Vai ṭhenkhat leh Hnam Party inlaichinna?

Tun hnaia kan thil hmuh hrang hrang han en mai hi chuan Mizo pa inti ve, he ram leh hnam hmangaih inti ve tan chuan lungawi a harsa a ni. Kan sorkar hi a hranpa chuan kan dem pawh a ni lova, mahse Kamrul Laskar an vulh tlat hi Mizo mipui hmuhsitna thil a ni lo maw? tih zawhna ka han zawt ang a, hnam dang duhsak dang nen a inan lo dan pawh thiam ang tawka rawn sawifiah ve ka tum dawn a ni.

Kuhva smuggler hausa tia an puh Abub Mazumdar hi New Delhi-ah nikum khan Mizoram House-ah kan Chief Minister Pu Zoramthanga leh Assam CM-in ramri chungchang subject sensitive em em an sawi hma khan CM nen an inhmu tih MNF ngeiin an thuchhuahah an tarlang tih kha kan la hria em? Mizoram House-a kan CM nen an inbiak hnu hian Mizoram leh Assam CM inbiaknaah Abub Mazumdar hi a tel ve, a thlalak pawh a awm. He pa Abub Mazumdar hi Assam CM party zinga mi leh Assam CM team hruai ni lovin, Mizoram CM Party zinga mi a nih thu BJP Mizoram Pradesh chuan chiang takin an lo sawi tawh bawk.

February 7, 2022 khan MNF General headquarters chuan Abub Mazumdar-a chungchang sawifiah tumin Press Release an siam a, chutah chuan, "Abu Majumdar-a hian Assam CM hi New Delhi a thlen khalh nghe nghe a, Mizoram House-ah Pu Zoramthanga leh a ṭawiawmtute hi va hmu hmasain, anni chuan ani chu anmahni lam Assam House-a thleng turin an lo kawhhmuh nghe nghe a. Assam House-ah hian Minister Atul Bora nen an thleng dun ta nghe nghe a ni," tih a inziak a, hei hi amah leh amah a inhrilhfiah (self explainatory) nghal a, kan CM nen an inkawm ngei thu an finfiah ta lek a ni.

Tichuan, he pa Abub Mazumdar hi kuha tawlhrukna kawnga in­hnamhnawih lian tak niin Assam chuan an hria a, an man nghe nghe a, thubuai nei lai a ni bawk awm e. Bail-a chhuah a nih chhungin Kolasib-ah Mizoram sorkar function-ah hmuh a ni. The Meghalayan Bureau chanchinbu chuan, “Who invited Abu Mazumdar?” tih thupui hnuaiah chuan, "Nearly a year after Silchar-based alleged areca nut smuggler Abu Mazumdar was spotted at a dinner in Delhi apparently hosted by Mizoram chief minister Zoramthanga for his Assam counterpart, Mazumdar “reappeared” at an official function at Kolasib recently," an ti kuau a, Kuhva tawlhrutua puh chu Mizoram sorkar official function-ah hmuh a nih thu an ziak.

Barak Bulletin chuan September 22, 2022 khan he thu hi an ziak bawk a - Abub Mazumdar chu kuhva tawlh ruk case-a inhnamhnawih lian tak a ni a, Police-in a chenna in an dap pawhin hemi finfiahna tur hi thil tam tak an hmu. Amah hi pa hausa tak a nih thu an ziak a, tun hnaiah Kolasib-ah Mizoram Minister inah chaw a ei thu leh a thlalak a awm thute leh a thlalak an tarlang a, Abub-a ta M/S Agri Fresh Trading chu Mizorama buhfai supplier a nih thute an ziak - rin aiin an lo hre chiang a ni.

Kamrul Laskar chungchang hi chu RTI Act hmanga zawh chhuah chinah ringawt pawh hian MNF party milian leh contractor te thawh ve theih loh hna lian thawktu a ni. He pa hi eng ang taka special nge a nih tih hi MNF worker ngei pawhin an sawi thiam lovang, chutihlai chuan Class II Contractor lek lo la niin Lengpui Airport a sak chim hnuah chauh khan Class I Contractor-ah a kaisang a ni. Class II Contractor ni chung khan vaibelchhe tel contract kha a lo thawk ngar ngar a, kha kha MNF worker vangvat kai leh kai lo, mahni inpe tak takte tan chuan thlir liam a harsa ve ngei ang.

Sorkar hian tih ṭhat leh tih fuh loh a nei ṭhin a, thil ṭha tam tak a ti chung hian Abub Mazumdar leh Kamrul-a laka a thang tlawm lutuk hi chu a fu lo a ni. Heng mite leh sorkara a tuihang hawp phak mi thiltithei fal mi 4-5 vel hian he sorkar hi a tihmingchhia a, social media lama an au an au tawh hi chuan a takin a zawm nge nge ṭhin. Kum 2018 vela Pu Hawla a ṭawng fuh hleithei lo leh Congress an tal phet tlat ang mai khan kan sorkar hi a awm ṭan em ni aw? tih zawhna pawh a awm thei.

Hnam dang pahnih duhsak uchuakte hi han chhui ila khulai Assam-ah pawh Cachar lama awm lehkhathiam sang filawr bik lo leh experience nei bik lo an lo ni leh zel hi a pawi zual a ni. Hnam dang contractor lian law law, Mizote thawh theih loh thawk tura khawl pawh nei ṭhaa hna pawh thawk chakte kan hotuten an lo duhsak a nih chuan mipuiin an la hrethiam ang. Class II Contractor pakhat hna thiam em em bik lo hnenah cheng nuai hlir 8,815.37 man hna pek a nih tawh thu Chief Minister-in Assembly House-ah February khan a sawi a, he mi hnu hian a pe leh nual tawh si nen chhui chian a ngai ve lo maw?

Party tana hlawkna em em awm si lo hian Decor India hnenah chuan phullem phah zawng zawng deuhthaw pek a ni a, chanchinbu lama kan lo hmuh dan chuan RTI Act hmanga zawhna chhannaah khan Mizoramah phullem phah 16 zinga 15a zetah anni, Guwahati lama mite hi rawih an ni. An special hle a ni tih kan hmu thei a, hei hi open tender nge restricted tender hmanga phah tih hre ve lo mah ila MNF worker lam tan chuan mahni sorkar laia Vaipa hnathawh thlir dauh dauh mai lo chu tih theih a awm lo e. Phullem 15 phah thei Guwahati company hi chuan tun sorkar hi an hausak pui dawn tih chu ka kutphah tlukin ka chiang a, Mizo zingah pawh hausak pui an awm ngei ang tih hi chu mi a nileng lo tan chuan rin theih a ni. Hengte hi kum 2023 inthlan kum a nih hma pawhin mipui titi a tlin tawh chuan kum 2023 ah chuan insawi fiah reng renga an awm loh na turin Hnam party tan insiam ṭhatna hun a la tlai love.

Congress kan hnezia kha kan la hria ang a, insiam ṭhat an intiam kha chuan kum 2008 ah khan hneh takin kan thlang tling ve leh mai. Vai duhsak uchuak taka kal mek MNF sorkar pawh hian insiam ṭhat tum se, party worker lam hi ngaihven ve se, kal phung ṭha zawk nen kal an tuma Minister ṭhenkhat an beng hniam ngam bawk chuan km 2023 ah pawh chance an la nei tho. Tuna an kal dan anga kal ngawr ngawra 'Sap Pui Kal Lai' tih an hmatheh ve a nih ngat chuan, sai pui kha tunah chuan a tlu tawh tih hretu Mizo mipuite hian an paih leh thei a ni. Tichuan, Hnam party inti meuh tan vai ṭhenkhat duhsak hi a inhmeh lo tih hi neutral lam thlirna a ni e.

- Lalremruata