BIKE CHUANGTE LEH PAMPHLET

FIR te hi a lâr ta phian bawk a, hri leng boruak thailang leh teh ang. 

Thenzawl leh Lawngtlai

Guwahati aṭanga lo haw mi pahnih chuan Quarantine turin bike a inphurin Lawngtlai an pan a. Thenzawl khuaah thil eiin an chawl khawmuang a, Lawngtlaia an awm laiin an test result chhuakah an positive tih hriat a ni ta si a, Thenzawl khua an buai phah ta hle. Thenzawl khuaa hemi hunlai vela zin veivak châwlte thlengin veng/ khaw hrang hrangah in zawn chhuah a ṭul ta a ni. 

He thu kal zelah Then­zawl khua chuan hri leng inkhuahkhirna dan zawm lo tiin bike chuangte lakah FIR an thehlut ta a, khaw chhung complete lockdown niin a reh ta ṭhup mai. 

Engtin nge bike-in an haw theih?

Phai lam aṭanga Rêl a lo hawte PPE suit nen uluk taka lo dawngsawngin hma kan la a, Quarantine-na hmun tura ruatah khawimah chawl khawmuang lovin bus te'n kan thiar nghal zel a. Bus hmanga rawn hawte pawh chutiangin driver-te nen lam Quarantine zel an nih laia Aizawl aṭanga Lawngtlai thlenga vengtu pawh nei lo, lirthei chhunga khar hnan pawh ni lo bike a Lawngtlai an pan thei mai hi thil mak tak a ni! 

Hman deuh khan Bus aṭanga lo haw zingah Kolasib tlangdung khaw pakhatah thil lei an awm avangin dawr neitute Quarantine an ngaih phah tawh a ni. Bus a chuang pawh control theih loh an awm chuan bike a Lawngtlai thlenga anmahni chauha hawte an chawl khawmuang hi a demawm viauin ka hre lo. Dân bawhchhia chu an ni, mahse mahni chana indah chuan free tak maia ṭhian duna bike a Lawngtlai pan thei chu mamawh han lam zeuh chu awl tak tur a ni.

FIR tur

Thenzawl khuaten FIR an thehlut hi an khaw dinhmun ngaihtuah chuan thil âwm tak a ni. A kaikuang erawh chhût chian ngai niin a lang. Bike-a chuangte hian Dân an bawhchhiat hma hian bawhchhe hmasatu, hetianga sezawl chhuahtu hi an awm ngei tih a lang. 

Guwahati aṭanga Aizawl an rawn thlen hian tu in nge lo dawngsawng a, Lawngtlai Quarantine Centre a awm tur hian tu in nge tir phei? Tuma escort loh leh bike a kal mai tur hian tu in nge phalna pe thlarawk?! tih hi a kaikuang leh hriat hmasak ṭul tak a ni. Mipuite chiai leh thlabara siam hmasa bertute an ni zawk. 

Pamphlet

March thla velah kha chuan mi nawlpui chuan TV, phone leh chanchinbu hmangin Covid 19 dinhmun, hlauhawm dante kha kan hmelhriat fur tawh a. June kan thlen phei chuan kan ramah chuan electronic media hmangin a kaite nen lam kan hre kilh kelh ta a. Lockdown vawi engemaw zat kan puang tawh a, tlang­au hmangin kan in khap reng bawk a, phone leh chan­chinbu-ah peih chhung chhiar tur a awm tawh bawk. 

February thla tir vel khan he Pamphlet hi chhung tinah lo sem se, nuai 20 pawh seng se kan sawisel lo maithei. June/ July vela awareness pam­phlet atana nuai 10 chuang sen leh hnuhnawh hi chu a kawng a bo mah mah a ni.