ZPM a tlin loh ka rin chhante
"MNF leh Congress ka ning" ti tiin ZPM hi han beisei deuh ngawt mah ila an la tlin zawh ka ring si lo. Kalphung ngaia la kal tur, a khawi emaw zawk zawk hi kan la laltir leh mai a rinawm a, kan la phun nasa leh dawn mang e.
Ṭhalai beidawng hian thisen chhuah mai an hreh lovang tih ka hlau ṭhin.
ZPM tlin ka rin loh chhante:-
1.Congress leh MNF-ah chuan khawpui mi hlun leh hausa, politics-a experience ngah tawh an tam bik. 2. Ṭhan hnan party ruihchilh kan la tam lutuk. 3. MNF Ieh Congress sorkar zar zo tawh, lawmthu sawi nana vote ba tlata inngai an kat nuk. 4. Ram vei pha lo, therhlo dawn tesep tur beisei tawk kan la tam. 5. MNF leh Congress hruaitu tu emaw laka tlatlum nia inhria, an sorkar hlauh chuan ṭhan awk beisei an awm nual 6. Chakma in min tihbuai dan hriaa thinrim ṭhin zingah pawh chutianga min tihbuai ngam chhanah min hruai tawh ṭhintu party thiamlohna hre pha miah lo leh ring phal lo an tam zawk. 7. ZPM hruaitute hian ram hi veiin siamṭhat duh hle pawh nise ‘political game’ hi an thiam lovin mipui aiin an duhdan an ngai pawimawh zawk tlat. 8. ZPM hian Unit leh Block an la nei lo a ni ber a, an zinga party ṭhenkhat unit han rinchhan pawh nise thingtlang kawng pawh ṭha lo ho rilru hneh nan hun an nei tlem lutuk. 9. Sum an nei lo hle hi an buaina tur pakhat a ni. MNF leh Congress chu sorkar tawh leh mek an ni a, development sum lo kal leh Dept. sum pawh hek hmangin leh an lo eiruk tawh sum hmangin campaign-na tur leh thamna han pek turah an buai lo deuh ang. 10. Vai contractor leh company hausaten sum leh thil ṭha dang tam taka rawn vur an tumna ang chi hi ZPM hruaitute chuan an duh ve ka ring lova, a engamah hmaa central tlawn tum lo tur an nih avangin party dang tan beih an nuam hle ang. 11. MNF leeh Congress-a hna hmu lo beidawng, ṭhalai vote nei zingah ramdanga hnathawk an tamin inthlan dawna haw thei lo tur kan tam hle. 12. Mahni hnam chibing hnam politics leh district etc. beiseiho hnenah engmah an tiam mai mai dawn loh avangin. 13. ZPM hruaitute leh an tumte kan la hriat chian hman dawn loh avangin. 14. Zu leh ruihhlo, nawmchenna thila thlemthluk theih tur kan la tam vangin. 15. Bumna ngaia bum theih tur kan la tam hle avangin.
- JL Liana