AIZAWL TEMPLE SANAPUI

A hunlai a ni bawk a, Aizawl Temple Sanapui hi tlemte ka’n sawi ve teh ang. An riktir leh tir loh lam ka sawi lo va, a sawitu (Social Media) hrang hrangah hian a upat dan sawi dan a inang lo fur a, chu lai vel chu kan sawi ang.

Kum 1994 (Gospel Centenary) a nih dawn khan kohhran ṭhenkhatin Centenary hriat­reng nan Khuang­pui an siam hlawm a, In te an sa a.

Temple Corps Council chuan Biak in sak lai a ni bawk a, Sana lian tar ila Biak In hmalamah dah ni se. Lehlamah Salvation Army chhinchhianna, Crest emaw Red Shield emaw dah ni se, tiin thu a pass a. Tichuan Biak in phu tawka lianin sana­pui awmna tur chu tihkuak a ni ta a ni.

Anglo Swiss Company, Calcutta-ah sana duh dan size sawiin order a ni a, Sana chu an siam zo ta a. Thlawhtheihnain Silchara rawn thawn tura tih a ni.

Pu F. Sangkhuma CLS (Temple) leh a naute chu Pu Vanlalruata Ralte (Bata Ruata) Swaraj Mazda tharin a la turin ni 15.7.1994-ah Silchar an pan a. Silchar-a ṭum tur thlawhtheihna kawngkaah a len loh avangin Gauhati-a ṭum tur thlawhtheihna lian zawkah an thawn a lo ni a. Gauhati chu an pan ta zel a.

Gauhati aṭang chuan an rawn phur haw ta a. Ni 21 July, 1994 tlaiah an lo thleng dawn tih hriain Temple Corps Sipaiten an lo nghak ṭhap a. An lo thleng ta ngei a, a tuk ni 22.7.1994 zingah an unload a. Chhunah a vuah turin an hnatlang nghal a. A tuklehah pawh an bei zel a. Mahse chuti maia vuah theih a ni lo.

An han tinung a, hunbi awm lovin a kal ta vut vut mai a. A siamtu company an zu hrilh a, Silchar-ah thlawhnain an lo chho a. An siam ṭhat hnu chuan an haw leh ta a. An kal man senso zawng zawng hi Temple corps tum vek a ni. Tichuan ni 30 July, 1994 ah chuan vuah fel a ni ta a ni.

Tunah chuan Temple Sanapui chu kum sawmhnih leh pariat lai a lo ni ve ta a nih chu. A man zat hi a ziakna bute en loh chuan tunah sawi theih a ni mai lo. Advance atan Rs 15,000/- thawn a ni tih erawh chu hriat a ni.

Tuna sana dar zat vawtu tak hi chu a hnua vuah leh mai a ni e.

- V.L. Hruaia, Tuikual South