Meizial zuk ṭhatlohnate

Vaihlo/ cigarettes: Miin meizial a zuk chuan a khu a hip lut a, ziala natna thlentu tur awmte khan kawchhung a ur a, chu chuan khawchhungah natna chi hrang hrang a thlen ta ṭhin a. Thin ṭha lo te, kal ṭha lo te, lung ṭha lo te, pumpui ṭha lote a thlen a. A bik takin chuap cancer a thlen nasa a ni. Zial zu mite-ah chuap cancer-a thi an tam hle a ni. Meizial hian taksa bung hrang hrangah cancer natna a siam ṭhin, chuap a tichhia a, thawhah a thlen ṭhin.

Meizial hian mi­hring hmel a tichhia a, kawchhung a tibal bawk. Zial zu mi chu a rimchhia a, a bula awmte tan an zial khu lo hip luh chu, a zutu angin a hlauhawm dan a inang reng a ni. Zial zuk hian ṭhatna reng reng a nei lo, mihring nun chhung a titawi a ni. Zial zu mi chu a hrisel thei lo, ni tin a meizial manah sum tam tak a hmang rat ṭhin.

Zial zu mi chuan a taksa a vawng thianghlim thei lo a, a inthlandah a, a zial zuk bung a paih darh mai mai te chuan in leh a vel a tiṭawp a ni. Zial zu mi hmel chu a eng thei lova, rilru a ti chak lo bawk.

Zial zukin natna chi hrang hrang a thlen avangin, inenkawl nan damdawi man te, Damdawi ina a awmna man te, Doctor-te enkawlnaa a sensote a tam em em a ni. Zial zu mi chuan a addict tawh avangin a nghei mai thei tawh ṭhin lo. A nghei thut thei a nih chuan atan vanneihna a ni.

A nghei thei lo a nih chuan thu ho te te chhuanlam a siam a, "A zu lo pawh an thi tho" tih leh "An dam lo ve tho" tih te, a ṭhenin "Duh ber chu, thihpui a pawi hleinem" te an ti hawk. An taksa a tihchhiat tawh hnu chuan nghei eng ang mah se a sawt tawh ṭhin lo.

Mi hnenah sawi lang ngam si lovin, an rilru a rum a, "Ka zial zuk vangin ka hrisel ta lova ni" an inti ru reng ṭhin. Zial zu mi chuan a khu a hip luh kha a phuh chhuak leh a, a hmazawn chu bawlhhlawh halna khu ang maiin, meikhu in a khat a, a changin a hmel a hmuh ṭhat theih loh va, a khu karah a meng vai ruai ṭhin. Chutiang mi ang bula awm fo chu a thlakhlelhawm vak lo tlat.

Tunlaiah phei chuan puipunna hmunah zial zuk an khap tawh a ni. Chuvangin, zuk loh mai hi a ṭha ber a, taksa tan a him ber bawk. I lo bansan theih chuan i meizial zuk avanga i sum sen zozai te kha a tawp tawh ang a, i lo hrisel ṭha leh ang a, i hmel pawh a lo ṭha leh ang a, i rilru a lo fingin, i hriatnate pawh a lo thiang ṭha leh var thei dawn an i.

Meizial i zuk avanga i kamchhia te pawh a bo tawh ang a, i chawei a tui chho lehin, i taksa a mar ṭha leh ngei ang. Chutih hunah chuan zial i zuk hma a, i hriatna chiang tak awm kha, i nei let leh ang a, i tan chuan khawvel hi a thar a ni ringawt dawn a ni. Chutih hunah chuan miten i bula awm nuam an ti leh tawh ang.

- H. Neihchungnunga, Durtlang North