HINDUTVA KAN HLAU ANG MAW?

BJP hi India ram, Hindu rama siam tum renga ngaih an ni a, thuneihna an chan loh pawhin an pawl zawmpuia ngaih, RSS leh a hnuaia pawl 10 chuang zet nen hemi hawi hian ṭan an la renga ngaih a ni. Heng Sangh Parivar an tihte zingah hian Vishwa Hindu Parishad, Bajrang Dal, Swadeshi Jagaran Manch, Bharatiya Kisan Sangh, Bhara­tiya Mazdoor Sangh ... tihte pawh a awm nual a ni awm e.

Sikul pawh an ngah mai a, sipai ang deuha inchherna leh thluak insûksakna ang deuhte pawh a ni mahna. An hotu liante hi chu hetiang sikul chhuak hi an ni nual reng a ni. Tuna kum 2014 aṭanga chak tak maia thuneihna an chan aṭang phei kha chuan sakhaw dang betute nek chêp viau tur anga ngaihna pawh a lian a, a àwm lo hauh lo.

Bawng talh khap thawmte kan hria a, hetah pawh kan ri laih a, mahse harsatna kan tâwk rih lem lo. He thil hi remchanga hmangin tuten emaw, pu inti nei ṭha fahranin anmahni thu-in tute bawng phur emawte pawh kut an lo thlak a, heng avang hian thla hlui ni 22 khan bawng humhalh chhuanlama mi dang kut thlak chingte kut tuarte chu an awmna state sorkarin zangnadawmna a pe zel tawh tur a ni tih Supreme Court-in a sawi ta hial a ni.

September ni 6 khan Supreme Court hian hetianga mahni thuneihna inpe chawp a, mi dang kut thlak chingte hi khuahkhirh tur leh, he thupêk an bawhzui dan pawh court hriattir leh turin state tin a lo hriattir tawh bawk. BJP-in thuneihna an chan tâk avang hian an Hindu missionary ve-te pawh an che na deuh sawt mai thei a, an inlek thar deuh pawh a ni mai thei.

Hman deuhah khan kan sawi tawh a, sakhaw dang miten engemaw hlek an han tih ve hian, kan ngai thei lo hle mai ṭhin a, 'mi kuta sahrang hmu lian' tih ang ziazangin mitmim ang maiin hnawk kan ti ṭhin. 'Miin in chunga an tiha in duh tur ang bawkin mi chungah pawh ti ve rawh u' tih zirtirna dawngtute kan ni a, a pawimawh zawk chu, eng thil pawh lo thleng se, kan sakhua leh kan rinna-ah hian kan nghet em, tih hi a ni ang. Engemaw hleka nghing reng kan nih chuan, Kristian derthawng leh belh chian dawl lo tak kan ni ang a, kan rin Pathian tan pawh kan rintlâk loh ngawt ang.

Kan fate hi an pian tirh ata Pathian hnenah kan hlan a, naupang Sunday School-ah an kal leh a, englai pawhin Pathian hming lamna hmunah an awm reng tih theih a ni. Chuti chunga phu zek zek Kristian nih hi a fel thei lo. Hindutva ngat phei hi chu, chona leh uanna lam ni hauh lovin, hlauh tur a awm vak lo asin, rinna lamah chak lo hlawm hle mah ila, kan khua ṭheuhah hian Mizo ngat chu Hindu pakhatmah kan nei hlawm kher lo ang.

'Kan buante hi tisa leh thisen an ni si lo' tih ang deuhin, kan tana hlauhawm leh hautak zawk chu - sum a nih ber hi a! Lalna, thuneihna, hmuh theih thila ropuina ûm-a buaina hian min tibuai hle mai a, min luhkhung thûk hle bawk. Hinduism ai chuan nasa takin a hnawk. Hindu chu milem bia kan ti a, milem hmaah kan kun lem lo. Kan tana milem biakna hautak ber chu duhamna a ni (Duhamna chu milem biakna a ni si a - Kol.3:5)

Hetiang duhamna fel lo leh, Pathian mithmuha tenawm hi kan tan chu 'Hindutva' dik tak a ni zawk mai thei asin. Kristian nihna bansan a, Hindu-a inleh hi chu Mizo ngat zingah chuan thil hlauhthawnawm a ni rih lem lo-in a lang a, mahse kan zinga tlangláwn tak, duhàmna hmanga milem biakna lakah erawh chuan kan fimkhur a, kan inven a ngai zawk a nih hi.

- RK Lianzuala