Ṭamdil thil thleng leh Mizoram politician
Tun hnaia Ṭamdil enkawltu ban a nih tâk chungchang hian Mizoramah thawm a siam lian hle mai a, a bantu signature petu hi Director a ni chungin a phenah hian amah aia lal zawk hming ṭhat duh avanga tuihal politician a awm hi Mizoram hian an ring tlat a ni.
Congress sorkar lai khan lei an dawh fuh hleithei lova, PWD Minister thiam loh ni lem lovin thawktu Engineer tihsual te hmanraw ṭha lote khaw chim chhan a nih a rinawm. Lei a chim rual rual khan Opposition MLA kha rang takin a tlan thleng nghal a, lei chim pawi tih vang aiin sorkar beihna hun ṭha nia a hriat vang a nih hmel a, "A changtu Minister bâng rawh se," tiin a au nghal dum dum a ni tih video lamah a la awm reng a ni.
Airport sak a chim tuk mai khan a changtu Minister bâng tura nawr ve tho chi a nih hmel laiin Kamrul-a tih kha a lar ta zawk a, nimahsela tumah an hrem hriat a ni lova, kan politics kal dan hi chu nuih a tiza bâng lo a ni e.
Hman deuh khan MST bus chet sual avangin Trasport deptt. changtu Minister chuan banna a lo thehlut tawh a, pawm a ni lo chungin mawhphurhna la ngam Minister a nihzia a tilang kha kan la hre reng a ni.
Tichuan han sawi zui ta zel ila, Health Care sum vaibelchhe tam tak tang mêk te hi mawhphurhnaah la ngamin Health Minister hian ban huamin Finance Minister hnenah hian nawr ngam se chu a hming a ṭhat bakah damlo rethei mangangte tán a va hlu dâwn em ve le... Sum hmanna tur thil dang hi an neih tho si avangin Health Care lam bill ngaih pawimawh hi a hun takzet zet a ni.
NABARD atangin sikul building chei ṭhatna turin loan puk a ni a, chu chu Mizoram mipuiin kan rulh leh tur a nih laiin building sak chhe zet zet maite kan hmuh hian Minister hian mawhphurhna lain a bang ve ngam dâwn em? School Education Minister hian ban lam a tum loh pawhin chhui chiangtu tur huaisen taka a ruat ngam si loh chuan a phena mihring awm nia anmahni hre chiangtuten an sawi hi a dik a nih si chuan, lei sak chim avanga bâng tura in nawr ang khan sikul building sak ṭhat loh avanga bâng tura nawr hmabak an awm thei em?
Zawhna a tam rualin chhanna a la awm thei si lova, kan politics hi Ṭamdil thil thleng ang maia chiri leh mumal lo, hming ṭhat chiah duh thawk ṭha mang si lo khawvel a nih chuan Zoram chhuahsana pêm mai duh ut ut an awm pawhin a mawh lovang.
- Mahruaitea