BOARD EXAM NEIH MEK HI

Kan zirlai naupangte Class X leh Class XII te, Compartmental  HSLC tan leh HSSLC tan Board Exam an zawh hmaa Covid-19 hripuiin a nan tak avanga exam zo hman ta lote chu July ni 1 aṭang khan exam chhunzawmtir leh an ni ta a. Tichuan rokhawlhna dang a awm loh chuan July thla tir lamah exam chu zo vek tura tih an ni ta. Exam buatsaihtu, MBSE lam aṭanga thlir chuan hetia exam zo loa awm reng mai hi chu rilru a famkim thei lovin helhkam a na duh hle ang tih chu hriatsa a ni a.  Tuna hetia exam an han buatsaih thei ta mai hi chu an rilru a veng huai ang a, mitmim lak ang huai a ni ngei ang tih chu a rinpui theih mai awm e. An thlirna lam aṭanga han thlir chuan naupangte tan pawh a thawventhlak huai ang chu maw!

Naupang zirlai nei chhungte tan erawh rilru ngaih a ngam thei meuh awm love. Kum pui linglet an lo zir tawh, an nakin hun tur hril pha chin ngat exam a ni a, chutih laia hetia buangbar taka exam-tir an ni ta mai hi chu ngaih a ngam thei meuh lo chuan a rinawm. Hman deuh khan June thla tir lama exam tur khan tih a ni a, tin, kha mi hma lam pawh khan exam tur tih a ni tawh bawk a. Mahse a dawn ṭepah ṭhulh a ni leh mai ṭhin a. Chuvangin tun tumah pawh hian naupang tam tak leh an chhungte chuan ṭhulh leh a nih an ring fur awm e. Anmahni ang bawka exam tura tih CBSE kha chu TV lamah ṭhulh leh a nih thu kha puan a ni a. Chuvangin kan naupang tam tak hi chuan ṭhulh leh ringin an zir mumal vak chuan a rinawm loh.

A exam chu lo exam ta pawh ni se, a ni hmasa bera an exam tur, exam hall an han luh dante kha naupang fel bik tak tan lo chuan hriatsa theihnghilhna tham tak a ni awm e. Hall luh dawnah medical screening an han neihpui phawt a, naupang dawihzep deuh tan phei chuan zamna tham tak a ni thei awm e. ‘Ka lo positive mai ang a’ tiin an inngaihtuah niap niap mai thei a ni. Tih nak alaiin hall an han lut dawn a kut an han siltir leh phawt a, hand sanitiser an han pe leh a, tihrualin mask an han vuah tir leh vek bawk nen. Khatiang taka inthuam ṭup chung kha chuan an rilru pawh a kal ding thei tak tak chuan a rinawm tawh loh.  Naupang fel tak pawh an rilru chu 20% vel chuan a la peng ngeiin a rinawm a, naupang satliah ngatte phei chu 40% vel laiin a lak pensak a rinawm. Chuvangin tun an exam hi chu tihvaúk chauh a nih hmelin, eng an an phah vak chuan a rinawm theih ngang lo a ni.

Tun ṭum Board Exam zet hi chu kum 1966, ram buai kuma Matric Exam kha min hriat chhuahtir riau mai. Kha mi kuma matric examte kha a va hautak tak em! Exam hall a luh hmain sipaiin hmun thumah min lo check a, admit card mai duhtawk lovin, kawrte min phelhtir thul, kekawr phelh chang pawh zuk awm ṭhin a! Exam hall-a luh hnu, chhanna ziah mawlh mawlh lai pawhin tukverhah sipai an lo kâr lut a, an rinhlelh deuhte chu an check hmiah hmiah mai a ni. Tunah pawh hall luh hma hauhin health screening neihte an ngai tlat mai a, kut sil nen, nen nen a tam lutuk. Hetiang hrep chung hi chuan tih ṭhat a har ngawt ang le!

MBSE hian he exam hi rûn dâl chauha a ngai a nih loh a, naupangte thiamna tehfunga hman a tum dawn a nih chuan tih fuh loh tak tak chu a neih ngei a rinawm. An thiamna tak tak en a duh a nih chuan an sikula an performanmce record aṭangin en mai se a fuh daih zawk ang. Kan India ram zau taka CBS exam nei tur state ṭhenkhatte chuan exam nei lova promotion mai an tum ni awm takin a lang a. Chutiangte a nih si chuan keini state pawhin heng an exam lehna subject te hi chu rengdim se la, a ṭha an duh a nih pawhin an sikul lama an annual performance record heng an examna subject-ah hi chuan la ta mai se a fuh viau lo ang maw le? Kan Board Official lam hian heti zawng hian rilru pu se la, tin, kan examiner pawhin thil phal chhuah deuh se la a ṭha hle awm e.