Lirthei indin chhawkin awmzia a nei

Mizoram sorkarin kumin October 1 aṭanga lirthei zawng zawng (a bika phal­sak tih loh chu) indin chhawk/ intlan­chhawk a kalpui chuan awmzia a nei rih hle a, a bikin city bus, taxi leh two wheelers taxi ten an hlawkpui. Mipui mimir tan pawh harsatna tam tak pumpelh a nih rin a ni.

Mizoram khawpui zim te-ah lirthei a pung chak em em a, kawngpui lah zauh ngaihna awm lo khawpin a thei thei fate'n kawngpui hlat derh dawrhah in an sa mang si lo a, chep em emin kan khawpui laitualah kan leng ve chu a ni si a. Traffic jam nasa lutuk tih ziaawm nan traffic management coordination commi­ttee chuan beng sika a ngaihtuah hnu­ah ni (date) mila in­dinchhawk a ruahman ta a ni.

Lirthei intlan­chhawk hian sorkar motor emaw, police uniform ha satliah emaw a huam bik lo a, rualkhai takin thil kalpui a ni hi a ṭha ngawt mai. Lirthei indinchhawk hian a huam lohte chu Governor, CM leh Speaker-te an ni a, anmahni pilot leh vengtu (carcade) a huam lo a, mipuiin kan nitin kan ma­mawh em em city bus, bazar, taxi (taxi hi intlanchhawk lai an nih anga intlanchhawk zel chungin), two wheelers taxi bakah MJA member-te (anmahni MJA sticker bel), chanchinbu leh bawnghnute sem, tui sem te a huam lo.

Heng bakah hian police motor duty, excise & narcotics motor, damdawiina duty, ambulance leh mitthi phur motor, PHE emergency duty, AMC bawlhhlawh paih motor, executive magistrate, law & order duty, zirna in tana lirthei (bus) hmang te, para military force leh department lehkha sem kual lirthei (despatch rider) te a huam lo bawk.

Hetianga rua­hmanna felfai tak siam a nih vang hian mipui mimir hian kan sawisel lo khawp mai. Lirthei ding ve lo tura an tih pawh hi a awm kan tihpui niin a lang. Taxi neitu leh khalhtute bakah city bus neitute aṭang pawh sawisel a awm meuh lo.

Indinchhawk an tih hma aiin traffic a jam nep avangin an tan pawh a hlawk fe zawk a, a ruahmantute lakah lawmthu sawi mawlh mawlh awma mawi a ni.

Hetihlai hian lir­thei a pung zel dawn a, kawng lahin zauh lam a pan dawn der lo tih a chiang. Kum hnih khat a liam leh hunah phei chuan indinchhawk/ intlanchhawk hi hei aia sawr zim fe chu a ngai ngei dawn a nih hmel. Chu mi hunah chuan lirthei zawng zawng, tuna phalsak bak hi number kawp kim leh kawp kim lo hi nitin intlanchhawk a ṭul hun a la thlen hmel khawp mai. Kan hmabak a la ni dawn tih a lang reng. Chumi hunah pawh thuawih dial dial a la ngai dawn a ni.

- Lalthanmawia