Bukna/ tehna dik

Bukna dik hi a pawimawh a ni ang kan rin leh innghahna Bible pawhin bukna dik chungchang a rawn sawi lang hial a nih kha. Tun hma leh vawiin thleng pawha buaipui ngai chu bukna chungchang hi a ni awm e. Tun hmain Weight & Measurement Deptt an ti ṭhinin ka hria a, tun hnuah Legal Metrology Deptt an rawn ti leh ta a. Ṭan an la viau chungin staff an indaih lo deuh a ni ang, buk dik lo man tur a awm reng mai a nih hi.

Bazar sa dawr aṭanga ṭanin khawnvartui sem, buhfai retailer, gas distributor, cement zuar leh in sakna ṭhin iron rod zuar thlengin check apianga man tur awm reng mai hi. Buk chi ni lo, a tui lam petrol, diesel nise pawlh dal man tur a awm reng mai hi Kristian state a hriat fo atan chuan a zahthlak deuhin ka hria, kan inenchian deuh a ngai hle mai. Chawlhni kristian kan tam ta deuh em ni aw, bukna dik lo hi Pathianin a huat berte zinga mi a ni si a.

Bukna dik kan sawi a, a hrulah kan han ngaihtuah thuak a, thuhmun anga lang awmze hrang daih si ‘tehna’ hi sawi ṭulin ka hria. Kan hman dan chu a inang lo viau hlawm maithei, keima hman dan ka rawn sawi dawn a ni. State kan nih hnua kan sorkar hrawn tawhte Party pahnih - Congress leh MNF sorkarte hian engtiangin nge ram tan hma an lo lak tawh tih hi ‘teh’ a chakawm khawp mai. Anmahni chuan kan sorkar chak tak tiin an sorkar lai chuan an insawi chamchi a. He article ka ziah lai hian Mizoram leh Arunachal Pradesh khu kum 31 leh thla 3 chiah chiah state kan ni ve ve tawh a. He kum 31 zet chhung hian zorama sorkarna siamtu pahnihte hian kan ram mamawh miretheite chhawr phak eng nge min hnutchhiah le? Kawng ṭha, ei leh bara intodelh, power hnianghnar min pe tawh em le! Kan ṭhalaite hmakhua atan eng zirna in ṭha nge min sawi chhuah sak tawh le? Congress sorkarin artificial turf phah leh kan ṭhalaite state pawna hnathawk tura thawnchhuah an sawi nasa a, belhchian erawh a dawl chiah em? NLUP tih changtlun nan NEDP an rawn vawrh chhuak leh a, engnge an an zel ang le. He NEDP sum hi NLUP anga sem tur a ni hauh lo, party workers induhsak nana hman tur dik tak a ni. NLUP anga dawn i tum a nih chuan i chang ṭhelh chiang viau ang.

MNF sorkar laiin enge ram tana ro tling mirethei thleng phak min hnutchhiah le? Builum khua-ah compen­sation avanga buai, Peace Bonus a hmanna hriat miah loh, Millennium Centre, Aizawl .... Champhai chanem building-te hi mihausa tih hausak leh zualna, Baffacos sum a chhawrna awm miah lo kawng laih nana hman. Tun hma ti ve khanglang ila, EGS kawng laih min ti hre chhuak a, ṭah a chhuak. Sawi tur a tam lutuk kan sawi seng lovang.

Kum 1986 a state kan nih rualpui Arunachal Pradesh lam i hawi tawh teh ang. Engineering College, Horticulture College, Medical College leh adt Mizo­ramin a neih phak loh an nei tawhin an nei dawn mek. Power-ah nise MW 200 chuang pe chhuak thei an puitlin der tawh. Keini Mizoram ve zawng kum 20 hnuah Tuirial aṭanga a changa 30,40,60 MW pe chhuak thei tur kan Commission dawn kan la ti leih leih a nia le! Mizoram hmangaih avanga Independence sualtu, Party leh Mizoram mipui hmangaih vanga lalṭhutthleng kiantu Party te hi min hruai rei tawh a, ngaihtuahna an seng peih tawh lo a nih hi.

Mi thar, hruaitu thar Zoram hian a mamawh tawh takzet a ni. Hawh u, mipui hi i harh chhuak tawh teh ang u. Kan ram a chhiat tak tak hma hian Upa-in ‘a hnuhnung hnung phungin seh’ a tih kha.

- JV-a, Aizawl West