BAWNGKAWN RAM (Mipui leh sawrkhar tan buaina tur a awm lo)

Bawngkawn ram chung chang hi Pu M.Lalmanzuala'n a ziak tawh ṭhin a. Tunah chanchinbuah leh TV news-ah te kan hmu ta fo a.

Ni 18.9.17 Mizo Aw-ah leh Ni 20.9.17 Vanglaini issue-ah Pu Lalchhuana Renthlei chuan point pe thlapin chiang tak leh ngaihnawm takin a rawn ziak a. MNF President Pu Zoramthanga pawhin 'document' nen Press mite hmaah fiah tak leh ngaihnawm takin a la sawi turah ngai ila.

Pu Lalthanmawia, Zemabawk FIR thehluh pawh a la ngaihnawm viau mai thei e. Heng zawng zawng hi mimal leh Politi-cal party pakhat thil tih a ni a.

Helai hmun hi a tirah Pi Lalthai ram LSC 10312/01/631 of 2002 chu MNF General Headquarters President hmingin land lease No 117 of 2005-ah siam a ni a. Chumi hnuah Land Pass chu Pi Lalrodingi d/o R.Thangliana, Mission Veng kutah a awm ta a ni.

Ram Pass inhlan danah buai lo ila tuna a neitu dik tak kan hriat chuan a tawk mai a. Mipui leh sawrkhar duh chu kawng ṭha siam a ni a, helai hmuna kawng siam ṭha tur hian engmah harsatna dang a awm lo. Sawrkharin 'compulsory acqui­sition' dan fel tak a nei a. Mipui vantlang tana ṭul makmawh (public interest) ah chuan tu hmun leh ram pawh sawrkharin a chhuhsak thei a, eng land pass pawh a 'cancel!' in a tidang­lam thei a ni. (dan fel tak a awm e).

Sawrkharin a ram chhuhsak/ lak tur chu a ram neituin engtianga a neih nge, tu hnen aṭanga a lei nge, pawisa engzat nge a sen tih lam kha a ngaihtuah a ṭul lo. A ta ngei a ni tih finfiahna a awm a, compensation standard rate dik tak pek a nih a, kawng ṭha kan siam theih chuan a tawk a ni mai lo’m ni?

UD&PA hian khaw tlai lovin kawng hi siam ṭha thuai sela, kan duh a nih leh kan sawi zui zel ang a, thil ṭha ti hman lo lek hian kan insawisel ang tih ka hlau a ni. He lai hmuna kawng siam ṭha tur hian sawrkhar leh mipui tan buaina tur a awm lo e.

- N. Lungmuana, Electric Veng, Aizawl