A ZA LO VE HRANPA

Khawvel a changkang tial tial a, hnam dang ṭawng kan hman zui ve tak leh thil hming kan ṭawmpui te hi a lam dan dik kan hre chhawm ve zêl a. A ṭawng neitute lam dan ang chiah chiahin lam thei lo mah ila, a thiam chu kan thiam thawkhat hlawm. Chevrolet tih te, guitar tih te chu kan lam nalh hlawm khawp mai; mahse, Mission Veng tih te leh Armed Veng tih te erawh local taka lam loh chuan a rem chiah lo deuh e.

Kum khat a liam ta, pa pakhat hian a thil tih tum tih mual mual pah hian, “Fâi-let a inti zêl,” hi a ti a. A hnuah pawh chutiang bawk chuan a ti leh ṭhin a. A tâwpah chuan, “Fâi-let a inti zel si a, nakinah ka rawn ti leh mai ang,” a ti a. Ka’n enpui a, khâwl chiangkuan loh vâng a lo ni a. A vawi khatnaah kha chuan eng a sawina nge ka hre nghâl mai lo a, a hnuah khan “failed” tih a chhiar a ni tih ka hria. Mahse, ka nuih a za lo. A chhiar thiam a, lam dân dik a hre lo; lam dân dik a hriat loh vanga ka lo nuihna chhan tur a awm lo.

Thingtlângpa a ni a, ram­hmul damdawi leh ram lam thil tam tak, ṭangkai tak tak, ka hriat ve miah si loh a hre

ṭeuh ang tih ka rin vâng pawh a ni lo, a Sap ṭawng lam dik loh kha nuih a ṭûl ka ti lo a, ka nui lo mai. A hmêl leh a thuam ka en a, a tân lam dân dik a pawimawh ber lo tih ka hria a, Sap ṭawng lam dik loh ai chuan mangkhawh tur tam kha a tan chuan a pawi daih zâwk. Officer ṭhenkhat pawhin ‘premises’ an lam dik bik lo, kan nuih ngam loh vangin kan nui lo mai mai, thiam a lo tlêm zawk bawk nen. Zaithiam hmingthang Bob Marley te pawhin Sap ṭawng lam dân dik loa lam hi miin an nuihzat ṭhin tih hre loin an zai ve pawp pawp a, khawvelin tun thlengin a la ngaisang chu a nih hi. Lam dân dik lo kha a changkang lo tih a hre lo a, a changkansan daih.

Keini chhûng hi chuan mi Sap ṭawng lam dik loh te hi nuih chânin kan châng a, Sap ṭawnga thil ropui tak tak tihna turah kan kimki leh lawi si. Sap ṭawng lam dik loh chu zahthlakah kan ngai a, kan lam dik lohin miin min nuihzat ang tih kan hlau a, kan zah leh lutukna lamah ṭhangthar lehzel tan pawh entirna ṭha lo tak kan siam chawp zel mai. Thingtlangpa emaw, lehkhathiam lo emaw, nu tar pa tar emaw hi Sap ṭawng lam dik tura phût tur an ni lo a, an lam thiam dâna an lam khan an changkang tâwk. Chutiang bawk chuan mipui mimir pawhin eng atan maha ngai loin, a dik leh dik lo thlu loin, grammar e ‘mar lo e, kan duh dan ang angin lam nawk nawk ila, sawi ve pawp pawp ila, kan ram hian Sap ṭawngah na na na chuan hma kan sâwn phah zawt zawt ngei ang - tun ai ngawt chuan. Accent neih hi a pawi lo, Sap ṭawng lam dan bik neih hi a pawi lo, neih tum lo mah ila kan nei tho tho, tih ngaihna a awm chuang lo.

Ṭawng chauh a ni lo, eng thil pawh hi a thiam mi leh a uluk chi an awm vek a, chûng mi mi tlêm tê an ni ṭhin. Ṭawng chungchangah hian mi dang tana harsatna siam tâwk leka mahni thiamna hman mai a awl khawp mai. Chutiang vâng chuan kan ram pawh hi kan ṭhenawm state lakah chuan Sap ṭawnga ṭawng lamah kan hnufual hle.

Kan theih tâwkin a lam dan dik chu, a peih chuan kan zir ang a, mi dangin local mangkhênga an lam a nih pawhin nuihzat mai loin, eng mi nge an nih en i chîng zawk ang u.

A lam dan chauh pawh ni lo, a hman dânah te pawh, kan thiam ve chhun chhunah hian kan kal na hle. Eng tik kum Comedian Search emaw ni-ah pawh, contestant pakhat khan, “Beach kam...” a ti ṭhin a, a sawi tum hlawhchham titih khawpin a entu lam khan an nuih dur dur mai, judge-te pawh an nui nasa. A hnu lawkah a hmel ṭha chi khan thu a rawn sawi ṭawlh ṭawlh a, “Ka hmai facial-tu hi...” a ti a, tu ma’n an nuih lo; a za lo ve hranpa a ni ang.

- Rempuia R. Lûtmâng