...a hmui veng ṭha deuh ṭhin se

Chief Minister Pu Lal Thanhawla chu pa ṭawnghmang thiam vak lo, thil a nihna ang anga sawi mai ṭhin, thu buluk deuh pawh phuhchhuak mai zel, vauna aw leh a ṭul huna a naute thlavang pawh na taka hauh hmiah hmiah, ṭawngkam hman tur pawh thlang uluk vak ngai lo a ni tih kan hre ṭheuh mai. Tun ṭum chu nakkum lama Chief Minister ni leh thei mai thei, MNF President Pu Zoramthanga chungchang hi tawi têin ka han ziak ve teh ang.

Vanglaini chanchinbu June ni 16, 2017 daih tawhah khan ka mit la deuhtu a awm a. Chu chu MNF Party-in martar 12-te ruhro an thlah thuah, “Politics khelh nan martarte kan mamawh” tih Pu Zoramthanga sawi kha a ni. Chu lo lehah chuan, MNF President Pu Zoramthanga hian hmanni lawk khan kum 10 an sawrkar (1998-2008) chu ‘aite chhinna’ niin a sawi duh lek tawh bawk a (anmahni press release-ah a lang). June thla tir (4.6.2017) khan Champhai south block lama a thusawiah pawh an sawrkar hunah, an party-a mite chu contract-ah an induhsak bik dawn tih a sawi kan hmu leh bawk.

Pu Zoramthanga hian a thusawi hi a sawhkhâwk (consequent) awm thei tur te a ngaihtuah zui ngai lem lo niin ka hria. September 14, 2017 khan Bawngkawn kawng pengṭhuam ram MNF-in a hralh chungchanga thuthar thehdarhtute a hrilhah chuan kar thar lamah document nen fiah taka press conference a neih tur thu a sawi a (social media-ah a video pawh a darh hle). Mahse, chawlhkar 5 zet a liam leh dawn ta chu a nia! Chuvangin, tun hnai chhova Pu Zoramthanga thusawi te hi tawitein ka thlir ve thuak duh a ni.

Kum 10 aitechhinna!

Ramhnuai aṭanga an lo chhuaha interim sorkar-ah Pu Zoramthanga hi thla 6 chhung Minister a ni. Interim sorkar tawp hnu, 1987 MLA inthlanah Champhai bial aṭanga thlan tlin niiin, Pu Laldenga hoa kum khat leh thla 2 vel an sorkar chhungin department pawimawh tak tak PWD, Finance, Education te enkawlin Minister a ni leh a, an sorkarna a buai a, ‘president rule’-ah kan awm. 1988-ah Champhai bialah thlan nawn leh niin, 1993-ah pawh a tling leh a, 1998-2003-2008 thleng Chief Minister a ni leh bawk.

Kum 22 chhûng MLA ni thei, kum 10 Chief Minister ni thei bawk, sorkar file kal vel dan leh department enkawl nan pawha tawnhriat neihna tham hun hmang tawh a nih laiin - ‘aitechhinna’ a han ti duh hlauh mai hi chu ngeiawm lamah a kal a, thuneih châknaa tuihal (hungry power)-ah a puh loh theih loh. US President te chuan kum 8 ram an kaihhruai tawh chuan an tih theih tâwk an ti vek tawha ngaih an nih dan leh, Pu Zoramthanga ngaihtuahna hi chu a inpersan hle mai. Kum 22 chhung ram rorelna khawlah, dan siam turin mipui ai a awh tawh a, ‘kha kha chu aitechhinna,’ a la ti duh ngat mai hi chu Mizo mipuite thamlohna lian tak a tling takzet zet!

Contract an induhsak bik dawn!

Mi’n ‘huap zo sorkar’ an tih tawh laiin, contract hnaa an party induhsak bikna tur thu hetia, ṭhenawm khawvengte hriata a so pui chiam mai hi a dawn tawi thlak. Kum 27 chhung party president ni thei, kum 20 chuang MLA/ CM ni tawhina a sawiah chuan a sawngnawi hle! Hlemhlêtna leh dan pawisak lohna ram Uganda leh Philippines, North Korea vela sawi awm tawk leka ngaih tur nge, a ṭawngkam hian ‘corruption practise’ duhna lam rawng a kaî lehnghal a!

Central UPA sorkar kan vui liam takah khan eirukna (scam) lianpui pui, Ministry fawng chelhtu leh company lian, foreign mi hausa te nena sorkar sum an chinleh vel dan kan hria a. An mualphozia te, mipuiin an hnawl hnehzia te, Minister te’n jail bang an zut dante pawh a tam mai. Chumi bulṭhut chu an mi duhsak zawngte hnena hleihluak tak, khaw eng pawh zah zo lova contract leh supply, company leh mimal hnena an pek a, party induhsak nana an hman vang kha a ni. Chu kalphung chu ring lo mi te pawhin an hnâwl tawh a nih lai a, mipui hriat tura induhsak bikna tur thu; MNF president-in a lo la tlangaupui lauh lauh mai hi, a pachhiatthlak lam lek lek.

Politics khelh nan Martar-te an mamawh!

Matarte ruhro sengkhawm hnathawh hi tuma’n an sawisel loin a lang. A peih an awm chuan a en liam theih mai zel. Nimahsela, politics khelh nana mamawh nia Pu Zorama a lo la inngai fan fan mai kha a runthlak mang e. Pawl pakhatin lalna leh thuneihna a chan theih nana, hmanraw ‘te-pên’ ang leka hetia an nau (hnam sipai) te an hotupain ‘toys’ ang thawthânga a chhuah fel der mai hi, martar-te martar chhan nen khan a inhamtawng mawlh lo! Martar chhungte pawh an zahawm duh ang a... Pu Zorama hian a thusawi hi a chhut lâwk lo hle niin a lang ṭhin!

Aw le, MNF-a an thuchhuah siamtute hian an pu thusawi an ziah (interpret) dan a dik ṭhin lo nge, tih erawh ngaihtuah tur chu a awm ve tho ang. Tualchhung chanchinbu editorial pakhata inziak ang deuhin, heng, Pu Zoramthanga thusawi te hi anmahni party workers, block conference leh an party office lama a sawi te niin a lang hlawm a. Party mipuite infuih phur nan chuan sawi awm tak tak a nihna chen erawh chu a awm thei tho mai thei. Chutih rualin neutral mipui leh politics-a an râldo te hriat tura press release meuha ziah lan chi loh te an thailan sak ṭhin em ni zawk? Mipui hriat tur chin thliar thiam zir se la. An president hmui hi venpui a ngai a nih hi.

- Lalruatzuala