ROKUNGA AWARD

Mizote thinlunga Mizoram timawitu pawimawh ber, hlaphuah thiam Rokunga hming chawiin Award siam a ni dawn a. YMA Branch zawng zawngah Rokunga Award dawng thei awm mihring zawngin lehkha an thawn chhuak ta chur chur mai.

Khawvelah chawimawina hrang hrang, ropui tak tak a awm a, Nobel Prize te phei chu ropui tak a ni a, Unit leh hotu ṭhenkhat duhsakna avanga dawn chi awzawng a ni lo. Mi tam takin Award dawng anga kan ngaih hi chu a leia lei te pawh a ni ta ve ang. Ṭhenawm pa naran ve tak nia kan hriat, an thawh chiah loh lam hawi thei thut thuta eng Award emaw, khawilai India ram emaw, India ram chiah lo emaw aṭanga dawng ta phut te pawh kan awm maithei. Mizoram chhungah chuan Vanglaini siam Award hi a ropui deuh berin a lang a. Keimahni State sorkar phei chuan Award pawh a nei mumal meuh lovin a lang.

Chutih laia Rokunga Award han tih hluai mai hi thil buaithlak leh harsa, huaisenthlak leh tih sa loh angreng zet a ni thei. Hla phuah thiam hminga he chawimawina hi phuah ni mahse hla phuah thiam te tan a ni lova, zaithiam te tan a ni hek lo.

Rokunga Award chu mihring dam lai, han en leh han ngaihtuah pawha Mizo Pa tak mai hnena hlan tur a ni. Mahse he Mizo Pa zawnna kawngah hian hmel leh incheina lamin kori a tu tehchiam lo. Rokunga hla han sak han sak a, Mizo pa ni a ngaih tur khawpa ṭhenawm khawveng leh amah hrechiangtuten an ngaih ang kha thlan chhuah tur a ni a, a harsa dawn fat fat hle mai.

Thlan tur lam hriat a harsat viau laiin thlan loh tur lam hi a chiang awl zawk mah ang. Thlan loh awm chi tak tak te chu :

(1) Mahni ṭanghma haina kawnga mi viak ṭha lutuk chi.

(2) Ṭhangthar tam takin fing leh fel anga an ngaih, mahse mi thil chik mi leh mi nun tluang deuhvin awmze nei tak tak a, 'Anni te chu an fel a....' an tih fan dalh dalh ṭhin. Mahse an thiltih ang tam tak chu an tih ve theih loh tak tak vang lam ni lova, 'Keini tih ve chi a ni hlei nem,' an tih leh hlauh si ang chi te.

(3) Midangte tana inpekna kawnga mawi tak taka chhuanlam siam chung zela hman lo remchang thei ziah chi.

(4) Ṭawngkam thiamna leh zahtheih lohna hmanga hotute duhsakna dawng zar zar thei chi.

(5) Mahni nihna lo ang deuh hret chhal chung zela sorkar aṭanga hamthatna chi hrang hrang hai chhuak thiam riau chi.

Thlan loh tur chi hi fiah taka sawi mai a harsat tluk bawkin thlan tur chi hi sawifiah sen a ni lova, mahse tlawmngaihna te, dikna te, rinawmna te nena inkungkaih mihring, mihring dang tana thlamuanpuiawm leh inngaitlawm ang chi kha thlan chhuah tur an ni.

Hetiang lam chi Award hi siam a huphurhawm a, mihring thlan chhuah pawh a huphurhawm khawp a, mahse Mizo hnamin hetiang Award dawng thei tur mi hi kan mamawh a, kan hnam lungphum pawimawh tak niin an lang. Thil harsa leh hautak tak mai hmachhawn turin a buatsaihtute chu an inpuahchah mek a. Sum leh pai neih te, lehkhathiam san te leh zir thiamna te chu hnawl hauh lo chungin chung thilte chu tehfung a ni hauh si lova, chuvangin khaw te ber leh kilkhawr bera awm leh khawpui lian bera chengte tan pawh he Award hi a hnaih zawng a inang reng.

Ṭawngkam thiama insawipuina ringawtin awmzia a nei dawn lova, Award dawngtu chuan finfiah a dawl leh dawl loh thlengin ngaihtuah a ngai. Uluk tak leh fim taka ngaihtuah zel chunga thlan chhuah tling khawp neitu khua leh veng tan chuan mi chhuanawm an ni ang a. Kum thum dan vel chauhva thlan chhuah tur an nih avangin a hlutna a hniam thei lo. Thlan chhuah ni turin sorkarna chelhtu nihnain kori a tu dawn lova, khawngaih mark awm lova a tling apiang chauh thlan chhuahna tur Award a nih avangin a hlu ngei ang.

YMA, tlawmngaihna vawng nungtu pawl tan chuan mahni veng chhunga chutiang mi, thlan theih tura theh chhuah tur nei nih chu a hlu viau ang a. Ngaihsak lem lova tizuzi maitu nih chu hruaitute tan thil hlu tak ngaihhlut nachang hriat lohna a ni thei ang. October thla chhungin Central YMA Office-ah theh luh tur a ni a, YMA Branch vengva deuh tan chuan taima taka mahni Branch chhungah chutiang mi chu zawn vat vat a inhmeh ngawt ang.

- P.L.Liandinga