FIRST NAME, MIDDLE NAME, SURNAME CHUNGCHANG

Mi tam tak tan thu holam angreng tak Social media-ah a darh a, India ram map chhungah Most popular Surname in Each State tih ni a, Mizoram chhunga SURNAME tam ber chu Chakma a nih thu a chuang. Hetiang hian rilru na awm takin sawizui a ni :

"Map of India in each State Surname ah Mizoram Surname chu Chakma tih dah a ni ta kuau mai le. Eng vangin nge Mizoram State Surname ah Chakma tih a nih tak mai leṭ "

RINTLAK A NI LO

He map hi mi pakhat a hming Suresh Sambandam chuan 13 February, 2022 khan Twitter page ah a dah chhuak a. Heta a thil tarchhuah hi rintlak taka poll/survey hmanga buatsaih niin a lang lo. Ama mimal rin thil thu niin a lang, chuvangin chaw tak khuka khuhpui tlaka ngaih a ni lo. Social media a tu emaw thil dah chhuah hi Luka ziak ang maia pawm chi a ni lo, an thulakna hnarte an dah ngam loh chuan thu puarpawleng leh thu vuvuk mai maia pawm phawt a him ber.

SURNAME CHU

Mizote hming sak dan kalphungah hian thlahtute, pi leh pu hming emaw hnam hming surname atan sak tel hi kan chin dan a ni ngai lem lo niin a lang a, an hming ang put tel ve zel ai chuan thlahtu bul hming kha hnam hming Ralte, Pachuau, Hmar etc kan ni zui ta zawk a ni. Chuvangin kan hming hi a sei emaw tawi emaw pawh ni se, first name a ni tawp. Middle name leh surname hi Mizo hming tam berah a awm ngai lem lo khawp mai.

Vai hming pakhat Ram Prakash YADAV hmingah hian Ram hi a first name a ni a, Prakash hi middle name a ni leh a, YADAV hi an hnam hming surname chu a ni ta a.

Mizote hian mihring hming zu, in, hla, thlam etc sak ṭhin a nih avangin hla thuah pawh sakhming tih a nih laiin ran, hmun leh thil dang hming chu phuah, vuah ṭhin a ni. Hming sak dan hnam dang tih dan ang hi kan pi leh pu aṭanga kan chin dan a ni ngai lo a. Hming sei tak ziah zawm put (first name or given name) a ni ringawt mai.

English ho hian dan naranin hming pathum an nei a.

First Name – Jack

Middle name – Samuel

Surname – ADAM

Jack Samuel ADAM

Mipa hming Jack first name, Samuel middle name, ADAM hi a surname chhungkaw/hnam hming. He pa hian a nu lam surname BROWN an lo sa tel a nih chuan Jack Samuel ADAM BROWN a ni ang.

Maiden name

Emily Claire TAYLOR hi hmeichhe hming a ni a, a hming ber chu Emily hi a ni. Pasal atan Jack Samuel Adam hi lo nei ta se, a pasal neih hma hming (maiden name) kha a put zel a rem tawh lo a, Emily Samuel Adam a lo ni tawh ang.

Kan Chief Secretary ni tawh Pi Pi L. Tochhawng hi a hnam chu Khiangte a ni a, pasal a neih hnu khan a IAS ṭhian zingah a pasal surname a ṭawm ve nghal loh avangin harsatna leh lo ringhlel te an awm avanga a pasal hnam hming Tochhawng ṭawmpui ta nia sawi a ni. Ani chauh lo pawh hi an awm nual tawh a, hei hi global village in a ken chhoh zel tur a ni a, sawi sawp ṭul ti hauh lo ka ni.

Mizo India sipai Assam Rifle, Assam Regiment etc a ṭang hmasa zawng zawng te kha an duh emaw duh lo emaw an surname ah LUSHAI tih vek an ni ṭhin a, tunah hian khatiang kha tihzui zel a ni tawh kher lo ang.

Chakma surname

MBSE in Class 10,12 Board exam result bu a siam ṭhinah hian Mizo zingah International hming sak dan ang first name, middle name, surname ang thlap hming hi 5% a awm tling ang emṭ Sakhua vang leh English etc hming pu tlem an awm a, hnam hming dah tel tlem an awm bawk tih chauh a ni. Chutih laiin Chakma tamnaah chuan an hming tawpah an surname Chakma an dah vek tih kan hmu. Hetiang a nih avangin hian Mizoram chhunga surname lar leh common ber a ni ta hi mak tihna chhan tur a awm lo.

UK-a Mizo awm pakhat min hrilh dan chuan Mizo pakhat UK chhunga lehkha zuk zir pawh first name chauh nei a ni a, Lloyd Bank ah account a hawn ṭumin an Bank khawlin first name chauh nei kha a pawm thei si lo a, kan missionary hmasa pawh a hming William Williams a nih ve tho kha maw tiin a hming pangngai chu a ziak nawn (double) ta ngawt tih thu min hrilh.

Surname i nei emṭ

Khawvel changkan avangin Vairengte chhak lama kan hming sak leh chin dan ṭhan hi kan sahuai thing vawn tlat a remchan chiah lohna a awm ta mek a, hming ziah zawm put put hi eng vanga min lo zirtir ni mawṭ Min zirtirtu lam lah hming nei sei deuh chuan hming 4/5 neiin an ziahzawm put der si lo. Kan hming ziah dan hming chu ziahzawm tur tih kha Luka ziak tluk zeta ngai mi hmasa zingah an tam a, ṭhangthar hawiher chuan a rawn thlak hret hret thung.

Myanmar chhunga Mizo awmte hming ziah dan hi lam khat te te ziah hran an ching a, Lian Thang Vunga, Daw Sei Thangi etc. Passport, Visa dilna form dah khahah a rem deuh vang a ni ang nge, Burmese hming sak dan phung leh Myanmar Sorkar duh dan zawk ni ang, first name, middle name, surname an nei bik tlat mai. Malsawmdawngliana tih surname nei lo hming sei tak hi first name sei tak a ni. Nang surname i nei emṭ

Kum 100 te a vei leh chuan ṭhangthar hming chu international viau tawh ngei ang.

- Huna Kawlvawm