Pastor leh Ui

Hman kum deuh aṭang khan ran vulhte ṭha zawka enkawl leh hmangaih (?) kawngah Mizo zinga tam tak an harh thar a, tunah chuan ran vulhte pawhin duat an hlawh ta hle. Thil lawmawm lam a ni a; kan ran vulhte hi i duat zual zel ang u. Chutiangin, an êkte pawh vantlang tana hnawk leh hmuh hrehawm a nih loh nan thiarin senghawi zel ila a ṭha hle ang.

Kum 10 chuang hret liam ta khan ui kan vulh ve ṭhin a, kan phâk tâwkah kan duat ve hle. A neitute pawh min ngainá a, keini pawhin kan ngaina bawk. Kan uite kha an fel a, mi an seh ngai lo a, an tina ngai lo. Mahse, mi bauh an peih ve phian a, rawn lêng lut turte hi an hriat phawt chuan an bauh deuh zel. Chutiang hunah chuan a neitute'n a hlauhawm loh, tiin rawn léng lut turte hrilh ṭhin mah ila, kan ui mizia hre lo ta na nâ nã chu, an ṭih viau zel tho mai.

Tun hnu, ui kan neih tâk loh hnu hian kan ui, zaidam kan tih leh mi tina ngai lo kan tih kha a hre ngai lote'n an hlau ṭhin kha ka hrethiam ta hle. An mizia la hre ngai lo tan chuan hlauh kha a lo âwm hle a ni. Kei ngei pawh hi, mi ui chu a hlau hlei hlei ka lo ni ve ta. Lehkha sem ve zauh zauh cháng ka nei a, chutiangah chuan 'Beware of Dog' lo intàrna inah chuan ka lut châk lo tlangpui a, luh loh phahna in pawh ka nei nual tawh âwm e.

Ui vulhtute hian hei hi i hria ang u: Kan ui, kan duat em em, zaidam, mi seh ngai lo leh tina ngai lo hi a neitu ni lo, mi dang, a hre ngai lo tan chuan a hlauhawm a, mi an seh mai a hlauhthawnawm tho tho tih hi.

Ui vulh kan intihhmuh zel a, hmanlai deuha Mizote'n ina a awmtir ve mai mai, chaw pawh a hranpaa an pek em em loh zawhte pawh tunah chuan duat taka vulha enkawl an tam ta. Pastor/ minister zingah pawh vulh mek an awm nual niin a lang. Kohhrana kan rawngbawltu pawimawh pastor/ minister-te'n ui an vulh ve ta fur hi lawm tur nge lawm loh tur hriatthiam a har hle mai!

Kum hnih vel kal ta khan Aizawla veng pakhata pastor chuan ui lian fê mai an nei a, pastor quarters kawtah a bawk rùn mai ṭhin a. Ui chu a lian bawk si a, chu venga nu leh pa ṭhenkhat chuan an ngaimawh thu te, pastor ina lèn luh a châkawm loh phah thute an sawi ka hre tawh. Tunah hian Mission Veng lama Synod hruaitu ṭhenkhatin ui an vulh mek a, ṭhenkhat phei chuan bauh an peih hle. Chu'ng Synod hruaitute in (quarters)-ah chuan thil pawimawhah pawh kal a châkawm loh phah viau tih an sawi ka hre tawh bawk.

Pastor-te hi rawngbawltu pawimawh, Pathian thua kohhran mipui châwmtu leh kaihruaitu, kohhran mipuiin an nêl leh an harsatnate pawh an thlen ngamna ni turah kan lo ngai ṭhin a. Mihring mizia avangin miin an nèl har bikte chu awm thei teh meuh mah se, insiamṭhat theih a ni a. Chumi piah lama mipuiin anmahni an hnaih theihna dâltu insiam chawp erawh chu fel lo hle.

Kan pastor/ minister-te zinga ui vulh/ neite hian an vulh chhan hi an fate vang pawh a ni mai thei a, an fate zingah ui ngaina em em pawh an awm thei. Mahse, pastor fate hian pastor fa an nih angin tih âwm leh tih âwm lohte pawh an hriat a ngai ve zel a; an pate rawngbawlna tiṭhuanawptu, mipuiin an tlawh hreh phahna an nih loh theih hrâm a ṭha awm e.

Ui hi han vulh tâkah chuan kan ngaina tlangpui a, mi aia ngaina zawk hlea inngaihte pawh a awm thei. Keini pawh, kan vulh lai chuan kan ngainá a, tihral pawh kan duh mai lo a, kan hreh hle. Mahse, han vulh loh tâkah chuan, a lo awm theih viau mai. Chuvangin, kohhrana rawngbawltu pawimawh, kan pastor/ minister-te hi chuan ui vulh lo ngam se a ṭha zawk âwm mang e; mi tam takin anmahni tlawh an hreh phah tlat avangin.

- K Zoramchhana