'Hri leng, Dan zawm leh kenkawh'

Lawngtlaia Covid-19 kai hmuh thar mi pahnih,  Guwahati aṭanga lo hawte chu Thenzawl-a Hotel pakhatah an chawlh bakah, a bul dawrah thil an lei tih hriat chhuah a ni a, hotel neitute leh thil an leina dawr neitute hi home quarantine nghal an ni. 

Two wheeler hmanga haw an ni a, Thenzawl an paltlang hun hi June ni 29 a ni tawh a, an chawl tih hriat chhuah a nih hun, 5th July nen a inkarah hapta khat deuh thaw a tla hman a, hetih chhunga hotel leh a bul dawr tlawhtute chhui vek hautak tham khawpin hun a tla rei hman a ni. 

State pawn aṭanga lo haw turte hi sorkarin thu delhkilh fel tak neiin phalna a pe a. Haw phalna (Inter State Movement Permit) a pekah an zawm turte chiang taka ziah lan a ni. Point no. 2 & 3 ah te chuan 'Lirthei khalhtu leh passenger te kawng lakah khawi khuaah mah an ding tur a ni lo' tih leh, 'an kalna tur an thlen hma chuan midang an hnaih tur a ni lo' tih tarlan a ni. 

Hri leng mek hi chhiatna (disaster)-ah puan a ni a, DM  Act,  2005 tlawhchhana thupek siam zawm duh lote chu Section 51 hnuaiah hrem theih an ni. Kum khat lung in tantir leh pawisa chawitir theih an ni a, an thu awih lohna chuan thihna emaw,  midang tana hlauhawm emaw a thlen a nih chuan kum 2 lung in tantir theih an ni. 

IPC 188 hnuaiah pawh sorkara thuneituten Dan hnuaia thupek an siam bawh­chhiaa midangte nunna atana hlauhawm thlentirtu chu thla 6 lung in tantir leh pawisa chawitira hrem theih a ni. 

State danga kan mi leh sa tangkhang te, lo haw khawm tura rilru in hawng taka kan awm laiin, sorkar thupek leh Dan zawm lote avanga mi tam tak buaina a thleng hi a pawi hle. 

Khua leh tui ṭha chuan Dan a zawm/ ngai pawimawh tur a ni. Chutih rual chiah chuan Dan hi mi nawlpui himna tura duan a nih avangin a hunah chuan khauh taka kenkawh bawk tur a ni. 

Chu chuan Dan bawh­chhiat mai pawisak lohna rilru lo neite a titim a, Dan an lo zawm phah ṭhin a ni si.