A veia-te tal kan au loh chuan, Lungte tal pawh an au tur a ni

Hmanniah chanchinbu lama ṭhahnem ngaia ka thu ziah, ram veina lam pang chungchang chu ka ṭhian min ngamtlak tak mai hian, “Heng hi in sawi fova, in ziak kur dup a, keini pawhin kan vei a, mi tam tak hian kan vei ve tho.

Mahse sawi sawi hian awmzia a awm lo tih kan hria a, kan sawi kan sawi ve lo mai alawm” a ti a. A dik angreng viau a ni. Mahse chuta ka chhanna leh ka chhanna ni fo ṭhin tur chu hei hi a ni, “A veia te tal ina kan sawi loh chuan a vei ve miah lo nen eng nge kan danglamna? Hemi chungchang hi vawi za ka ziah a, mi pakhat ka hneh (influence) thei a nih chuan hlawhtlinaah ka ngai tho ang! A veia te pawh a vei lo ang maia kan ngawih reng hian eng thil ṭha nge chhuak ngai?’ tiin a sawi dan phung chiahin ka chhang ta zek a!

A vei lo te chuan chhiar pawh an chhiar rih kher lo thei; mah se a veia te vek te, ziak leh sawi chhuak ve kher lo te pawh rilrua titharah tal kan sawi leh ziah leh ṭhin hi chu kawng khat chuan a hlawk phawt mai.

Hmun inang lo tak tak, lirthei chuannaah te, hnatlan­naah te, khawi lo kal nikhuaah te, khawhar in leh inneihna lam thlengin kan titi duh zawng leh kan sawi tui ber ber chu ram inrelbawlna fel lo leh ram hruaitu duhtawk lohna lam a nih reng lai hian, siam ṭha tura kan mawhphurhna kan koa innghat erawh kan hmuh hmaih fo si. “Mipuite pawh hian kan zir lo, eiru tur te leh an nihna-ina a tlin bak ti tura nawr hi kan ching a” kan ti reng chung si hian, mipuiah kan inchhiar lo em ni dawn ni; keimahni hi tel lo ang hmakin kan inngai thei nia!

Pathian thu kan duh a, kan sawi zin em em mai ‘Tlemte chunga rinawm chu tam tak chungah pawh a rinawm ṭhin...” kan ti a. A tam emaw, a tlem emaw, kan hma zawn ṭheuhah hian kan rinawm meuh em le?

Eng tih nikhuaah emaw, kan hriat miah loh kan tawn fuh emaw, anmahni chu kan hriat, ram a vei ve miah lo emaw kan tih chen hian, han sawi tak tak chuan ngaihdan pahnih khat tal hi chu kan nei vek! Chuvang chuan, sawi sawi hi awmzia a awm tlat a ni. Kan veina a lo rei tawhin kan sawichhuah dan leh kan sawichhuahna chen pawhin ninawm lam a lo ni tawh a ni maithei. Tun hi a hunlai a ni, sawi thar leh zel ang u.

Party ruihchilh ni lo, party lama inhmang ni lo, ṭan lam nei miah lo ina ngaih dan a puanchhuah leh a sawi hi, a ṭha emaw ṭha lo emaw, party ruihchilhho thusawi awn lam nei ran-ho ai chuan lem nuam tak a ni ṭhin.

Kan chenna ram hi kan siam a ni

Kan theihnghilh nge nachang kan hre lo hrim hrim? Kan ram retheihzia leh chawmhlawm state kan ni tia kan iak kan iak lai leh, ram economy sawi ngam lo hial khawpa kan pachhia kan tih lai hian, kan tu kan fate bulah hian politics hi kan hrilhfiahin kan sawipui ngai em le? Mizote hi mak deuh chu, mihring nuna bet ngei ngei leh kan nunphung leh khawsak dana min nghawngtu lian ber zinga mi, mipat hmeichhiatna (sex) leh ram inrelbawlna lam kan inchhungkhura kan sawi ngai tlat lo hi a ni.

Politics te hi chhe hlawm tawpah kan ngai emawni, inchhungkhura sawia kan ti ti a, khawvel ta riaua ka hria te hi eng kan ti chu ni maw?

Kan tu kan fate hi ram hruaitu ṭha kan neih loh lai leh party politics thli chhiain mi len lai hian, politics dik tak zawk i hrilh ang u. Kan chenna ram kan vei a, kan lungawi lo a nih chuan chu mi khawvelah chuan kan tu kan fate an ṭhan len loh nan hma ila ṭan ang u hmiang.

Mahni bialtu MLA leh councillor pawh hre lo matric pass tawh si tu leh fa kan nei a nih chuan kan hmabak chu a ropui lo ngawt ang! Kan phak ang tawk ṭheuha ram hi kan vei loh chuan, ṭhankin hnua awmze nei taka ram vei thut hi har tak a ni tawh ṭhin. Kan chenna, kan nunna, thaw kan lakna, kan zalenna Mizoramah hian kan lo chep reng em? Kan ram ngeiah hian lungawi lo takin kan lo khawsa reng em? Inthlan apiangin kan duh ang candidate kan hmu ngai lo tawp em ni? Hruaitu ṭha hi kan nei lo nge thlangtu ṭha kan awm lo?

Ngaihtuahin i auchhuahpui leh teh ang u; awmzia a awm a nia...

- Rs Zuala Renthlei Leng Khua