpuiin an pui a ni.

He lam pang hi chu tawk se, a nih leh restricted tender-a hna inpek chu MNF-ten party dang an sawrkar laia an duh loh, ring tak taka an sawisel ṭhin kha a ni em? 

Pawisa ruahman sa, kawng danga hman theih loh ang hrima Sports Department-in a sawi chu nikum lama SEDP atana pawisa dah, mipuiin cheng nuaithum semna tur emaw tia an lo nghahhlelh, sem awm tak si loh, sum zozai te kha vawiinah a awm tawh lo a nih chuan eng atan nge hman a nih? 

Chief Minister ngeiin, sawrkar sum te chu hmanna tur bik awm chuang lo, duh duhnaa hman theih anga a lo sawi te kha tun hunah hian Sports department pawisa awmsa cheng nuai 825 chu Covid-19 do nana mamawhnaah a hman theih loh bik ta tihna em ni ang? 

Sawrkar sum harsat avanga sawrkar hnathawkte hlawh pawh bat a tum lai leh infiamna lamte pawh khawvel pumah engmah tih theih loh a nih lai hian sports infrastructure chu engnge a hmanhmawh thlak em emna ni ta ang? Sawrkar department thu chhuah meuha CM emaw Minister tu emaw fak tak hluah mai chu tunhmain a awm ngai em? Department tih atana mawi a ni em? 

Ram dinhmun pangngai loh avanga engkim a pangngaia a kal theih loh laia contract pek lama pangngaia kal lo tum chu, mak e, ti mai ang. Ngaihtuah zui ve rawh u.