Ṭamdil enkawltu ban thu kha

Khualzin pakhat Nilanjan an tih chuan Twitter kal tlangin Ṭamdil Tourist Lodge chhung a ṭawp thu a rawn puang chhuak a, an thlen zana amah dawng­sawngtu chu a ruih thu a ziak bawk a, Mizoram tán a zahthlak hle a ni.

Tourism Depart­ment hotute chu an zak leh lutuka an hming chhe tur hliahna atan Ṭamdil enkawltu eizawnna chu an titawp ta a, finfiah pawh tum buai lovin a hna aṭangin an bân tawp a. Chu bakah chuan a hmaa an warning tawhna Sorkar lehkha pawimawh chu a darh nghal chuai chuai bawk a ni.

He thil thleng hian ka Mizo rilru hi a tina em em a ni. A tihnat chhan chu Mizo pa insawifiah tir miah lovin Vaipa hek vangin an paih hmiah a ni. An paih bakah chuan amah tihmingchhe zui tura lehkha an tidarh zui nghal kher kher kha a ni.

Ṭamdil ṭawp kha Tourism Depart­ment mualphona a ni a, khami hnua a enkawktu an bân khan Mizo a timualpho zawk tlat a ni.

Mizo zingah mahni hming ṭhat duh luat avanga Mizo pui eizawnna titawp duhtu kan nei hi a zahthlak a ni. Ṭamdil enkawltu khan ban a phu a nih pawhin ko se, a thiam thute sawi tir ve se, an pawm lo a nih chuan bân chauh se, chu chu thil kalphung dik leh natural justice a ni zawk ang.

Tuna mi hi chu dictatorial regime ang maia inenkawlna leh innghaisakna a ang a, hetiang thil Mizo­ram ngeia a thleng ta mai hi a pawi khawp mai.

Ṭamdil enkawltu hi mimalin ka hre loa a ṭan pawh ka ṭan hek lo. Ka sawisel ber chu an bân dan kal hmang rawng lutuk te, Ṭamdil enkawltu pa tun hmaa an lo warning tawhna lehkha an ti leak zui kher kher kha a ni.

Tunlai khaw­velah chuan heti em em lo deuh hian ro hi rel tawh se. Mihring in hmangaihna a lo tlahniam a nih pawhin Vaipa Twitter vang maia Mizo pa châw bel ben buak sak hi a fuh lo hle a ni.

- David Lalremruata