PAMPHLET MANTO

Nizan kan chaw ei khawmnaah he 'Pamphlet manto' hi ka hmu hlauh mai a, Lunghlu ṭhami chhar ang maiin kan lawm a, ka chul hliau hliau nghal a, vannei ka inti hle bawk a ni. 

Tukinah intithei takin whatsapp group lamah ka vawrh darh nghal mai pek a, keimah ang bawkin midangte pawh chuan an vawikhat hmuhna a nih ve hlawm avangin zawhna hrang hrang min zawt a, inti hre taka chhang tur ka nih laiin ka hre lo ropui si. 

Hetiang hi zawhna leh 

chhanna tlangpui chu a ni: 

Khawi printing press a chhut nge?

-  Pamphlet-ah hian engmah a lan loh avangin ka hre bik lo

Copy eng zat nge chhut a nih?

- Copy zat pawh tarlan a nih loh avangin ka hre leh chuang lo 

Copy khat eng zat man nge?

-  Pamphlet-ah hian chutiang engmah tarlan a ni lo a, a vaia chhut man 1,053,000/- tih an sawi chauh ka hria. 

A chhut manah cheng nuai 10 chuang lai a ni si a, a copy tam viau awm a nih laiin keiniin kan la hmu ve bawk si lo. A copy a tlem nge copy khat man a sang bik ni le?

- A copy zat tarlan a nih loh avangin ka hre bik lo a, a paper quality chu paper pangngai, gsm 95 vel niin ka hria a, colour paper a nih ve avangin black and white ai chuan to ve deuh ngei tur chu a ni. 

Colour chu a ṭha bik nge, a va to awm uchuak ve a, Gold colour an hmang em ni? 

-  Ka hre bik lo le, fiah chu a fiah ṭha viau. Gold colour a tel leh tel loh chu ka hre bik lo. 

Mawza manto leh Vawkte manto an sawi te nen a va inang duh awm ve? 

-  Chuti lam chuan ka lo ngaih­tuah ngai hauh lo mai a...