Raltlante lakah fimkhur a ngai
Tun laiin Mizoram hmun hrang hrangah ruihhlo a hluar tih kan hre ṭheuh ang a. Hei hi kan unau Myanmar aṭanga raltlan Mizorama lo kalte vang a ni e tih chiang chiah lo mah ila, ruihhlo an man zinga tam tak chu anmahni kut aṭanga man a ni tlat mai a.
Chuvangin raltlante hi an fihlim lo a, tin kan ṭhenawm vai Assam aṭanga lo kalte hian hman aṭang tawhin proxyvon hun lai pawhin ruihhlo hi Mizoramah an rawn keng nasa ve bawk a. Heng thil pahnih lakah hian kan fimkhur lehzual a ngai ta.
Thla hnih thum vel liam tawhah khan Kolasib DC chuan thu chhuah siamin Myanmar raltlante khuahkhirhna tur thupek a chhuah a. Village Level Committee on Myanmar Refugee-te chu thupek ṭha taka kengkawh turin a chah a, dan zawm lote chu thuneitute hnena hriattir turin a ngen bawk a ni.
Heng kan unau Myanmar aṭanga raltlante hi an ram dinhmunin a zir loh avangin engkim kalsanin an nunna thapin Mizoramah an lo lut thei hram a ni a. Anniho ṭha taka kan lo dawnsawn hi a Mizoin a Kristian a, chumi piah lamah kan unaute an ni a, Mizoram buai laia min lo humhimtute tho kha an nih ve bawk avangin kan ensan thiang bik lo a ni.
Amaherawhchu, 'raltlan' an ni tih erawh theihnghilh tur a ni lo. India rama rawn tlan mai an ni tih hi hre reng ila, Voter ID leh Aadhaar card lo neihtir emaw Ration card lo siamsak emaw te hi tih miah loh tur a ni. Hetiang document pawimawh neihte hi anni tan a thiang lo a, tin hman sual theihna tam tak a awm bawk a ni.
Chu bakah tunlai thil bo leh ruihhlo hluar ta viauah hian kan unau kan tih mai, Myanmar raltlante hi an fihlim lo ang tih a rin theih a. Eng pawh ni se fimkhur tak chunga an duh ang anga an chet theih loh nan kan lo enkawl an ngai a ni.
Hmun ṭhenkhatah phei chuan Dawr te an siam a, khawtual mite nena labour hna thawh chungchanga insu buai deuh te pawh an awm tih hriat a ni a, hengte avang hian raltlante hi rilru fim takin thiam taka kan enkawl a ngai a ni.
- Vohbika Pu