FATE TANA HUN PEK

Tunlai khawvelah mi ka buai a, thingtlang lamah nitin lo hna thawkin emaw, huanah emaw nu leh pa kan feh a lo ngai a. Khawpui lamah pawh nu leh pa hnathawka chhuak a fate awp lum hman lo kan tam hle. Hei hi kan duh vang reng ni lova khawvel changkannain a thlen pawh a ni thei. Chutih rual erawh chuan kan fate tana hun kan nei lo lutuk hian kan fate nun a tichhia em tih hi zawhna pawimawh tak a ni ta.

Mizoramah tun hnaiah ruihhlo a lar zual em em a, naupang kum tling lo chenin an fihlim ta lo ni tein a lang ta. Hetiang zela kan ram hi a kal chho a nih chuan kan hmabak chu a duhawm lo hle ang.

Tlangval pakhat thubuai nei chuan roreltu hmaah ti hian a sawi a, "Ka pa hnenah chuan ka harsatna te, ṭanpui ka ngaihnate ka thlen ṭhin a. Kapa chuan ka buai em mai hun ka nei lo, tiin min chhang ṭhin” a ti a ni. Chu chuan chu tlangval chu sual lamah hruai lutin a nun chu bawraw takin ruihhlo nen a lo hmang ta a, thubuai rip tak a awrh phah ta a ni.

Nula tlangval tam tak, nu leh pa nei si, chhungkaw awmzia hre lo an tam hle mai. Thiamna leh changkanna duhin kan fate phai lamah te an naupan lai aṭangin kan thawn bo a, school kan luhtir a, tha taka lo chhuak an awm laiin, tam tak chuan an nun an hloh a ni. Chhungkaw awmzia pawh hre lovin Pathian awm ring lo hialah te pawh an lo chhuak ta nawk mai.

Fate tana kan pek theih hlu ber chu sum te, incheina leh ei tur emaw, ro hlu emaw ni lovin, kan hun kan pek hi a ni. Naupang tan nu leh pa ang chhunga awm tluka an himna hi a awm lo. Nu leh pa hnathawka kan chhuah a ngaih ṭhin avangin naupangte chu midangin an lo enkawl a. Enkawltu ṭha tak an nih loh phei chuan engnge an zir chhuah tak ang?

Lalpa laka kan rochan a lawmman min pek hlu tak fanaute ṭha taka enkawl hi Pathian laka kan mawh­phurhna a ni. Khawvelah hian politics emaw, kohhran leh khawtlangte bul lo ṭanna chu chhungkua a nih tlat avangin, chhungkaw ṭha leh nuam siam hi nu leh pate tih makmawh a ni.

Kan faten kan chhungkua nuam an tih lova, an him/ hlim lo a nih chuan khawiah nge an kal tak ang? Engnge an hmabak ni ta ang le? Tunlaia ṭhalai zingah khawlaia riak mai mai leh, mahni inah pawh haw ngam tawh lo hi tam tak an awm a ni. Lockdown laite khan chhungkaw tam tak chuan in pumkhatna an neih phah hial a nih kha. Kan fate hi kan chhungkuaah him se la, nuam ti rawh se. Kan fate chu ṭhianah kan siam a, an harsatnate, ṭanpui an ngaihnaah te kan ṭanpui a, an aw kan ngaihthlak sak fo hi a pawimawh takzet mai. Ṭhalai mahni intihlum te hi an va tam ta em? tu mawh nge ni ang?

Nupa inṭhenna tam ta lutuk te hi ngaimawh tham a ni tawh. Ropui tak leh senso hautak thei ang ber berin kan innei a, reiloteah hote in kan inṭhen leh mai a. Naupangte enkawltu mumal nei lovin an lo seilian a, chu chuan nun beidawnnaah a hruai ta ṭhin a ni. Kal ngaihna hre lovin mahni intihhlum mai duhna te, sual kawng thui tak zawh duhnate an lo neih phah ṭhin. Hei hian kan ram chu nau chhiatna ramah min hruailut mek a ni. Tunlaiah HIV natnate a pung nasa a, ruihhlo a hluar lehzual bawk. Kan ram mipui tlemte hi kan ral mai ang tih hlauhawm khawpin chhiatna hian min hmuak mek a ni. Camping te, crusade te kan han ti leh ngawt ṭhin a, a sawt viau bawk laiin, a bilha tho lo chu siamṭhat a har tawh tlat a ni.

Nu leh pa tam tak hian kan fate aw hi kan ngaithla duh lova. An harsatna te, ṭanpui an ngaihnate ngaihthahin sum umin kan hnaah kan buai a, kan fate nun chu boralna lamah a hruai ṭhin. Kohhrana inhman te, khawtlanga inhmante leh hnathawhte pawh hi a ṭha vek e. Chutih rual erawh chuan kan fate tana hun kan insiam a, an aw kan ngaihthlak ṭhin a pawimawh hle bawk mai.

Kan faten an harsatna an sawi ngam loh khawpa fate pawh theih loh nu leh pa kan ni em? tih te hi inenlet nachang kan hriat a hun tawh mang e. Kan ro hlu ber chu in leh lo emaw, sum leh pai leh bungrua a ni lo; kan fate hi kan ro hlu ber chu an ni. A pawimawh ber chu nu leh pate hian chhungkaw nuam leh ṭha siam a, chhungkuaah Pathian Lal tir ber hi a ni.

- Reuben Lalnunthara Hnamte