Vai sumdawng tih kha

Tun hnaiah Mizo­rama hnam dang sumdawng awmte hnawk tihna chanchinbu lamah kan lo hmu leh ṭan ta a, hei hi Mizoram tana hlauhawm lian ber a ni tih hi ka ngaihdan nghet tak a ni.

Khawvel history hi han thlir ila, tha chakna hmanga inawpna leh inhnehna hi kan hmu tawh ngai lova, tun hma kha chuan chak vanga midang hnuaichhiah leh awp beh theih kha a ni ṭhin a, tunah hi chuan khawvelin chutiang thil chu a pawm thei tawh lo a ni.

Keia ngaih ve danah chuan sumdawnna hmanga inchimralna (economic assimi­lation) kan tih mai hi inhneh dan ṭha leh awlsam ber chu a ni a, hemi hmang hian India rama hnam leh hnamte pawh hi an in awp bet mek a ni.

Keia ngaihdan kal zelah chuan kan ṭhenawm state Tripura ka thlir a, Tripura hi tlang mite ram vek a ni a, Tripuri mite leh Mizo hnahthlak hrang hrangte pawh an cheng ve ṭhin a, tunah chuan heng mite hi thingtlang chhengchhe tak takah bak hmuh tur an awm mang tawh lova, khawpuiah pawh hmun an chang ta lo.

A hre chiangte sawi hmang chuan Agartala-te hi Bengali khawpui a ni ta. A tirah Bengali hi tharum nen, silai nen, chem nen an lut hauh lova, dawr te reuh te te siamin bul an ṭan a. Khawtual mite’n hnawk tih nachang an hre lova, an dawr chu a lo lian tawlh tawlh a, a tawpah chuan sum nei lo zawk dawr dang, a ram mite ta chu an nek chhuak vek a, tunah chuan Bengali khawpui a ni ta daih mai.

Meghalaya hi keia hriat chian ve leh deuh chu an ni. Shillong khawpui hi tunah chuan Vai khawpui a nih loh pawhin sumdawnna hmunpui chu Vai ta a ni tawh.

Police Bazar leh Bara Bazar lama dawr lian chu Vai dawr a ni vek tawh. Shillong-ah Khasi leh Jaintia nuai chuang awm mahse dawr lian an control tawh lo, Vaiin an chhuhsak zo tawh.

Mizorama Vai dawr thlawp zawnga tuna iak iak te hian nakinah chuan Vai bak dawr tur kan nei lo mai thei a, Vai dawr lo lut tur dan nachang pawh hre lova, “A tlawm em alawm,” ti ṭhinte hi chu hnam hralhtu ang kan chang zo dawn. Tunah pawh Mizoram khawpui Aizawlah hian hnam dang thurualpuia dawr nei tam tak an awm tawh a, heng mite hi tun aṭanga dan ang leh dan lo ang pawha kan nek tawh loh chuan Agartala leh Shillong angin dawr lian zawng hi Vai ta a la ni thuai dawn a ni. Chu chu thim thuah thum chu a ni zawk ang.

- C Lalremsanga (Sangtea)