PHUNCHIAR BAWM

Mizote hi a tir (sarhu) laia thil ti hluai peih rei leh tak tak lo hnam kan nih hi keimahni ngei hian kan tichiang hle in ka hria. Vishal leh Bazar India chungchangah pawh a tirah kan ri hluai a, kan sumdawng pawl ho pawh engatinge an reh leh tak daih le.

Vawikhat tlawh ve reng reng teh ang ka ti a, an bungrua/ thawmhnaw a ṭhat bikna ka hre lova, a tlawm an tih chhan ber pawh Rs 150 man awm vel kha pahnih 300 velin a lei theih a, chu chu tlawm nia kan hriatna ber niin ka hria. Hak tawk loh lei pawhin Rs 549 man a nih chuan a dang Rs 449 man kha Rs 549 tho a lei a ngai tlat. Bawh huam huam chiah kei chuan ka ngai lo. Entirnan, vai ramah thingpuidawr zuk hawng teh. Nikhatah no khat pawh i hralh lo maithei. Hemi chungchanga sumdawn phalna petu an demawm takzet a, hei hi economic a inchimralna a ni thei.

Bawngkawn kawng zauhna tur chungchang pawh hi kan ram hruaitu ṭhenkhat rilru puthmang tilangtu a ni. Khatih laia C.M Pu Zoramthanga hminga land lease siam, sorkar ram ni si Pu Don Sapremsangan a hralh mai theih danah Pu Don-a hian commission tlem a ei a ni mahna. Amah hi Pu R. Tlanghmingthanga, Ex Minister makpa niawm takin an sawi leh nghal. Health Care Scheme pawisa cheng vaibelchhe 10 zet a pung awma lo dahtu kha Pu Tlanga hi a ni leh nghal a, hetiang lamah chuan expert hle turah i ngai ang. Bawngkawn kawng zauhna tur hi sorkar ram a nihna ang ngeiin sorkar hian a lak let leh vat a ngai a ni.

Misual inthup hi an hlauh­awm bik. Biak hrehawm, vin em em, thlei bik nei, midang hmuhsit ching, mi duham chapo bawk si hi kan kohhran hrang hrang sunday school zirtirtuah te pawh an awm

ṭeuhin ka ring. Hetiang mite hian engtin nge vanram min hruai thlen theih ang. Sunday School zirtirtu nih hi chapo pui chi a ni lo. In tithlaraumi nazawng an thlarau mi vek hek lo.

Pa pakhat thusawi ka hriat chu an nu chu pawn lamah thlarau mi tak, in chhung lamah erawh thlahrang ang mai a ni tih ṭhin hi.

Mizoram buhfai dawn chungchang hi

A supply-tu Mizofed chairman-in A grade vek supply angin TV-ah a sawi a, A grade chhemi a ni ngei ang. Sin deuh khek khuk, rim na tak sehrep tam si leh a hlui lutuk hi retheih nak a laiin min tirethei lehzual. Buhfai eitlak A grade ṭha mi, mi rama mi ang hi kan Mizofed hotute hian min pek tum teh se. Tuna kan ei/ dawn ang hi chu vawk leh ar chaw atan a tawk vel a ni.

Kan kawng chhe lutuk hi a hrehawm

Kum 10 liam ta a, kawng siamna tur 3% tuten tuna kawng chhe lutuk an vei leh em em erawh chu a mak ka ti. Kawng chhiat chhanah hian mawh an phur vein ka hria. Kawng chhia hi kan sawi tawp thei tak tak dawnin a lang lo. Kawng chhiat chhanah ruahtui tlak tam vang, kan lung hman a chang ṭha tawk lo kan ti. Mizoram aia ruahtui tlak tamna Cherapunjee, Meghalaya-ah te hian ruahtui tlak tam avanga an kawng a chhiat thu an sawi kan hre ngai lo. Lung chungchangah pawh kan ram lung a lo no deuh a nih pawhin lung chang ṭha India ram hmun hrang hrangah a tam lutuk, chaw lut mai se. Kan budget hian kan hman dik chuan a daih hmel tho si a.

Kan CM zahawm takin mirethei chanai laksaktute lakah thikthu a tihchhiat thu a sawi hi a va han lawmawm tak em. Department officer zinga kuthnathawk (benifeciary) te aia huan nei ṭha zawk, thlai ṭiak siamna (nursery) nei ṭha zawk thlai leh buh hmun nei ṭha an awm thu a sawi te pawh hi a thlamuan thlak rualin, mahni thlai thar zuar intite pawh hian heng officer ho thlai thar an kharchhawng vel mai mai a nih hmel.

Tunhnaia Horticulture Department chungchang chanchinbua lo langte kha a van zahthlak em. Engtinnge kan CM hian hma a lak dawn i lo thlir phawt mai teh ang.

- JV-a, Aizawl West