ZIDCO HI TUTE SAWP CHHIAT NGE?

Zoram Industrial Development Corporation Ltd. (ZIDCO) ni 27 February, 1978 a din hi Company Act hnuaia No. 1732 of 1977-78 a MSIDC hming pu in a in ziaklut a, a hnu deuhah ZIDCO tih a lo ni ta a ni. Mizorama Industry a lo hlawhtlin theih nana din chu tun dinhmunah chuan mipui a bik takin ṭhangthar entrepreneur-te tan belh leh tur chuang a awm ta miah lo a. Chu bakah sawrkar tan phurrit tak a lo ni ta tih a lanna chu hmanni lawka kan CM Delhi zinin Prime Minister a zuk kawm khan ZIDCO-in HUDCO aṭanga a loan puk Rs. 18 crore chuang rulh sak tura a ngen thu chanchinthara kan lo hmuh khan a ti chiang hle mai.

Hei mai a la ni lo ZIDCO hian Central Sawrkar hnuaia National Minority Development Finance Corporation Ltd. (NMDFC) scheme ah Rs.13 crores vel an la ba bawk niin an sawi a. Prime Minister hian kan CM hi lo duhsak dawn viau pawh nise mimal loan lak rulh duh loh ngaihdam ringawt hi a kawng hmang loin a ngam mai a rinawm lo viau bawk. A dil ang hian phalsak dawn ta pawh ni se state dangten an thik theih dawn bakah loan la mekte rilru ti khaw lo thei thil a ni tlat.

Prime Minister khan kan CM hnenah “ in homework ṭha taka tiin loan la a rul leh duh si lote kha lo ṭhing na hle rawh u” a lo ti zawk tur ni awm tak a ni. Hetia han ngaihtuah mai pawh hian ram rethei Mizoram leh sum lama harsa tak hian Central lamah mamawh thlen tur pawimawh dang tam tak a ngah tehlul nen, mimal loan rul ṭha duh lote laka hma la ṭha duh si lova, rulh han dil sak hi chu ram hmingchhiatna a ni tih hriat ve awm tak a ni.

Ram hmasawn nan Bank leh Financial Institution te ṭangkaizia chu ram changkang a piangah hian kan hmu tam awm e. Kan rama Financial Institution kan neih chhun ZIDCO erawh midang puih chu sawi loh Sawrkar tana phurrit an ni ta ber zawk a. Sanction post 79 ah thawktu 35 an awm mek a, tun Sawrkarah phei chuan Financial Institution zahawmna leh nih phung bo ṭhakin Food & Civil Supply department-ah mimalin an thawh awm tawk (e.g Abub Mazumdar te anga buhfai supply) buhfai supplier-ah an chhuah ta daih mai a nih hi! Project finance leh management thiam tura ngaih ZIDCO chu retailer lianpui ah an chhuah a ni ta ber a, hetiang hi khawvel hmun dangah awm ve tak ang maw?

RTI chhanna aṭanga a lan danin loan lamah hlawkna a hmuh loh avangin Infrastructure works lamah kal tuma hma lain tunah chuan a hming pawh, Zoram Industrial Development Corporation Ltd. aṭangin Infrastructure belhin Zoram Infrastructure and Industrial Development Corporation Ltd. tih a lo ni ta a. Amaherawhchu, hmasawnna ruhrel (Infrastructure) project khawih turin mithiam leh Engineer an lak belh thei rih lo chu a nih hmel.

Financial Institution hna hi ZIDCO hna bulpui ber ni turin Reserve Bank of India hian company na zawng a pek phal loh laiin ZIDCO hi Non Banking Financial Company (NBFC) License hlu tak a pe a. Chutih laia Construction company (contrac­tor) tura ZIDCO kalphung lo thlak ngawt pawh hi a rem hriat loh thlakin RBI pawh hian a phalsak ang em tih ngaihtuah tham tak a ni.

Tuten nge ZIDCO sawp chhia?

Kum 1978 a din tirh aṭang khan ZIDCO hian Chairman 17 zet a nei tawh. Kum 1978 aṭanga 1994 chhung khan Chief Secretary-ten Chairman niin an enkawl a, a karlakah Minister/MLA ten rei lo te an Chairman ve zawk chauh a ni. Tichuan, kum 1994 aṭang khan ruling MLA Chairman na hnuaiah ZIDCO hi enkawl a lo ni ta ber a, chhiat lam a pan chak ta hle a ni. Kum 1994 aṭanga ZIDCO Chairman te chu :

4.05.1994 - 8.12.1998 : John Rotluangliana MLA

10.02.1999 - 25.07.2000 : Lalchamliana MLA

25.07.2000 - 7.03.2004 : Dr. Lalzama MLA

8.03.2004- 7.11.2008 : Lalthlengliana MLA.

5.01.2009 - 27.11.2018 : Lalrobiaka MLA.

6.02.20019 - to date Lalthlengliana Ex-MLA te hi Chairman an ni.

Tuna Chairman phei chu MLA ni lovin Ex-MLA a ni nghe nghe.

ZIDCO hian Managing Director, General Manager leh mithiam pui pui a nei tawh ṭhin a, Chairman te erawh politician (political appointee) an nih tak deuh zelah hian ZIDCO kalphung hi han ṭhat vak ngaihna a awm hlawl lo a ni. Tunah phei chuan Sawrkar hian a ngaihthahzia lanna chu ZIDCO Managing Director post hi Commerce & Industry Department Director MCS in zuk han chelh kawp a! India leh Khawvel hmun dangah hian BANK leh Financial Institution (FI) ah te hi chuan Finance, Project Management thiamte leh Economist te deuh chauhin an hoin Chairman emaw Chairman cum Managing Director (CMD) an ni tlangpui ṭhin a. Tin, Politician an lo ni a nih pawhin tling lo chunga party mi leh chhungkhat laina induhsak nan an hmang lo khawp mai, a chhan chu an hnapui ber chu Industry te hmasawn zelna tura loan pek a ni miau a, rul ṭha leh thei lo tur chu induhsak vak an ngam ṭhin lo. ZIDCO Chairman hlui pakhat chuan uisa hmeh tura chaw eia sawmtu chu Taxi loan a pe nia sawi tur a awm an ti a, hei hi entirna pakhat chauh a ni a, heng bakah Chairman lo ni tawhte hian Sawrkar department ang maia enkawlin hnaruak awm lo chungin rem leh rem loin an duhsak zawng dah luh/hnimphum an ching hle niin an sawi bawk. Politics avanga dik lo taka induhsakna nasa lutuk ṭhin kha ZIDCO tlak chhiatna bul chu a ni pakhat a, ZIDCO hian loan rulh ṭhat loh Non Performing Asset (NPA) a neih zat hi a puangzar ṭha duh lo hle, RTI-a zawh nawn leh a ngai hial a, an insawi dan chuan loan rulh ṭhat lohho hi dahkham (security)a ṭhat tho avangin sum endiktu (Auditor) report ah NPA hi tarlang duh loin an sum dinhmun tarlanna Balance Sheet-a ZIDCO hmai balh (negative) loh nan an thup/zep ṭhin a ni ber mai. Hei hi thil ṭha lo tak a ni a, Reserve Bank of India (RBI) Guidelines an zawm loh chungchang hi RTI hmanga hriat chhuah chauh a ni. Hetiang thilah hian ZIDCO hian tu mah an bum lo va, anmahni an inbumna zawk a ni a, dinhmun chhe tak thup tumna mai a ni. Tun dinhmunah ZIDCO ah hian loan rul ṭhat loh Non Performing Asset (NPA) Rs.9.33 Crores a awm mek a, Industrial unit 747 laiin an rul ṭha duh lo niin RTI chhanna aṭangin a lang a, turu tak a ni. RTI chhanna aṭanga a lan danin tuna ZIDCO Chairman hian thla tin Rs. 8000/- hlawhin Car leh driver, POL tumsak niin ZIDCO hmasawnna tur hi a ngaihtuah em? tih hi zawhna lian tak a ni. Ani hi ruling party MNF General Headquarter Vice President a ni a, CM nen inhnai tak a nih hmel a, Prime Minister hnena HUDCO loan ba Rs.18 Crores ngaidam tura CM-in a ngen pawh kha ZIDCO Chairman hmalakna a nih ngei a rinawm. Hei bak hi chu ZIDCO Chairman hmalakna tun kum 4 chhung hian mipui hriat tur a awm lo hle a ni. Tun kum 30 chhunga Sawrkar lai Chairman te khan hmasawnna tur an dap lo niin a lang. A awmzia ber chu ZIDCO hi bul ṭan nan kum 1978 khan sum Paid up Capital ( Corpus Fund) Rs. 15.78 Crores kha tih hun laia sum tam tham tak mai chu pek niin, chu chu Industry (Entrepreneurs) hmasawnna atan loan pea peipungin ṭhangthar Entrepreneurs lo awm zel turte tan chhenfakawm taka ding zel tura beisei a nih laiin, kan Politician ten hmathlir nei miah loin mahni hmasial nana hmangin an sawp chhe vek a ni ber e. Tun dinhmunah chuan an sum peipun tur loan pek chhuah tur an nei lo va, an hul hak a ni. Bul ṭanna tur sum (Paid up Capital) Rs. 15.78 Crores kha ZIDCO khan khawih ta lo se, Bank emaw Financial Institution ah te peipung (invest) ta se tunah chuan a pung nen chuan a va han tam tawh dawn tak em. Chutiang ni lovin thiltitheiten an ei zo vek a nih tak ber hi maw.

ZIDCO IN A HOMEWORK A TI ṬHA LO
RTI chhanna aṭanga lang pakhat chu ZIDCO hian a homework ti tha lo hle, Legal lamah an chak tawk lo niin a lang a, kum 1986- 2015 khan Legal Division hi dan hre mi in a ho ve thin niin a lang a, a hnu lamah General Manager ten Legal Division an enkawl ta mai mai niin a lang. Bank/FI ten loan an pek in loan document fel leh him takin loan latute nen an ziak thin a, hun tiam chhunga an rulh that duh loh chuan an thing a, a tul dan a zirin Law Court leh adangahte an khing thin a, loan rul tha lo deuh ten an dahkham (Security) te chu chhuhsakin an lilam fo thin tih chanchinbu ah te kan hmuh fo thin a ni. ZIDCO erawh dahkham laksak (recovery drive) lamah hma an la na tawk lo hle tih a hriat theih a, heti ringawt mai chu a nih phung tur a ni lo, loan rulh lo a awm te hi public money (mipui sum) a nih angin hmuh let tumin thapui an chhuah ngei ngei tur a ni. Mizoram Sawrkar Corporation an nih avang hian loan la tuten loan hi rul tha lo mahse kumtin Mizoram Sawrkar in thawktu hlawh leh senso tur Rs. 380 lakhs vel a pe ziah thova chuvangin thahnem an ngai teh chiam lo in an khauh lo hle a ni ang tih a rin theih. Sawrkar kal tawh leh kal mek Congress leh MNF Sawrkar berin a ngaihna hre lo leh vei berah an neih bawk si loh chuan a thawktute tan chuan hahdam deuh a thawk mang lova hlawh lak reng tho chu a thlakhlelh awm ve thei tho bawk a, ZIDCO hi tun dinhmunah chuan MINECO ah Office building thar changkang leh nuam takah buhfai hralh (supply) bakah sum thawhchhuah nei mang si lovin hau tak ang reng takin sumthuni nu- White Elephant a ni ringawt mai a ni. Thahnemngaihna aw hi Sawrkar hian a hriatthiam a hun tak zet tawh a, chuti ni lova, ZIDCO aia che chhe zawk sawi tur hi a rawn dap kual a nih chuan kan hnaisai lo hle tihna a ni ang.

THANGTHAR ENTREPRENEUR-TE RILRU A NA
“Sawrkar hna ah luh vek theih a ni lo, Mahni kut leh le a din tum tur” ti a fuih tu Sawrkar hian thangthar te ban phak a puitu tur ZIDCO a sawp chhe ta vek hi rilru a na lo thei lo. ZIDCO a tluk chhiat hnuah Mizoram State Entrepreneurs Development Monitoring Committee (MEDMOC) chu Chief Secretary kaihhruaina hnuaiah ni 25.10.2016 khan Mizoram Sawrkar in a lo din ta a, amaherawh chu Financial Institution a ni ve si lova, a pui theih an tam loin, puihna a beitham deuh bawk si a, a huapzau tawk loin ZIDCO ang kha chu a ni bawk si lo. A ngaihna hria bul tan tur a bik takin (Start up) thangthar Entrepreneurs te leh Industry nei mek tih hmasawn tumte tan hian heng Financial Institution- IDBI, SIDBI, ICICI, NEDFi, etc..bakah Bank ho kalphung khirh zia en in engemawchen chu chhawrtu awm ve bawk mahse mipui nawlpui a tam zawk tan chuan zen ve chu huphurh awm tak an ni bawk si a, chuvang chuan ZIDCO sawp chhe tute hi thangthar Entrepreneurs te tan chuan ram leh hnam hmelma an ni ringawt mai a ni. Thangthar Entrepreneurs te beidawng lutuk hian ZIDCO an sawpchhiat dan hi an hriatfiah hun ah chuan heng ZIDCO lo enkawl tawh tute thawktute, Sawrkar a thuneitute leh a bik takin tun kum 30 vel chhunga Chairman (Poltician) te hi hrechhuak tharin an laka thinurna lan tir nan an thlan (Grave) ah chil an la chhak khum duh hialin a rinawm. Nakum 2023 ah hian MLA kan thlang leh dawn a, Political party te pawh hian thangthar Entrepreneurs te an lo dinchhuah ve theih nan a ZIDCO hmantlak a dinthar leh chungchang hi Manifesto a dah ve a tih hlawhtlin ngei tum thei se a duhawm ngawt mai. A tawp ber ah chuan ramhluizia kalsana thangthar lehkhathiam thahnemngai rilru man phak “ Ram hmasawnna duh tak tak a rualawt Sawrkar kan nghakhlel a ni ber e.”

- VL-a, Tuikual South