A nihna bo lo zawngin hmasawnna

Kum 2017-a khawpui fai inelna endik tura thlan panel of expert-ten rim taka an thawhna zarah result puan a ni a. Overall-ah khaw lian 23-ah Biate chu khawpui fai ber niin, Hnahthial leh Mamit-in an dawt. District capitals category-ah Mamit pakhatna niin, Lunglei leh Champhai-in an dawt bawk. Other towns category-ah Biate pakhatna niin Hnathial pahnihna a ni a, Saitual pathumna a ni.

Faina Hapta hawnnaah lawmman 26 zet a sem a ni a, UD&PA Minister chuan 2017 - 2018 chu Mizoram Cleanliness Year-ah a puang a, Action Plan 2nd October 2017 to 1st October 2018 tlangzarh a ni bawk.

SIPMIU kaltlangin Mizoram sawrkar chuan carbage truck 54 Aizawl khawpui bawlhhlawh paihna tura a ruahman chu UD&PA Minister in AMC kutah a hlan bawk.

Hmasawnna hi mahni hlutna tar­lanna leh phochhuahna, hriattir a leh hriatthiamna hmanraw pawimawh tak a ni. Hetiang a nih lai hian keini chu hmasawnna kan neihin kan hlutna leh nihna hloh bo zawngin hma kan la mai duh fo. Sum kan hlawh chhuah chuan eng nge pawi? kan ti duh lek chauh ṭhin.

Kan hnam rohlu tam tak pawh hetiang hmasawnna duhawm lo leh sum siamna hmanraw pakhat atana hmangin an nihna leh hlutna, makna, a dangdaina te chu kan siam danglam mai hreh lo. Ṭhasiama se no neihna te pawh a hlutna bo vek khawpin kan chei danglam vek tawh, a pawi hle.

Harh a hun... Faina lam kan uar, faina lawmman dawn kan tum, kan bei nasa. Faina lam hawi thuziak ṭha tak tak kan hmu. Khawpui fai inelna 2017-a slogan ṭhenkhat "Kan fai zel dawn", "Fai hi i tlin a ni", "Fai hi nangmah leh i vengah bul ṭan rawh", "Faina hi changkanna tehfung pawimawh hmasa a ni", "Balh bansan rawh" tih te hi a mawi ngawt mai.

Ka rilru-ah hmasawnna duhawm faina lam hawia rawng kan hnawih chhoh mek lai hian Meghalaya state-a khaw te tak te, Meghalaya leh India mai ni lo, Asia khawmualpuia thingtlang khaw fai ber ni thei ngat 'Mawlynnong' khua, East Khasi Hills chhunga awm, Pynursla community development block chhung, Vidhan Saba (Legislative Assembly) Constituency chunga awm hi a lo lang vat a.

Mawlynnong hi Shillong aṭanga km 90 a hla vel a ni a, India-Bangladesh border a awm a ni. "The Gateway Of Barak Valley". A khuaa cheng te hi kum 2015 census-ah khan a khuaa cheng hi mihring 500 emaw lek an ni a, kum 2014 kha chuan mihring chenna in pawh in 95 vel lek niin, ziak leh chhiar thiam pawh 90% an tling.

Khasi ram, kuhva hnianghnarna, Kuhva chinga eizawng leh kuhva nasa state an ni chung hian he khuaah hian kuhva ei na chil chhak sen zel zuk hmuh tur a awm lem lo. Khasi mipuite tihdan ṭhin ang thoin Mawlynnong ro leh sum te chu an fanu naupang berten nu hnen aṭangin an rochun ṭhin a, nu hming tawp an ṭawm tel bawk ṭhin.

Mawlynnong chu hnam thianghlim tia hriat lar an ni a, an hnawmhnawk leh bawlhhhlawhte chu hnang aṭanga siam bawlhlawh bawm (dustbin) ah an paih khawm a, pit-ah an paihin leiṭhaah an siam leh ṭhin. An khawtlang inrelbawlna pawh a fel faiin sum seng si lova faina kawnga an inenkawlna phei hi chu an entawn tlak tak meuh meuh.

Faina kawngah an in enkawlna leh in vawn chungchangah hian khawpui lian aṭangin bungrua engmah an chaw lut chiam lem loa, vehbur khawnin khawchhung hmel lan dan ti bo ṭhak khawpin rawng an hnawih chiam lem lo bawk.

An invawnna, a nihna anga hlu tak leh zahawm tak, fai taka an vawn rah chhuak avang hian khawvelin a hmelhriat a. Tlawhtu tam tak an nei a, chung aṭang chuan sum tam tak an khua leh state in a lalut a. Eizawnna thar ṭha leh rintlak sawrkar hna ni lem lo a pian phah nasa; ziah tur a va tam tak em.

Keini chu a hnawih rang zawngin, a nihna tak ti bo zawngin kan che ta ṭhin a, a pawi hle. Fai tum khua te pawhin rawng hnawih tur an neih loh vangin an beidawng mai ang tih a hlauhawm e. Anni chuan khaw chhung leh kawng sir hnim te hi an thlo fai a, an sam fai ve chiam lem lo, awmze neiin an cut a, an siam ṭhin a ni zawk.

Hetiang khawtlang, thingtlang khua, kal pawh harsatna hmun hi nimahse, an state Chief Minister leh UD&PA minister te hriat mai ni lo, khawvel hriat an hlawh phah a ni. Kum 2003 khan Discover India Magazine chuan 'Cleanest Village in Asia' ah a thlang hial asin.

- Lalrochhara Chhakchhuak