CHANCHIN THAR LEH AIZAWL TI TI

September thla Beihrual thla kan hmang zo leh ta, Mizo Idol Season 7 leh LPS Professional Boxing Competition hmuhnawm tak kan thlir liam ta bawk. LPS lamin Boxing an chhuah a, Zonet lamin Mizo Idol an chhuah thung a, hun inangah an chhuah ṭan a, kâr tawn sek a ngai nen, beihrual thupui sawiho tui deuh zan phei chuan hmuh hman loh chang a tam khawp mai, ni tin chanchinbu leh mite titi aṭanga hriat danin, mipuiin an hlut thawkhat niin a hriat.

Mizo Idol hi ka thlir tam lo khawp mai, thlirtu tam takte erawh chuan a contestant-te zai leh an performance lam aiin a endiktu (Judges) te chezia leh an comment vel hmuhnawm ti leh ngaithla tui zawk an tamin an sawi tlat. Kei ka thlir tam loh nen ka thlir tum erawh chuan, ka phu deuh zawk, “Eheu ni khua pawh a la rei loh nen kan hripui vang nge, kan endiktute hmel chu a hai theih dawn a lawm le, Pu Robin-a kan veng tlangval hmelṭha pawh a lo va tar ta em!” Bolywood Big Boss Amitabh te pawh a ang dawn dawn a lawm le! Season lehah chuan inmet faiin intuai thar leh deuh se a ṭhat dawn hi ka ti. Kan nau Zaua leh kan nulate erawh an la mám nalh e, Zauva phei chu a tleirawl hmel a la paih lo, inthuam inbel thlengin in mawiin in hmuhnawm e.

Kan Contestant te zai leh chevelte erawh siniar lam tan hmuhnawm leh min han sawk deuh dawrtu a awm lem lo. LEIKAPUI lam rawn thawhchhuahpui awm deuh se zawng Siniar lam kan phurin kan hlut deuh zawk ngei ang le. Thlirtu ṭhenkhat Kristian hla an tibawrhbang deuh a ni lo maw ti an awm nual, keini ang Solfa leh Rimawi lam master lo lutuk tan chuan zunzam min han deng dawt leh fan a awm lo, hla hi a saka sa lo hian, a chham hian an chham ta mai em ni aw tih mai a awl. Season leh ah chuan ruahmanna dang deuh te siam theih ni se.

L.P.S PRO FIGHT :- A ropuiin mit a tlai khawp mai, kan ṭhalai tam takte ruihhloin a tihbuai em em lai a, hun rei lo te chhunga ṭhalai khati zat fit tak tak hmel leh chevel han hmuh ngawt pawh kha a ropui e. A hmuhnawm lam ai mahin, a buaipuitute in fakawm e. He Pro fight bulṭan dan tlangpui in rawn tarlante leh bul ṭantute zinga mi; tel ve ta lote chawimawina leh hriatrengna hun tawi te khawvel hmuha in pholang leh lantirte a ropuiin a ṭha khawp mai, nachang in hria e. Zoram kilkhawr tak tak aṭangtea ṭhalai Talent nei ṭha in han haichhuak a, Zoram mai ni lo; India leh Khawvel (International) thlenga lang pha leh lang zel tur in han phochhuakte hi a ropui e, tun ṭuma final kheltu mi 10 te phei kha chu chawl loa an kal zel dan tur ruahmanpui chuan, Khawvel huapah an lan phak a beisei awm e. A buaipuitute tan sum leh paiahte a hautak dan hre ve pha lo mah ila, theihtawpin bei teh u. Hei hi a ni Zoram hmasawnna rahbi kawng khat chu, Politic field aṭang kher lo pawhin Zoram hi a siam ṭhat theih a ni tilangtute in ni tih hre reng ang che u.

Tun thla tawp lam ni tin chanchin leh social Media tea mite titi leh an sawite hi mi tam zawk chuan kan thlir liamin kan hre zui lo mai thei.

1. KOLASIB FAST TRACK COURT :- He Court sakna tur lungphum phum tum hian Abub Ahmed Majumdar a tel vein, Minister K. Lalrinliana inah chaw a ei bawk tih thu hian titi a titam hle, A.A.Majumdar hi Dholai (Cachar) a awm, kuhva rah tawlh leh fertilizer tawlha inhmang, smuggler lian tak niin, Assam leh Mizoram C.M te Delhi-a an inbiak hmasak ṭuma an zinga chaw ei ve pha niin, Mizoram Chief Minister sawm zawk nia sawi a ni. Kan sawrkar nen hian inzawmna nghet tak hi an nei ngei em ni chu aw? tih hi mi tam tak rin dan a ni.

2. Dt.28.9.22 a Pu K.Lalrohlua Boatman (IV Grade) Provisional Employee Ṭamdil a thawk chu an hotu Tourism Director in a ban thuah Ṭam dil chungchanga vaipa thuziak (tweet) leh mzu mithiamte thuziak, thosilen pawp leh mutbu ṭet kha an ṭhui ta em? tih leh hnathawk ṭha lo hrem leh hrem loh. Heng thute hi mite chhiar leh ngaihven a ni.

3. CENTRAL SAWRKHAR KUTAH ZMC HLAN KAN TUM MAW? He thu hian kan Chief Minister Pu Zoramthanga’n a Delhi zin ṭuma Prime Minister hnena Z.M.C hi kan zo lo e, Central Sorkhar hian enkawl mai teh u, tih a thlen kha keini ang rual chuan a ni tak e, kan lo ti hman deuh mai a, Dt, 1.10.22 a CENTRAL SORKHAR KUTAH ZMC HLAN KAN TUM MAW? tih C.Lalhriatpuia rawn ziah kan hmuh chuan a ni zawk mai awm mang e a tih ve leh theih, titi a tam a, ngaihtuah uluk a ṭul hle awm e.

4) Dt 1.10.22 khan Pu Lalsawta MPCC President in an manifesto a tlangzarh a, a ropuiin a ṭha khawp mai, mi tam takte titi leh thlir dan erawh chuan kum 10 zet hneh takin an Sawrkar a, Central-ah pawh an tlatlum hle ṭhin. Kha'ng hunlaite khan manifesto hi mumal takin an lo nei lo em ni chu aw a tih theih. Thawhpui neih leh neih loh thuah, Party dangte tan han thawhhopui ngam tur em ni dawn le! Thawhpuite mawng sawh dawta thlauh duh an nih kha maw le an ti deuh.

Heng ka thu rawn tarlante hi chanchinbu leh media lamtea kan hmuh leh chhiar liam tawh hnu ni mah se la, ram hmasawn leh hmalam pan zel tum tan chuan chhiar liam mai lo a, kan inzir chhoh zel nante leh ṭangkai taka min fin chhuahtu ni thei se a duhawm.

- Lalhmangaiha Sailo Holy Cross Bakery – 9436360275