KUHVA KAWR THELNA KHAWL 'PATENT' A NI TA
Pu Lalbiakzuala Ralte leh Pu Lalpiangliana Sailo te ṭhiandun chuan kuhva kawr thelna khawl thar an siam chhuah, ‘Arecanut Peeler ' chu dan ang thlapin a siam chhuaktu nihna an nei ve leh ta. An chhuanawmin, an hlawhtlinna hi Zofate tan thil lawmawm tak a ni.
Patent Certificate hi Patent Office, Government of India chuan dt 30.9.2022 khan a tichhuak a, Patent No chu 408318 a ni. Dt 4.3.2014-ah patent hmu tur hian National Innovation Foundation (NIF), Ahmedabad kaltlangin an file ṭan a, kum riat hnuah Patent Certificate hi an hmu thei ta a ni.
Patent Certificate an neih hma pawhin an khawl hi eng emaw zat siam chhuak tawhin, hmun hrang hrangah an hralh chhuak tawh a, mi tam takin an hmang ṭangkai hle.
Anni ṭhiandun hian Agarbati stick siamna khawl an siam kha an patent hmasak ber a ni a, tun hi an vawi hnihna a ni. Mi thluak ṭha leh taima, harsatna hrang hrang kara Mizoram tana ṭangkai tur khawl siam chhuah tuma bei ngar ngar ṭhin an ni a, an fakawm hle.
Pu Biakzuala phei hi chu Science and Technology-a Chief Scientific Officer ka nih laia Innovation Facility Centre din tura hma kan lak lai khan min puibawmtu pawimawh tak a ni nghe nghe.
Mizo kuthnathawktute tana ṭangkai tur khawl thar siamchhuaktute (inventors/ innovators) hi Mizo mipuite tan an hlu a, hlawhtling zel turin duhsakna ka hlan e.
- Dr R.K.Lallianthanga