Zoram People's Movement a piang ta

Bulṭantu an awm a ngai a, hmalatu an awm hmasak a ṭul ṭhin. Zoram kalphung fel lo kan sawi nasatzia leh siam ṭhat a ngaihzia kan aupui a, MNF/ Congress ni lo kan duhzia kan tlangaupui ṭhin a nih kha. Tunah hian kan duhna tipuitling tur pawl a lo ding ta e.

Party ni lo, chetchhuahna (movement) a lo piang ta a. He kam ram neihchhun hian hma a sawn a, dik tak leh fel taka a kal theih nân tu pawh, party chhûnga mi emaw a pawna mi emaw chu che chhuak turin he movement hian min sawm ta a ni. I awmna chhuahsan kher a ngai lo ve, movement thlawp mai hi Pathian leh kan ram tâna kan tih theih a ni e.

Unit pawh nei lo, mi tlemte hian kalphung thar min thlen lovang tih sawi ṭhintute hian mipuite chakna thuruk an la hre lo hle a ni zawk. France ram en la, US politik aṭang hian inzir fing ang. Thla 6 leka upa party-in rorelna a chan theih chhan chu kalphung thlak danglam duh vang a ni. Heng mi khawngaihthlakte hi chu awmhmunah lo sarak tir ve mai mai ang u.

Party member zawng zawng belhkhawm aiin neutral kan tam zawk tih hre reng ang u. Kan zirna a tlachhe zo va, kan economy lah hniam tual tualin employment lah a vâng tulh tulh bawk. Eirukna a hluar a, Rs 10000 bi aṭang leka nuai tel hnathawhnaah eirukna a inrawlh ta vek a, induhsakna hleihluak vangin a lian an len belh zel.

Thingtlang lam unaute an cher tual tual a, thuneihna hman dik lohna lah kawi tinah hmuh turin a awm ni maiin a lang ta hial a nih hi. Tun thlengin mi tu pawhin politik ka khel a tih chuan hausak tumin politik khawvelah ka zuang lut an tihna a ni vek a. Party kaltlang lo hian ram siam turin Pathian hi a chak tawk a ni zawk e.

Therhlo leh contract ilo beiseiin miin party an zawm ṭhin. Kan tu leh fate zingah politik awmze dik hriatna bo mek khawpa he politik khawvel hi siamin mahni ṭanghma haina hmun bawlhhlawh tluk chauha ngai an tam tial tial a, a hnaih pawh an hnaih ṭha duh tawh lo a ni ber. Kristian, kan ram kalphung thlak danglam thuai rawh.

Ram leh hnam siamna hmanrua atâna Pathianin min pêk politik chu duhamna hmun bawlhhlawha kha chen kan lo chhuah tawhna kha Pathian chakna ringa kan tihtawp a hun ta a ni. Kristian kan nih angin duhamna, hlemhletna, eirukna leh sual kan do a hun ta a nih hi. Nang upa, nang rawngbawltu, nang ṭhalai leh a hruaitu, Pathian mi te hi i hnar ngam ang maw?

Nimahsela, mi rilru kawi ulh tak mai, ram vei inti lawi site chuan ṭhuthmum aṭangin he movement hi engmah a ni leh chuang lovang tiin an hrilh ang che. Chutiang mi nep ring tawk lek khawpa beiseina nei chau leh Pathian ring lo mi nih chu zak zawk rawh. Nang erawhin Pathian ring la, mihringah rinna nghat ngam zawk ang che.

ZPM hi vawilehkhata lo ding hluai a ni lo va, tar ât chang nei Pu Hawla sawi anga pehhel taka politik khelhna pawh a ni bawk hek lo. Kum tam tak chhûnga ram hmangaihna leh veina thinlung lo puak chhuak a ni zawk tih hre reng ang che. Mahni leh mahni bak insiam lian thiam lote kutah kan ram hi nang mi huaisen leh mi dik khan i la dah reng ang maw?

Ni lo, tawk tawh chu tawk tawh ni rawh se. Heng an chanchin kan sawiate hian eng ang chiahin nge kan ram hi an lo sawp chhiat tawh a, Chakmate lakahte lam kan ram hralh ngam an nih hi hai lul suh ang che.

Mipuite pawisakna reng nei lo leh kan laka mawhphurhna reng nei lo lêna lêngin an pahnihin an insawichhe tawn reng a, chu chu rorel dan kalhmang an hriat awmchhun pawh a nih ber hi!

Zoram zirna chu zirna tlaka ṭha, ei leh bara intodelhna ram nuam, kawlphetha hniang­hnarna leh kawngpui ṭha ngir khupna ram duhawm, a thawk nasa apiangte dinchanna hmun nelawm, intluktlang taka mi tin kan tualchaina ram nuam, thlei bik reng awm lo va dân anga engkim tihna hmun ṭha, eirukna sualin hrem a tawhna hmun leh hmun ralmuang kan nih theihna turin mimal tinin Zoram People's Movement hi kan thlawpa kan chetchhuah a hun ta a ni e.

- Liana Pachuau