Hmai hnih nei sorkar, maw?

Zing thingpui in paha chanchinbu chhiar hi ka ching dawklak a, phone bih nghal ngur ngur ai chuan a chin tam tlak viauin ka hria. 

July 4 Vanglaini editorial pawh kha ka lo chhiar leh a, khata MPCC lam thu sawi khan ka ngeng a chhun deuh a. Editorial-ah meuh an rawn ziak leh ta si a, khatiang a nih chuan thu belh chian dawl a ni ngei turah ka ngai nghal bawk a ni. 

 Tun hnai-ah Mizoram sorkarin Sorkar hna­thawkte hlawh bat a nih laiin ruling party mite tan contract cheng vaibelchhhe tam tak pek chhuah a nih thu an sawi ta fo mai a. RTI Act chhanna aṭanga a lan danin, inkhàrkhip lai, May aṭanga June 23 thleng khan Mizoram State Sports Council (MSSC) hnuaiah ringawt pawh cheng nuai 825 man pek chhuah a ni, tih a ni leh zel bawk a. Loh theih loh thil pawh ni lo hna hmanhmawhthlak lo vek a ni tiin chanchinbu lamah kan lo hmu a. Covid19 kan do ho dial dial laia kan sorkar chet duh tan hi a phakar ka ti a, mipui min zahpah lo viauin ka hre bawk. A chhan chu sorkar hian pawisa thawh khawm turin min hrilh chamchi a, chutia sorkar ber a mangan chuan tiin neih ang tawk tawk leh phal ang tawk tawk CM relief fund-ah kan chhung khawm liam liam a ni. Chutihlaiin sum hman danah fimkhur a ngaih thu sawitu leh sum a hekzia sawi fotu kan CM kaihhruai kan sorkar berin contract a lo sem leh sorkar flagship program pakhat pawh tih khaihlak a nih thu kan hre miah lo te hi thil inhmeh lo tak a ni. Hetianga kan sorkar ber mipui sum khawn chunga a che duh hi a pawi dan hi a thuah hnih riauin ka hria. 

Mizoram sum din­hmunan zawh lahin kan CM leh Finance minister ni bawk chuan Pathian chauh lo chuan a hriat loh thu te a sawi kha a nia. Chutiang dinhmuna kan din mek laia sorkar ber a inren duh lo tlat mai hian mipuiin sorkar thawh pui a, kan theih ang tawk tawka ṭan kan lo lak vena kha a tichhe vek a ni. 

Covid19 vanga kan inkharkhip vanglai leh sum pûk a ṭul lai pawha cheng nuai 800 man lai mai hna hmanhmawhthlak pawh ni lo tana sorkar a insum duh lo te hi mipui tan chuan a tha nat thlak ngawih ngawih a ni. 

Hetianga kan sorkar hi a kal zel dawn a nih chuan mipui hian sorkarah rinna kan nghat ngam lo thuai ang a, tun aia harsatna nasa zawk pawh Mizoram hian kan la tawng thei reng a. Chutih hunah chuan kan sorkar bawk hi a mangang hmasa tur chu a ni ang. 

Tichuan, hri pui vanga kan mangan em em laia sorkar chet duh dan hi kan rilruah a cham reng ang a, sorkar lakah kan rilru a hel ang a. Ṭha taka sorkar thawh pui a, mahni neih ang ang kan lo inphal ve tawhna te hian min la vel ang a. Sorkar lakah engmah bat nei loah kan in ngai ang a, khua leh tui ṭha nih kan hreh viau tawh mai dawn a ni.