Ṭamdil Boatman bân leh RV camping inanna

September 28, 2022-a Tourism Department-in a eizawnna an tihtawp sak tâk, K Lalrohlua an bân chhan leh thil awm dan hi ngun takin ka phak tawkin ka lo zir ve a, Ramgvamuala camping siam hmanga Zoram sual tlen fai tum nen hian thil thuhmun ang vêl a ni a, a sual zawk bitum lovin an ngam zawng zawng zingah a bîk takin Zu rim nam sual bitum na a ni a. Thil pawnlang leh zahpuiawm a ni, tiin bul i han ṭan hmiah mai teh ang.

Pu Rohlua kha Boatman a ni a, lawng enkawltu tur a ni. Lawng enkawl loa Tourist Lodge a enkawl kha Tourism Department thiam loh a ni hmasa nghal phawt mai a, chowkidar atan Boatman an va chhawr daih a ni. An bân chhan kha Vai khualzin Nilanjan-a Twitter lama thil tarlan vang a ni mai bawk a. Sorkar ve riang ruang si hian Vai pakhat social media lama thil lo lang hi rintlakah a ngaiin thutlukna lian tak a siam mai a nih chuan in enfiah a mamawh hle a ni.

Vaipa hian a ziak dik nge a ziak dik lo tih pawh a finfiah si lova, he mi ni veka Ṭamdila kal ve Vai pakhat chuan a ruih loh thu a post ve thung lehnghal a. Tichuan khawi zawk hi nge rin tur ni ta ang le? tih hi zawhna chu a ni.

Ṭamdila Tourist Lodge darthlalang a keh a, mutbu a chhia a, thosilen pawh a ṭet a. A hmun hma pawh a changtlung lo tih hi Vaip tarlan a ni. Boaan thiam loh nge Department lam thiam loh zawk ni ang le?

Tourism Department hnuaia hna hrang hrang Tourist Lodge leh building dang sak hna te, kut (Festival) hrang hrang an siamna sum leh pai te, sound system hawh man etc hi a dik chiah maw? A tawpah chuan sual rim nei 'Zu Rui' nia an puh Boatman chiah an bân a, Tourism Department chu thianghlim ta em emin kan haih phah ta em ni? Hnai lo e le. Tourism Department chu a la ngai reng a, an ngam zawng Boatman chungah an ṭuan ta mai zawk a ni.

Ramgvamualah hian rui ṭhin an pung khawm a, sum rui ṭhin ni lo zu leh ruihhlo rui ṭhin an ni. Hengho hi chu an sualna lo a langsar a, an mualpho pui hma bîk a, an sual ang ang hian an lang chhuak mai a ni.

Mizoramah hian sualna langsar lo zawk kan ramin a chhiat pui em em si a awm tam lutuk. Chu chu corrup­tion, contract hralh, mi hminga hna thawh, statistics dik lo hmanga project siama hna hmuh, Vai firm hminga hna neih, hna kian thama ei lo neih leh a dang te a ni a, heng ho hi kan sim hma chu RV eng ang pawh ni ila eng ruai kan ni lovang.

Tourism Department siam ṭhat tum si lova Boatman zu ruia puh hrem hmanga thianghlim kan tum ang hian, kan rama sum duhna uchuak laka tal chhuah tum lova Zu khapna dan siamtuten Zu hmun tia chhal ngam a awm chunga an ngaimawh loh RV hmanga sual thenfai tum hian awmzia a nei thui lovang.

Zu rui chiah kan ngam a, sum kan rui lawi si a nih hi he ram hi.

- Michael L Ralte