Minister ina smuggler chaw ei an tih chu!
Assam lam mi kuhva smuggler lian an tih, Abub Mazumder chu hman ni khan Kolasib-a sorkar function pakhat, Fast Track Court building lungphum phumna lamah a inlan a. Chu mai chu ni lovin Kolasib ah hian Minister Pu K Lalrinliana inah chaw a ei an ti bawk a, hei hi politics lam thil ni lovin hnam thilah zawk hian ngaimawh a ṭul hle a ni.
Assam leh Mizoram hi hman ni lawkah khan ramri thilah kan inkap tawh tih kan la hre ṭheuh ang chu. Kha inkahna thlen hnu pawh khan Assam ram hnaiah hian Vairengte mi leh sa tam tak an feh ngam lova. A khat tawkin harsatna a la awm reng tih hretu kan nih lai hian, Assam pawhin smuggler nia an sawi leh an man tawh kha Mizoram Minister inah langsar taka ṭhu chhuakin chaw a ei tih hi MZP leh MSU lam hian eng angin nge an ngaih le?
MZP leh MSU kan tihte pawh hi tun hmaa zirlai ang kha chuan an huaisen tawh lova, zirlai movement pawh awm thei tawh lovin zirlai hruaina an kal san rualin political party chhungah an hruaitu an lut zui zel a. Zirlai ni tawh chiah lova zirlai pawl hruai chunga political career siamna ang maiah kan pawl te hi a chhuak zo dawn a nih chuan Mizoram chhungah hian smuggler an zalen ang a. Chutiang a nih chuan hnam dang pawh an zalen zel ang pawisa an neih chhung chu.
Hman deuvah khan Champhai District chhunga kuhva tawlh run pui lai khan Champhai MZP leh Aizawl lam MZP hruaitute pawh thu a inbat an tih te kha titi satliah anga ngaih kha tun hnua kan zirlai pawl ngawih chawih tak dan en hi chuan chhui chian leh hnuhnawh a chakawm. Ram hruaitu langsar zingah hian ualau taka kuhva smuggling do ngam pawh awm lovin 'mit kan siai' tihte an sawi zah tawh loh hi chuan Minister ina smuggler chaw ei hi a mak lo tawh tlat a ni.
A enga pawh chu lo ni se, kan Minister zinga kan chhuanvawr ve berte ina smuggler chaw ei thlalak kan hmuh hian Zoram ṭhalai rilru a na a ni. Chu chu politics zawng ni lovin hnam thilah a him lova, politics ni lovin hnam ang hian Assam vai hian min zuam ta mah mah lo maw? tih hi kan zawhna chu a ni.
- R.Lalrinsanga