Written by
- KT Ramchhana
COVID-19 - Hlawh Batsak - SEDP
Tunlai chu COVID-19 hripui rapthlak tak léng kara Mizoram sorkarin sum tam tak hmanna tur, Sports & Youth Services Department hnuaia work order eng emaw zat a tihchhuah chungchang hian sawi a hlawh hle mai. Miin an sawi nasa bawk a, i'n sawi ve teh ang.
A ni tak a, Mizoram sawrkarin COVID-19 dona atana sum a neih loh em em lai - sum a neih tam tawk loh avanga MLA-te leh mipuiin hri leng sona atana sum tam tak, cheng nuai 1,000 chuang an thawh khawm tawh lai leh sawrkarin a hnathawkte hlawh a batsak hial laia mipui ni tin mamawh ni hauh lo atana sum tam tak lo hman hi thil tih âwm loh tak a ni ve reng mai a. Chutih rualin, work order pe chhuaktute rilru leh ngaihtuahna aṭang chuan tih âwm tak a ni chêk ang a; an ngaihtuahna erawh chu a dik em, tih erawh ngaihtuah tham a ni.
A dik tak chuan, Mizoram mipui nawlpuiin COVID-19 kan ngaihven tak tak ṭan lai vel, lockdown a nih hma aṭang tawhin kan pu ber hian sum a tam thu a sawi tlat reng a. Pu berin sum a tam ti reng mah se, mipui rilruah Mizoram sawrkarin sum a nei tam lo tih hriat rûkna a awm a ni chêk ang chu, COVID-19 dona atan sum an thawh ruih ruih zel ta tho a. Mipui hi an ṭha ngawt mai.
Pu berin 'COVID-19 dona atan sum a tam' a tih chu a dik lohzia a lang chiang tial tial a, thla hnih vel a liam meuh chuan, sawrkar hnathawkte hlawh a bat ṭhensak ta hial a nih hi. Hlawh inbatsak hian COVID-19 dona atan sawrkarin sum a neih lohzia a tichiang hle.
Chutiang chu kan dinhmun a nih laiin, Mizoram sawrkar lah chuan tun dinhmuna mipui mamawh ni reng reng lo, sport infrastructure dinna turin hna nasa taka thawh a tum a, work order a chhuak chum chum a nih hi.
Tun ang hun, hripui lên laia sport infrastructure din mup mup hi Mizoram mipui mamawh a ni hauh lo. Lo tipuitling se, a chhawrtu tur an tlem lutuk. A chhawrtu tur tamin, Mizoram mipui zinga a zatve pawh ni ta teh reng se, tun dinhmuna kan mamawh a ni chuang lo. Sawrkar hian pawimawh hmasa a hai a ni. Ni lo, a hai tak tak a ni lo; a hai lui a ni.
Sawrkar hnathawk hlawh bat ṭhensak hi tam takin an harsat phah loh laiin, tam takin an buai phah tihte hi hria ila a ṭha khawp mai. Kum 2020-21 Mizoram budget-ah SEDP atan cheng vbc. 513 dah a ni a, a tam tham hle. SEDP atana hmanhmawhthlak taka tih ngei ngai bik a awm a nih pawha ti tho siin, SEDP-a sum dahte hi a zatve tal chu COVID-19 dona atan i hmang rih mai ang u hmiang. Hun harsa, khirh bik, kan la tawn ngai loh kan tawng mek a nih hi.