CHHAWM THEIH A AWM LO!

England Lalnu ropui Queen Elizabeth II an vuina inkhâwmah khan Archbishop of Canterbury, Justin Welby-a khan Lalnu ruang a kuang aṭang an lak sawn dawn, phum tura an lak sawn dawn khan a hun hnu­hnung berah khan he thu awmze nei tak hi a sawi a:

"Khai le, tunah chuan kuang chunga chhinchhiahna thil­tihtheihna (symbol) kan dah te hi kan la sawn dawn tawh ang a. Tichuan Lalnu Elizabeth-i hi Kristian pangngai ve mai angin thlânah zalh a nih thei tawh ang" tih pahin Lalnu kuang chunga Lallukhum te, a lal tiang te leh khawvel (globe) lem (orb), rangkachak leh lungman tama cheimawite chu uluk takin an la thla a. Biak In maichamah chuan urhsun takin an dah a. Lalnu ropui chu a lei thuam ropui hlipin engmah a rohlu tel lovin an thlah liam ta kha a ni a.

Eng anga lal ropui leh hausa pawh nise, a lallukhum ropui, lung mantama cheimawite chu a thih hnuah a chhawm thei tawh lo. A lal tiang thiltitheite pawh chu a thih hnuah a chhawm thei tawh lo. Hei hi hringnun chu a ni.

Saruakin kan lo piang a, saruak vêkin khawvel hi kan chhuahsan leh ṭhin. Thih hnu piah­lamah hian engmah chhawm theih kan nei dawn lo. Theih ni sela Queen Elizabeth-i khan a lallukhum ropui te, a lal tiangte kha chhawm a duh mai thei, mahse mihring thiltihtheihna piah lamah chuan mihring hian engmah tih theih a nei tawh lova, engkim mai hi Pathian kut a lo ni zawk.

Khawvelah hian chatuan daih tur in ropui kan sa a, damchhung daih tur sum kan khâwl a, hah takin kan thawk a, rim takin kan bei a. Pathian chu sawi loh, ram leh sawrkar phalloh thleng thlengin mahni inhaivur nan chuan tiin kan ti zel a, mahse khawvêl kan chhuahsan niah chuan engmahlo mai an la ni dawn!

Thuhriltu chuan mihring nun a'n chhui tak tak a, mi an lo pian aṭanga an thih thlengin, kawvela thil thleng tinrengte a ngaihtuah kual a, a tâwpa a thutlûkna chu 'Nun hi engmahlo mai a lo ni' tih hi a ni. Ni e, Pathian hriatna tel lo chuan nun hi engmahlo mai a lo ni. Leilung malsawmna dawngin hausain lian thur thur mah ila, khawvel kan chhuahsan hunah chuan engmah hi chhawm theih kan nei dawn lo.

Lalnu ropui Eliza­beth-i te meuh pawh kutruaka an thlahliamna thih hnu piah lam khawvelah hi chuan he mihring hian tih theih engmah a nei tawh dawn lo va. Chunglam thupek chauh nghâka kan nunna hi a awm ve hunah chuan Pathian tih hlutzia leh a thuawih hlâwkzia kan hmu chiang tawh ang.

I inrin loh laiin khaw­vel hi i chhuahsan ve thut thei reng a, chumi hun atan chuan in­buat­saih ṭhin ang che.

- PC Nghaklianmawia