SAPṬAWNG LEH MIZO ṬAWNG

Mizo ṭawng thumal ṭhenkhatah ngaihdan leh pawm dan inang lo kan hmu zauh zauh va. Chungte chu - Vawkhniahzawn thla, tih te, tukṭhuan leh zanriah tih te an ni.

Kan pi leh pute, min thlahtute kha chuan, Vawkhniahzawn thla an ti. Vawkhniakzawn thla tih hi chu Vawk­hniakzawn thla hrilhfiahna a ni.

Tukthuan hi zing chaw tiin kan sawi bawk. Zing chaw hi tukṭhuan hrilhfiahna a ni. Tlai chaw hi zanriah hrilhfiahna a ni.

Ningani hi Nilaithawhṭan tiin kan sawi bawk; a tira chawlhkar hming phuahtute phuah chu Ningani hi a ni. Speedbreaker pawh hi sapho chuan, ‘Sleeping Policeman’ an ti. Speedbreaker chu ‘Sleeping Policeman’ hrilhfiahna mai a ni.

Lung ina tangho an phurhna motor hi Prison Van kan ti mai a, Sapho chuan ‘Black Maria’ an ti. Black Maria hrilhfiahna chu Prison Van hi a ni.

Taxcicab Stand kan tih pawh hi a ṭawng neitu sapho chuan ‘Taxicab Rank’ an ti tlat. Taxcicab Stand tih hi chu N. American ho sawi dan a ni.

Vawi khat chu Pathianni tlai hian London-a Primary School-a an inzirtir lai Telly-ah an rawn lantir a.

Tlar hnung bera ṭhute khan an zirtirtu nula zirtir chu an ngaithla vak lo va. An ṭawng a, an innuih a. Ban dar a lo rik chuan naupang dang a hawtir hnuah tlar hnung naupangte kha chu a hawntir ta lo va. Zirtirtu chuan, ‘You will stay on here for an extra hour to study hard,’ a ti; “You will stay back here for an extra hour to study hard” a ti hauh lo.

Mizorama English Medium School hmel tibaltu chu ‘stay back” hi a ni, khawi dictionary-ah mah stay back hi ka la hmu lo.

Mizorama zirtir­tute hian British English nge kan zirtir N. American-ho? Kan naupan laia Sapṭawng min zirtirtu chuan, British English min zirtir a, a lam uluk hle. Hercules hi harkiaules ti-a lam a awih miah lo. Harkiulis tih tur a ti tlat. Schedule hi N. American ho chuan ‘Skedul’ tiin an lam a, min zirtirtu chuan ‘shediul’ tia lam tur a ti tlat.

Bible-a hming ṭhenkhat Peter hi Piter tih tur a ti a, John hi Jan tih tur a ti a, Jones hi Jawns tih tur a ti. Elizah hi Ilaize tih tur a ti; Sarah hi Sera tiin.

Kan naupan laia min zirtirtu min zirtir kha ka chhui let leh pawh hian sawisel tur ka la hmu miah lo. Min zirtirtu anga thiam hi tunlai zirtirtute zingah hian engzat tak awm ang maw?

- Isaac Zoliana