LUNGLEI ROAD SAMPLE RESULT KHA A CHHUAK TAWH EM LE?

Ni e, fur khat daih pawh ni lo, fur chanve em pawh tling lo daih tura kawng siam chhe lutuk chu, a chhan engnge tih leh, engtinge hei aia tlo zawka kan siam ang? tih ngaihtuahna nen, kawng sample kan la ni turah kan lo ngai ve ringawt a.

Fiamthu lah hi kan thiam hlawm khawp a, kawng sample laboratory test result kha a chhuak tawh a, Alkatra aiin chirh a lo tam zawk vang lo a ni e, an ti. Ti tein kan lo sawi vel a, tuna kawng dinhmun nen ngaituah chuan, a nih duh hmel khawp mai. Tunah chuan chirh mai pawh ni lo, tuihawk hleuh tur a tam tawh mai.

Sample lak chhan: Tun hmain kawng sample hi lak a nih kan hre ngai lo, mipui hriat lohvin department lamin an lo la ṭhin a nih chuan thu hran. He sample lak hian a tum ber nia lang chu, kawng tlo zawka siam dan tur ngaihtuahna aṭanga sample hi la kan ni ber awm e.

Sample lak ngai ve lo: Hman hmanah khan kan sawi kan sawi tawh, miin kawng an siam tlo dan kan hmuhte kan awt ve si a. Concrete chungah hian an black top zui mai a, Pu Manmohana hunah khan India ram chhim leh hmar, chhak leh thlang, highway hmanga kal tlang vek theihna tur an siam kha, concrete feet khata chhah chungah an black top zui mai a. Bihar Chief Minister Nitish Kumar pawhin, an state chhung highway reng reng chu concrete chungah a black top zui mai bawk. Anni chuan kawng sample an la ve lo tawp ang.

Tunge bul ṭan ve ngam ang?: Kan ram leilung nemzia leh lung chang ṭha hmang lo va, lung hnip chunga black top tlo lohzia hi, tuna kan hotupa ber hian a hre ve ngei ni tur a ni, central hotute hnenah kan ram kawng chu concrete a nih loh chuan a tlo theih lohzia a sawi thawm te kan lo hre ve a. A zuk sawi kaw zo lo nge, a la vaw dup te te zawk? Tun thlengin concrete chunga black top hmuh tur a la awm lo.

Bawngkawn leh Ṭhuampui inkar te, Ngaizel phei tawite concrete hmanga kan siamte hi, kum 20 lai a chuang tawh, he concrete chung hi black top nachang kan hre lo chung hian, tun thlengin a la tha reng mai, black top nachang hre phei ila tuna khi awm nual pawh hi a la him pial ang mawle.

Sample lak lak ngai lo kawng tlo siam dan a awm reng a, hautak deuh mah se vawikhata kawng tlo lo thui deuh siam ai chuan, kan siam chin chin tlo tura bul tan ngam sorkar kan awm thei ang em?

Future bright lam ve thung: Kan Pu Modi hian Act East policy a kalpui mek hian Mizoram a ti tawi tawk dawn a ni. Chhim lamah chuan chhim tawp aṭang Lawngtlai chu, Rulngan pa ang zar maiin an siam tawh a, kawng zau tha hi Tipa, Saiha to Lawngtlai te, Chawngte, Tlabung to Lunglei te, Lawngtlai, Lunglei via Serchhip to Aizawl te, Champhai to Aizawl te, Aizawl via Mamit to Zawlpui te, Vairengte to Sairang kawng siam mekte leh tuna survey mek Bunglang Sauth to Lengte te hi, a puitlin hun chuan Mizoram hi a tawi tawk mai dawn a ni.

Central pawisa hmanga kawng zau kan neih tluan parh theih chuan, ṭhangtharte future chu a bright ve deuh tawh ang chu maw. Mahse hei pawh hi eng chen nge central hian min enkawlsak dawn kan hre ve lo, state sorkar kuta a hlan hunah kan phun leh nasa ang em?

Toll text lakna lam hi: Kawng ṭha leh tlo nei tur chuan, company enkawl tir a ngai ṭhin. Chung company-te chuan toll text lakna an siam a, lirthei tlante hnenah an tlan man an lo khawn zel a, chung an pawisa khawn hmang chuan kawng chhe lai apiang an thawm ṭha zung zung a, kum 2 danah te major repair neiin, a tharin an black top zui zel mai a ni.

Kan ramah pawh hian Toll Text lak lam hi bul ṭan ve tawh ila. Kawng ṭha kan neihna tur a nih chuan, lirthei neiten pawisa thawh an hreh hauh lo ang. Thil hi a system a fuh chuan kawng hi a kaw ruih mai asin.

Kan tun dinhmun: Social media lamah Mizoram kawng chhiat­zia, hmun hrang hranga mi, Video khawn khawm an rawn pho lang a, kawng chhe mah se hna thawh a ngai bawk si a, kan kawng zawhte chu a diak kawi mai ni loin, kalkawng tuihawk aṭanga Sangha an man laite hmuh tur a awm hial asin, chung kawng chhia an rawn pho lante chu. Tut to West Phaileng, Mamit to Dapchhuah Sunhluchhip to Darlawn, Chekkawn to Vanlaiphai, Black top chhe lutuk, siam zawh hlim hlawta lungṭhil pal darh chuai chuai theih te, Chuhvel to Saikhawthlir te, Riangtlei khaw kawng chhe turu lutuk te, Saizawh to Vaseikai te, Thenzawl to Lunglei te an ni. Heng lo pawh hi hmun tam tak a la awm, mipuite kan khawngaihthakzia in hmuh ve duh chuan a video link ka lo dah chhuah (

) hi lo thlir ve teh u. Ram hi tih takzeta vei chu ni ila, hetiang em em hian mipuiin kan tuar lo ang maw le.

Dik tak chuan kan kawngte hi a chhiat tirh tea thawm ṭha nghal zung zung lo vin, a chhiat fe hnuah thawm ṭhat kan tum a, a lo chhe nasa hman tawh si a, kan thawk seng leh si lo va, mipui kan tuartir tlawk tlawk mai a ni. Kawng black top khawkte hi, thleng tiat a nih tawh chuan, alkatra chawh sa trip khat phur chhuak ila, km 20 laia thui a siam mam nghal theih laiin, thlangra tiat a nih hunah kan thawk chhuak chauh a, lung lian hmanga hnawh te te a ngai a. A hna hautak hnu hian kan che chhuak ṭhin a, siam awlsam laia che chhuak nghal ni ila, hetiang em em hian mipuiin kan tuar lo tawp ang.

System fuh lo va innghat kan ram hi, system ṭha set thei sorkar kan mamawh takzet a ni.

- Lalrinliana Colney