Motor intlânchhawk

Traffic lam en­kawl­tuten kan ṭhatpui zawk nge ṭhatpui chuang lo tih enchhin nan motor intlanchhawk an ruahman a, kan han tichhin a ni a. Traffic tawt lutukin a ziaawm phah viauin ka hria a, tun dinhmunah chuan a ṭha rih viau nachungin, hun rei zawk ngaihtuah erawh chuan motor intlânchhawk hian a tihziaawm reng theih loh hun a thleng tho tho dawn, chu chu kan ngaihtuah lawk a ngai a ni.

Motor intlanchhawk avangin ni tin motor sang chuang ding ziahin, kan kawngpui tawt lutuk leh traffic jam nasa lutuk zia­awm rih mah se, nakin zelah chuan hetiang hi kan ni reng chuangin ka ring lo. Tuna traffic tawt tihziaawm nghal nana thil ṭha tak a ni chung hian kan hotute hian hmathlir thui zawk an neih erawh a ngai. Tuna public transport system hi a ṭha lo a, mipui tan innghahna tlak tak tak a ni lo.

Traffic a tâwt a, motor a tam chhan chu public transport kan neih ṭhat tawk loh vang leh a chuan man a to vang a ni. City bus leh taxi ṭhahnem tak kan nei a, amaherawhchu ruahmanna a awm loh avang leh, motor chuan man chungchang avangin, mi tam tak chuan anmahnia lirthei neih an thlang zawk a ni. Aizawl veng pakhata kan

ṭhian pakhat chuan a office kal nan, two wheeler-in thla khatah petrol manah Rs. 800 vel a seng ṭhin. Taxi-in kal ta se, kal lamah in thawh ṭawm angin Rs. 20, haw lamah Rs. 20 bawk a seng a. Taxi chuan manah thla khata a sen tur chu Inrinni leh Chawlhni tiam loin, thla khat chhungin Rs. 40 x 22 = 880 daih a ni.

Public transport-a chuan man rate hi tuialhthei man a to avangin an to ṭhin kha a ni a, tuialhthei man a tlâwm zawnga a kal lehin tihtlawm leh a awm ngai lem lo thung. Tuna a rate ang hi chuan mi rethei leh rethei kher lo tan pawn nitina chuan nana hman ai chuan mahnia lirthei neih dan kawng dap mai kha sum sên a tlem zawk.

City Bus pawh hi a chuan man a to ta hle a, chu bakah an vei zing tâwk lo a, innghahna tak takah a hman tlak loh. Traffic jam-a an din chhung chhut tel miah lo pawhin, stand-a an din chhung hian khua a tlai hman a, hunbi neia hnathawk chi tan chuan rinrawla neih ngam a ni lo. Stand ṭhenkhatah chuan passenger an khah hma emaw, an hnunga city bus dang a rawn lan hma loh hi chuan an ding ngar ngar emaw tih mai tur a ni a, chuvang chuan rin tak taka hman ngam a ni lo. Chutiang bawkin Line Bus-te pawh hi an ni tho mai.

Public transport hi chang­tlung leh man tlawm zawka neih dan ngaihtuah ni ta se, private-a motor neih hi tun aia harsa hret tura duan a ni ta se, mi tam takin nei leh nei loa motor neih hram an tum ṭhin ang a reh thei ang. Khawpui tawt tihziaawm nan New Aizawl emaw din ni ta se, a nih loh pawhin Aizawl khaw dai hnaia khuaah te hian sorkar hmun pawimawh dah chhuah ni ta se, chu chuan khawpui tawt leh traffic jam nasa a tiziaawm thei ang.

Kawngpui pakhat kan inzawh ṭawm nasa lutuk te, hmun pakhata kawng pengṭhuam tam lutukte hi traffic jam-na pakhat a ni. Aizawl chhuah lam hnuaia World Bank Road ang deuh hian, Aizawl hualin Circular Road emaw ruahman ta se, kawngpui siam belh lamah tun ai hian ṭan la nasa lehzual ila, traffic jam nasa ṭhin hi a ziaawm ngei ang.

- Lalramtiama