MIZO MIPA KAN HEK LU HRET
Tun hnaiah Presbyterian Kohhrana inkhawmpui pawimawh tak, Presbytery inkhawmpui a awm a, chuta Statistician report hrang hranga a lan danin, kum khat kal ta chhung khan he Kohhranah hian mipa 1,993 an thi a, hmeichhia 1,076 an thi. Hei hi Presbytery 36-a thil awm dan a ni a, heng zingah hian hmeichhe thi tam zawkna pakhatmah a awm lova, an inhnaihna ber chu Chhimtawp Presbytery-ah a ni a, mipa 14, hmeichhia 13 an thi.
Presbyterian Kohhran hi Mizorama Kohhran member ngah ber an nih avang leh, heng Presbytery bâk hi chu Presbytery dang tlem te chauh a awm avangin, Presbytery 36-a thil awm dan hi Mizoram pumpui hlimthla leh a tehna atan hmantlak a nih a rinawm.
Hmun tam takah chuan mipa leh hmeichhe thi inthlauhna hi a namen lo hle a, khawpuiah a nasa zual emaw tih tur a ni bawk. Hengte hi lo en teh u. Aizawl Bethel (140/80), Aizawl Central (143/74), Aizawl Chhim (93/46), Aizawl Chhimthlang (107/40), Aizawl East (151/66), Aizawl Hmar (98/51), Aizawl West-I (103/50), Aizawl West-II (81/29), Champhai North (97/62), Champhai South (58/22), Dampa (40/20), Kolasib (91/44).... a dang pawh hetiang deuh hi a ni fur mai. Thite kum zat hi hriat theih a châkawm hle mai a, ṭhenkhat sawi dan chuan, Aizawl leh hmun dang ṭhenkhatah kum 70 chin chung lam thi aiin, kum 50 tlin hmaa thi an tam zawk.
Kan dinhmun hi a va him lo em! Mipa, a bik takin tlangval leh pavalai kan púl a nih hrim mai chuan, tun aṭanga kum 20/30-a Mizoram dinhmun tur hi ngaihtuah ngam a va har em! Pathianin mihring dam chen atana a ruahman tlangpui leh, leilung dana thih hun pangngai hi Mizoram hian a va bawhchhe nasa ve le. Aizawla veng tam tak hi thlir ila, thler ṭhenkhat chu Hmeithai Street tih hial tlâk kan ni ta lo maw? Khawvel awm phungah faten nu leh pa an sún tur a nih laiin, nu leh paten an fate min va sún nasa ve le. A tira unau awm ve diah diah, nuṭa nei tawh miah lo, hmeichhia hlir dam ta te hi kan tam ta. Mizoram hian eng pawi nge kan khawih a, heti fahrana mipa kan hek mai le? Inngaihtuah tur kan nei a ni lo'm ni?
Presbyterian Kohhran dinhmun hi hetiang a nih chuan, Kohhran dang mite-ah pawh kan dinhmun hi a danglam lutuk lo ang tih a rinawm. Kan thih dan hi kawng hnihin a hlauhawm - mipa, valai tak tak kan thih tam lutuk chuan, Mizo hmeichhiate an thlaphang lutuk dawn. Hmeithai chhungkua an pung mek a, mipa awm mang lohna chhungkua nih hi tu tan mah a ṭha lo. Kan khawtlang thlamuanna, nunau inhnemna ber, kan hnam hnungzang ruh a tliak sawp mek a ni.
A pahnihna-ah chuan, tar aia ṭhalai leh pavalai kan thi tam hi khawvel awmphung kalh a ni. Ram leh hnam tan a him lo. Leilung danah piang hmasa chu an kal hmasa tur a ni tlangpui a, an tu leh faten kan kalsan zel a nih chuan, kan dinhmun chu a ṭha lo hle ang. Mizo hnam hi engtinnge a awm zel ang? I inngaihtuah takzet ang u. Hei hi rin thu ni lo, Kohhran inchhiarna record a ni tlat si a.
- RK Lianzuala