TUNLAI KHAWVEL - MONEY POWER

Kuminah (2022) Central Kristian Ṭhalai Pawl (CKṬP) in kumpuan thupui zirah "Sual tinreng bul - tangka sum ngainat-" tih an thlang a, ṭhalai sing tel rualin an zir mup mup mai a, a lawmawm mang e. Kan tunlai khawvel hi ṭawngkam khatin sawi dawn ila 'Pawisa atchilhna khawvel' kan ti thei awm e. Hei hi tunlai kan nuna thu dik, sawi hrehawm tak si chu a ni.

Pawisa hian engkim a sithlu a ni ber ta mai a. Thu dik kan tih te, rinawmna leh dikna, tlawmngaihna kan tih thleng hian pawisa hian a si thlu ta vek emaw tih mai turin pawisa sum atchilhna thlarau hian min nuai mek a. Kan thlarau lam nun thlengin a rawk a, kan talbuai chur chur fo ta mai a nih hi. Chumi buma awmte chuan an rût tawk tawk a, an thun mawlh mawlh a, an ei hem hem reng mai a nih hi.

Hnampui zawkten "Pawisa hi chhiahhlawh ṭha tak a ni a, hotu chhe tak a ni thung" an lo tih hi a dik hle. Pawisa hi kan thuhnuaia a awm lai leh kan thunun theih lai chuan hmanraw ṭangkai tak a ni a. Mahse pawisa in min thunun tawh chinah erawh chuan kan duhthlanna chawpin a lei fai vek a, kan duh loh thleng thlengin min nawr kal a, kan tum lohna leh duh lohna hmun thleng thlengin min hruai tawh mai a ni. Mihring hmai eng zahna kan tih te, ṭhenawm khawveng mithmuha mawihawih kan tih zawng zawng pawh pawisa hi chuan a khuh bo vek thei a. Pawisain a bual ât tawh chuan Patling nutling pui pui hi maksak tak takin kan khawsa fo tawh mai zuk nia!

Pawisa hi kan nitin nuna pawimawh, a tel lova kan awm theih loh khawpa hlu a ni. Mahse, miin a hmanna tur ni loa a hman te, a nih dan tur ang ni lova a sawngbawl te, tute emaw tlawn nana dik lo taka hman a nih te, midangte chanai a laksak leh a pawhpen te hian a hmang sual tihna a lo ni ta ṭhin a, pawisa a ngau ngau kha sual a ni lova, miin a hman sual chiah hian pawisa hmangin pawi a khawih thei ta ṭhin a ni. A neiten an neih belh ṭawk ṭawk a, a nei lote an bet tlawk tlawk thung a, chutiang khawvelah chuan rorelna dik beisei theih a ni lo va, pawisa sumin engkim a sik thlûk tawhna khawvelah chuan dikna beisei ngam a ni tawh lo.

Pawisa hi han nei ṭeuh phawt ila engkim hi fel deuh duak turah kan han ngai ngawt a. Kan dâwt sawi te, kan lo eiruk ve deuh rohte pawh hi pawisa kan ngah na na na chuan kan vawmhlum zel thei hian kan ring a, engemaw chen chu kan sual te pawh hi sumin kan vawm hlum thei a ni mahna, mahse Bible-in a sawi ang hian "tangka ngainatu chuan pawisa sumah duhtawk a hmu lovang" a tih ang hian a nei tawh pawhin "Ka ngah tawh e, ka duhtâwk tawh e" tih an tum chuang lo - neih belh zel, neih belh zel duhna a awm zel.

Bible vek hian 'tangka sum ngainat hi sual tinreng bul a ni' a lo tih hi a dikna kan hmu chho zel a. Sum kaihhnawih sualna leh pawi khawihna hian kan mimal, chhungkua, khawtlang leh ram min rûn mek a nih hi.

Pawisa hi thlantui fara rim tak leh hah taka dik taka thawhchhuah tur a ni. Chumi ni lova a kawitan leh kawng dik lo zawha thawhchhuah a nih tawh chinah chuan a luhna a dik lo ang bawkin a chhuahna a dik lo duh hle. Pawisa sum ngahte thiltihtheihna khawvelah awm mah ila, 'thluaka sum lut natna' hi chu nang leh kei hian i vei ve lo hram ang aw. Chuti lo zawng kan ram hian chhantu a nei lo palh hlauh dah ang e.

- PC Nghaklianmawia