Bial vil - a zahtheih loh thlak mang e

Kumn 2018-ah Mi­zoramah MLA inthlan pui a lo thleng dawn ta a, tunah hian MLA nih tum leh MLA candidate nih ve chak hrim hrimte chu an buaiin an ri suau suau mai. Bial vil ringawt mai hi a va han zahtheih loh thlak tak em! tih hi keia ngaihdan mawl tak chu a ni.

Political party hruaituten MLA can­didate an thlan hma daiha mahni bial ang hrima lo vil ve sek mai hi thil nih phungah ka ngai lova, mi tam tak chuan sum pawh an seng tam tawh hle a ni. Ruling lamah hian MLA ni si lo, eptu MLA biala ‘bialtu’ ni ve mai awm anga chhiatni ṭhatni apianga kal ngauh ngauh mai, sum thawhna tur remchang awm apianga pawisa phawrh nghal thei zel hi panga vel an awm an ti.

Ṭhenkhat chuan a bialtu MLA awm sa reng aia lansarh leh chet khalh an tum ran a, an MLA din chakna biala thil thleng apiangah an ri ang vut vut a, MLA pawh ni mang si lo, inthlan lo awm dawnah Bhavan lamin MLA candidate-ah min duh takin, tih rilru vang maiin pawisate an seng a, MLA ang maiin bial phuahchawp an vil ve ngar ngar mai a, hei hi ram leh hnam hmangaihna lam aiin lal ve hrim hrim chakna a angin ka hria.

Eptu lamah pawh hian MLA-a din tum ruh em em mai, party hruaitu lamin, “Nang hi i ṭha ang, lo va vil ve rawh,” tia an hrilhruk pawh ni chuang lo,

ṭhenawmte leh ṭhiante bakah Unit pahnih pathumin, “Tun ṭum chu nang hi ding ngei la a ṭha ang,” an lo tih vanga lo phur ve em em mai, mitthi awm apianga langsar taka ṭhut tuma vei lauh lauh hi an pung thur thur mai. MNF zingah pawh hian kum 2018-a MLA ticket beisei avanga phur tak maia chhiatni ṭhatni vela mi chibai kual hi an awm ta nual mai, hei pawh hi ram leh hnam hmangaihna aiin mahni lal ve hrim hrim chakna, MLA-ah eng ti kawng pawha tlin ve tumna a ni.

Heng mite hi chuan inthlan lo awm tur hi ‘goal’ berah an nei a, an tum hmasak ber chu pute hnen aṭanga ‘malsawmna’ dawna MLA candidate nih phawt a ni. Candidate an nih hma pawha sum seng hreh lote hi chuan inthlan dawnah pawisa phawrha vote hmuh theih a nih phawt chuan an phawrh hreh dawn lo. Hei hi MPF-in a do tlat kha a ni a, inthlan dawna tih rem lo kha tunah hian an kalpui mek zawk lo maw?

MLA candidate puam hma hmaa bial vil ruk lo neih a, a ṭhente phei chuan langsar takin an lo vil a, hengte hi chu a zahtheih loh thlak lam rawngkai a ni.

- Vanrammawia