Traffic mumal zawk nan

Kan khawpui a chêpzia leh motor a tam sawtzia hriain, Traffic lam hotute chuan ruahmanna ṭha deuh mai an siam a, motor number azirin intlanchhawk turin ruahman an siam a, a enchhin nan kan han hmang ṭan nghal a. Motor jam nasa lutuk pawh a ziaawm phah viauin ka hria a, a lawmawm hle mai.

Motor a tam a, mihring kan pun zel bawk avangin traffic jam hi chu kan la hmachhawn nasa lehzual hle dawn. Motor lam khuahkhirhna leh awmze nei zawka tlan dan tur an rua­hman mek lai hian mipui, kea kalte pawh hi awmze nei zawka kan kal a, kan insulpel theih nana hmalak pawh a ṭul hle tawh mai. Khawpui tawt leh motor tam karah, remchang leh remchang lo pawh ngaihtuah loa kawng kân kan tam hle mai a, hei hi ngaimawh tham a tlingin ka hria.

Aizawla kan hmunpui, Dawrpui leh a chhehvelah hian mihring intihnat palh a thleng fo lo hi a vanneihthlak hle. Mi veivak kan tam si a, chhum lo chat loin motor a vei reng bawk. Hetiang karah hian mi tam ber hi chuan traffic police thu pawh ngaichang lem loin, mahni duhna hmun leh duhna hunah kawng kan kân leh pawp mai ṭhin a, hei hi kan him tlanna tur atan chuan thil pawi tak a ni. Himna piah mai bakah traffic jam leh jam lohah pawh nghawng a nei theiin ka hria a, ngaimawha neih chi niin ka hria.

Bazar Bungkawn­ah kea kalten him leh awlsam taka kawng an kânna turin flyover bridge siam a ni a, hemi hmanga kawng kân peih loh, a hnuai kawngpuia remchan leh remchan loh ngaihtuah loa kawng kân an tam em em reng mai; chutiang bawkin Canteen kuala mi pawh hi a ni bawk.

Kea kalte tan AMC chuan footpath ṭha tak mai a siam reng laia footpath-a kal lo a, kawngpuia kal lui hram hram eng emaw zat kan la awm bawk. Heng, footpath-a kal loa kawngpuia kal lui hram hramte hi motor-in tipalh ta se, motor khalhtu emaw zawk kha kan thiam lo viau emaw a ni leh si ang a; a thiam lo tak tak zawk chu mihringa kha a ni.

Ka ngaih­tuah ṭhin chu zebra crossing-a kawng kân loa hmun danga kawng kân, motor-in a tihpalhte hi chu kan fimkhur lehzual nan medical reimbursement pawh tih theih loh ni ta se, chutiang bawk chuan footpath-a awm reng a, footpath hrula kal tlatte pawh tawhsual an tawhin an inenkawlna bill theih loh ni ta se, kan fimkhur lehzualin, chetsualna thleng thei lakah kan him zawk ang a, tiin ka ngaihtuah ṭhin.

Motor kal dan kan thununa kan khuahkhirh ang bawk hian kan him tlan a, mu leh mal kan lo neih zawk theih nan kea kawnga kal ṭhinte kal dan tur pawh hi thununa ruahmanna ṭha zawk kan siam a hun khawp mai.

- Ramropuia