Thuhriltu ropui Rev. Dr. Vanlalnghaka kum 77-na ‘Festschrift' lehkhabu

Hmanni October 11, 2017 khan Rev. Dr. Vanlalnghaka puala lehkhabu kan buatsaih 'Thuhriltu Ropui: Rev. Dr. Vanlalnghaka Kum 77-na Festschrift' tih chu Synod Conference Centre-ah Rev. Dr. H. Vanlalauva’n a tlangzarh a. He ni hi Pu Nghaka birthday a lo ni kher bawk nen a ‘special’ hle. A buatsaihtute (Rochamliana, Mission Veng nen) kan lawm takzet a, Pathian kaihhruaina hlu tak a ni tih ka hria a ni.

Editor ‘thawk rim, buai leh hah zawk’ Pu Rochamliana chungah lawmthu ka sawi bawk a. A thiamna leh tawn hriat hmachhuana he lehkhabu hi buatsaih a ni a, ani hi awm lo se chuan he lehkhabu hi chhuah ngaihna a awm lo a ni ber e. Kei phei chuan he lehkhabu hi ka la hmu lo a, a ni hian ‘thuhmahruai’-ah eng eng nge a ziah pawh ka la hre miah lo!

Hetiang lehkhabu hi Pu Nghaka hian a phu hle a ni tih kan hre tlangin ka ring. Tuna mi hi mithiam zawkte cho chhuaktu ni se ka duh takzet a ni. Pu Nghaka rawngbawlna leh a nihna tam tak kan la khawrh chhuah loh a awm tih a lang reng mai a. He kan kut chhuak ve hi chu a bulṭanna chauh lo ni rawh se.

A tirah chuan lehkhabu phek 150-200 vela chhah kan mitthla chauh a. Ṭhen 1-naah amah Pu Nghaka chanchin ziah nisela, ṭhen 2-naah a lo sawi uar ṭhin thupui 5 thlang chhuakin article ṭha tak tak, mithiam hrang hrang ziah dah ni bawk sela, kan ti a. Heng bakah hian thlalak ṭhenkhat leh Pu Nghaka chungchang comment ṭhenkhat telh bawk turah kan inngai a. Amaherawhchu, amah Pu Nghaka chanchin ziak duh hi rin ai daihin an lo ṭhahnem a, phek hnih khat awh tura kan ngaih kha a bu-a hlawm lian ber a lo ni ta mai a. A lehkhabu pawh phek 450 dawna chhah a ni ta mai a. Heng zawng zawng hi Pu Nghaka ropuizia tilangtu a ni zel mai awm e. Thuziak rawn thawhtu zawng zawng chungah lawmthu kan sawi.

He lehkhabu Editor te hi Pu Nghaka chanchin hre ber kan ni hauh lo va, a rawngbawlnaa zui nasatu ber pawh kan ni lem lo. Amaherawhchu, kan hriat chinah hian chawimawi a phu a, a chhuanawm a, a rawngbawlna leh a nihna hi ṭhang leh thar zel turte tan ziaka dah tlak hliah hliah a ni tih kan hre thung. A chanchin hre chiang zawkten min lo phur pui viau hi kan lawm takzet a ni. Mizote hian mi ropui chhuan tur kan nei a nih chuan Rev. Dr. Vanlalnghaka aia hming lam hmasak tur a awm chuang awm lo ve.

Manipura piang leh seilian ka ni a, Pu Nghaka chanchin hi rual ûte’n an sawi ka hre fo a. Ka hriat ṭhin dan chu, ‘tlangval hmel ṭha, lehkha thiam tâwp, tû tluk rual loh, sap ho tluka sapṭawng thiam, Evangelist ropui, Pathian hmangaihtu leh Ama rawngbawlna atana inpe pumhlum,’ tih hi a ni. Sapṭawnga ‘mystical figure’ an tih ang deuh hi a ni hial awm e. A thusawi cassette ka hmuh apiang ka ngaithla ṭhin a, Pathian thu hriatna kawngah leh A tana inpekna kawngah min pui nasa hle ṭhin.

He lehkhabu kan buatsaihna kawngah hian a nihna tam tak ka hriat belh a, amah ka ngaihsanna pawh a tizual hle. Mimal ngaihsanna mai piah lamah ṭhangthar, Pathian rawngbawl mek leh rawngbawl zel turte tana entawn tlak leh zir tlak tam tak min hnutchhiah nghalin ka hria. Tlem han tilang lawk ila -

1. A rawngbawl tawhna reng rengah hian Kohhran hruaitute leh mipuite zingah ‘kâr’ a la awm ngai lo. Pastor ka nih vena aṭangin sawi ta ila, hei hi tunlaia kan mamawh berte zinga mi a ni awm e. Thuhriltu ṭhenkhat kan han ruai a, ‘kâr’ min hnutchhiah sak hi a hrehawm ṭhin.

2. Kohhran aiin a inngai lian ngai miah lo. Kohhran piah lama ho hran neih tum chuan che sela a ti thei pawl tak a ni mai awm e. Amaherawhchu, vawiin thlengin kohhranah a intulut thiam em em reng a, kohhran a zah a, kohhran thuneihna a cho ngai lo.

3. Bible thu aia ‘thlarau’ thusawi a tum ngai miah lo. Tunlaiah ‘thlarau’ thil kan sawi dan leh beisei dan te bihchian a hun ta hle mai. Bible piah lama ‘Pathian Thu’ dawng thei te, ‘thuchah tharte’ kan tui pui chawk. Pu Nghaka erawh chuan Bible thuchah aia thu ropui sawi a tum lo va, a sawi ngai lo bawk a ni. Bible thu duh tawk mai hi a tawk tih amahah hian a chiang a ni.

4. Mite aia ‘thlarau’ chan san a khel ngai lo. Heti khawpa Pathianin a hmang nasa chung hian mite aia ‘thlarau’ dinhmun sanga inngaihna a nei ngai lo a. ‘Varpawh’ bik emaw, ‘thleng sang bik’ emaw, ‘chang sang bik’ emaw nih a khel ngai lo. Pathianin a khawngaihnain a tuam hlawm a, Chanchin Ṭha hril turin a ko a, rinawm takin chutah chuan a ding mai a ni.

5. Mahni in hai vur tumin hma a la ngai lo. Heti zawng hian che dawn se ‘chance’ nei ṭha ber te zinga mi a ni awm e. Mahse, mahni inphatin Pathian duh dan zawk a hmu thiam tlat ṭhin.

6. Hnam dang zingah Mizote a chhuang thiam. Kan tlakbalna lai leh ṭhuanawpna lai te midang zingah a sawi ngai lo a, kan chhuanawmna lai a phawrh thiam hle. Hnam changkang zawka kan ngaih Sap ho pawh a ngaisang ‘ûchuak’ ngai lo a ni ber.

A lehlam zawnga sawi chuan Pu Nghaka hian Mizo kohhrante chungah lawmthu sawi a ba ve niin ka hria. Sap rama an rawngbawlna, a sermon an ngaihthlak nin hleih theih lohchu ‘Mizo kohhran te chanchin’ a ni a. Kankohhran nun, Isua Krista kan hmangaih dan, thlarau an vei dan, thilpek kan pek dan chi hrang hrang hi Sap ho tan a ngaihnawm tawp a lo ni a. Chutiang thu sawi tur petu chu Mizo kohhrante hi kan ni tlat a ni. Hei chauh lo pawh hi a tam...

Tichuan, hei hi ka’n rawt teh ang. England-a thuhriltu hmingthang Mizoten ‘Spurgeon Sap’ an tih Charles Spurgeon kha tun thlengin ‘Prince of Preachers’ tiin an sawi ṭhin a, tunlaia America rama Pastor lar tak Max Lucado hi mi pakhatin ‘The Best Preacher in America,’ a tih ka hre tawh a. Keini pawh hian Rev. Dr. Vanlalnghaka hi ‘khawvela thu sawi thiam ber’ tiin i sawi ve ṭhin tawh ang u.

Khawvel huapa thuhriltu ropui tak tak thusawik a lo ngaihthlak ve nual tawhna aṭangin he nihna hi Pu Nghaka hian phuin ka hriat mai bakah hetianga chhal ngam Zofaten kan nei hi a nuam ka ti a, ka chhuang hle a ni.

- Ramengliana