ZIRLAIIN ‘TECHNICAL EDUCATION’ HMASAWNNA AN VEI TA!

Tunlai khawvel tech­nology a intihsiak­na khawvelah kan awm mek a. Keini India hmarchhak kil tawpa awm Mizoram pawh chu hmasawnna thli chuan min thlawh khum bik hauh lo.

Tunlai ṭhangthar leh naupang te tak te te thlengin kan hmelhriat a, zirtir hran ngai lovin engkim kan man zung zung tawh mai a nih hi.

Hetih lai hian kan hmasawnna hian awmhmun nghet a khuar theih nan

ṭanhmun kan lo in sawh rem ve hi a ngai a ni. Chumi tur atan chuan sorkar laipuiin nasa taka vision neiin hma a la mek a, India ram state lian leh hmasawnte kan thlir phei chuan rualawh a na duh hle mai. Mahse, hetih lai hian ‘vahluka khua kan la tlai lo a’ tih erawh kan hriat a ṭha hle. Kan thlen chin aṭanga hmasawn turin in puahchah phawt mai teh ang.

India hmarchhak (NE States) bikah pawh Technical Edu­cation hian awmze neiin rahbi a rap chho mek a. Eight Sister states (with Sikkim) zingah Tech­nical Education Directorate level a hlankai nachang hria - Assam, Manipur, Nagaland, Sikkim-in hma an hruai mek a. Directorate hran la nei lo, Higher Education nena directorate khata la nei - Mizoram, Meghalaya, Aruna­chal Pradesh leh Tripura kan la ni a. Mahse, Technical Education Directorate hranga la nei lo state te pawh hi kan hriat angin technical institution ṭha tak tak nei an ni hlawm.

Chutih mek laiin Mizoramah Poly­technics pahnih - Mizoram Polytechnic, Lunglei leh Women's Polytechnic, Aizawl kan neih lai bakah tunah hian District hrang hrangah Polytechnic hawn belh tura nasa taka hmalakna kal mup mup a awm bawk a, kan state sorkarin nasa takin ṭan a la mek a ni.

Mizoramah pawh kan zirlai leh ṭha­lai, hmathlir thui tak tak nei zingah rualawhna a lian chho ṭan ta mek a. Hmanni 11th Oct., 2017 (Wed) a Sialhawka ‘Lal­lulla Run’ a zirlai organisation lian tak Mizo Students Union (MSU) inkhawmpui lian vawi 16-na chuan Technical Education rawn ngai pawimawh chatin, tuna Technical Wing, Directorate of Higher & Technical Education, Chaltlang a awm mek chu Direc­torate of Technical Education ni tura hmalak an rel thlu ta ut mai. Hetianga zirlai pawlten Tech­nical Education veina chang leh hma­sawn duhna an nei hi kan rama Technical Education hmasawnna rahbi pawimawh tak a nih ngei beisei ila.

Kan zirlai pawlin hmachhawp lian tak an neih mek tihhlawhtlin a nih ngei theih nan Mizoram sorkar pawhin a enzui pui a, a hlawhtlinna kan hmuh thuai hi kan hmasawnna inṭanna rahbi pawimawh tak a ni ngei ang.

- BigDaddy VR Pachuau