Medical College kan zuar em ni?
Tun hnai khan Mizoram Chief Minister chu New Delhi lamah a zin a, Union Health Minister a zuk kawm. Kan state hotupa ber chuan kan medical college neih ve Zoram Medical College chu sawrkar laipui kuta dah turin a ngen tih kan lo hre ve a, mithiamte comment hriat hmaa lo sawi ve zuah zuah kha thil finthlak lova ngaihna avangin ngawih kan chuh. Tuna a lan dan chuan boxing lama Split Decision ang hi a ni a, sorkar laipui pek duh leh duh loh inhnialna a awm mêk.
Sorkar laipui kuta hlan a nih chiah hian kan MBBS seat neih chu a zatve tawpin a tlem/ tla thlà duai duai dâwn a, seat 100 aṭangin seat 50 ah a tla dâwn. Heti zawng hian ngaihtuahna han nei ta ila, Mizorama indaih lo ber chu doctor an ni a, chutih laia kum tin mai kan doctor neih tur 50% zeta tla hniam tura Chief Minister hmalakna hi ngaihtuah nawn a ṭha lo maw? tih hi zawhna awm thei a ni. MBBS kan indaih loh nen kan seat neih sâ hum thei lo khawpin kan state pawisa a lo tlem a ni tih hi neutral rilru a nâ a ni.
Congress khan medical college hi champion pui an tum viau a, a pian chu an pian tir theia nimahsela a pian a fuh lova, thlà kim lova piang ang maiin a sawngnawi tih chu zep thu a cheng lo.
Congress khan a hmingah Mizoram Institute of Medical Education & Research (MIMER) tih an sâ a, a ṭhat lohna pawh awm miah lo kha MNF sorkar khan a hming thlak kha sorkar hmalakna hmasa zingah an han nei tlat a, a hlawk phahna awm si lo Congress hnathawh tih nep tumna a ang khawp mai.
Hmingah buai loh tur tunah kan tih leh si chuan eng vangin nge a hming hmasa MIMER-ah khan kan buai a, ZMC kan han tih kawi leh vêl ni? tih hi kei ni mi mawl zawhna chu a ni.
Sorkar laipui kuta dah a ṭhatna ve thung chu pawisa lama harsatna kan neih hi thui tak chu a phuhruk thei dâwn a ni. Sorkar laipui ta a nih chuan a sum pawh an tum turah ka han ngai ngawt a, chu chu kan state pachhe tán chuan lawmawm tak a ni.
Health infrastructure atana hman theih sum PMJVK lama vaibelchhe tel chu kan mamawh belh miah loh phullem phahna atan Minister thil tithei zawkin an chang fai ta si a. Health lama sum nei lo state ni si state lian zawk aia phullem ngah state kan ni ta hi naupang chu ni se pian dik lo, taksa lian lai bîk nei leh te lai bîk nei, piang sual ang mai kan ni dâwn. Kan state Medical College hial zuar si hian phullem phahna tur chuan PMJVK sum kan pawt kan pawt kawi maia a zialo a ni.
Lengpui Airport hi Airport Authority of India kuta hlan duhna a awm khan sum lama harsatna leh tih changtlun duhna vang a ni a, hloh leh chân tur a awm hran lo.
Tuna ZMC central kuta pek tumna hi pawisa indaih loh vang leh tih changtlun duhna vang a ni a, mahse kan state mamawh em em MBBS seat 50 % zet kan chân tel tur hi ngaihtuah chungin Mizo mipui hian i ngaihven deuh ang u. Idol, boxing leh MPL ngaihtuah ang hian ZMC hralh tum hi uluk deuha thlir chi a ni.
- C Laldinsanga