USA Legislative Fellows for South & Central Asia - India & Pakistan (Part-I)

United States of America hian ramdang nena inlaichinna ṭha neih leh culture in hriat tawn a duh a, chumi atan chuan US Department of State hian anmahni pawisa sengin khawvel ram hrang hrang ṭhalai rualte chu an ram chanchin zira inzir tawn turin an chawlut ta ṭhin a. Kei pawh 'exchange project' atana thlan zingah hian tel ve ta hialin ram ropui zar zovin 'fellowship' neiin inzirna nasa zawk ka neih ve theih phah ta a ni.

Kan programme hi Legislative Fellows for South & Central Asia - India & Pakistan tih a ni a, United States Department of State hian World Learning Inc. kaltlangin he 'Fellowship' hmu thei tur hi diltu tam tak zingah a thlang chhuak a, India aṭangin mi 12 leh Pakistan aṭangin mi 13 tlingin a rualin India leh Pakistan ṭhalaite hi programme min neihpui a. An tum ber chu US sawrkar leh civil society kalphung min zirtira keimahni aṭanga hlawkna lo neih ve leh nakin zela inlaichinna siamtu min nihtir a ni a; India leh Pakistan inlaichinna ti ṭhatu palai kan nih an duh a, hei vang hi a ni pakhat ang team hrang hranga min ṭhen hnuah pawh India leh Pakistan hi min awmhotir ta zel a ni. Kan inzui a, Hotel khata kan thlena kan chhuahho reng chuan inlaichinna ṭha tak kan nei lo thei lo.

Kan kal dan leh kal chhan : India leh Pakistan ṭhalai eizawnna lama mi chungchuang leh ṭhalai leader kum 25-40 inkar tana programme hi siam a ni a, October ni 15 aṭanga November ni 17 thleng a ni. He programme-a tel tur hian dil a ngai a, Washington DC kan thlena anmahni min lo hrilh angin "Dilna sang tam tak a lo lut a, in vannei em em a ni," Vladmir Spencer, Manager World Learning Inc. tia min lo 'welcome' na hian a tichiang viau mai. Ani hian 'Cultural Ambassador' pawimawh tak in ni e, a ti nghe nghe.

Kan 'ideas' kan inthleng dawn a ni ber a, a tute tan pawh hlawkna tur a ni a, chu chuan ram rorelna ṭhalaite kuta la awm chho zel turah thil ṭha zawk min zirtir dawn niin an beisei. A tel thei tur thlanna 'selection process' hi kum chanve a tling hial awm e, a tawp lamah 'phone call' hmangin USA aṭang hian World Learning Inc thawktute hian interview min rawn nei leh a ni. Action Plan Project neih vek tur a ni a, 'Entreprenuership Development in Mizoram' tih thupui hmangin Action Plan Project ka ziak a, eng chen nge ka hlawhtlinpui ang ka la hre lo.

In zir tura kal kan nih angin US kan thlen hnuin October ni 15-17 chhung Washington DC lama 'orientation' kan neih bak kha chu kan 'placement' hmuhna Columbus, Ohio lamah kan kal ta char char a. Kan Visa hi J1 Visa a ni a, 'Exchange programme leh Scholar' tana an pek Visa a ni a, kawng tam takah 'special' na a nei. Columbus lam hi 'politics' hmunpui a ni a, keini India pahnih leh Pakistan mi pathum min dahte hi 'political background' nei deuh vek kan ni a, kan awmna nen pawh a inhmeh hle. Midang hi Cleveland, Philadelphia, Tulsa, Washington DC etc-ahte an dah hlawm a. Background hrang hrang thlan khawm kan ni a, India ram aṭang hian The Economic Times Special Correspondent aṭanga TATA Social Science lama Programme Manager te an ni nawk. Pakistan lam Columbus team-a ka telpui pakhat hi Pakistan Punjab MLA leh eptu leader a ni a, a la upa lo hle.

Hun kan hmang daihzai hle: Columbus kan thlen rual hian Palmer C. McNeal, Executive Director, International Visitors Council of Columbus, Ohio chuan min lo thleng a. US Department of State-in India aiawh tura min thlan avanga lawmpuina lehkha min lo pe. Palmer hi kan 'host' a nih avangin min enkawltu ber a ni a, US Federal leh State sawrkar chanchin chipchiar takin min hrilh.

Palmer hian Columbus khawpui lian takah Newspaper a awm mumal tawh lo a ti a, journalism background nei ta chuan ka ngaihven zui hle. "Smart phone (iPhone tiin a sawi) hian a ti thi vek tawh a, hei hi in ramah pawh a la thleng thuaiin ka ring. Newspaper pakhat Columbus Dispatch chiah kan nei tawh a ni," a ti! US chu Pacific tuipuite'n a hual a, run mai mai theih loh a nih thu leh hun rei tak chhung an 'civilization' chu la awm tur ni mahse an mamawh em em chu ramdang nena 'exchange' neih a nih thu a sawi a, "US mamawh chhânna chu nangmahni ang hi a ni. Kan inzirtawnna hi kan tana thil pawimawh ber pakhat a ni," a ti hial. He Legislative Fellows - Fall 2017 aṭang hian hlawkna kan neih ang angte kan rama kan hawna midang nena kan hriat chhawntir chu kan hna pawimawh ber a nih thu min hrilh uluk hle bawk.

Columbus: A khua hi USA-ah chuan 'politics' hmun pawimawh ber pakhat tia an sawi ngam a ni a. Kan hna ber tur chu Ohio Assembly House (General Assembly) lamah 'internship' tiin hun kan hmang dawn a ni. An ram inrelbawl dan kan zir ang a, an thlan tlin legislature-te kan kawm ang a, a ṭul ang ang kan hmachhawn ang. Kan thlen hlim kar hi chuan House of Representatives term hnih chelh tawh leh Columbus chanchinbu neih chhun Columbus Dispatch Editor-in-Chief Michael F. Curtin nen 'appoinment' min siam hmasa ber a, zawhna leh sawihona hun hlawk tak kan hmang a. USA-a politics inthlak awm ṭhin chuan khawvel a nghawng ṭhin a ti a, amah hi Democrats a nih vang nge US President ṭang lai Donald Trump chu 'impeachment' turin hmalakna chak tak a awm thu a sawi tui hle a, US President hi House of Representatives-in dan an bawhchhiat chuan 'impeachment' an ti thei tih a sawi. Mahse a 'convict' lam chu Senate rel tur a ni thung.

President kal tawhah Bill Clinton leh Andrew Johnson te chu 'impeached' an nih tawh thu sawiin mahse Senate-in a hrem lo a, President Nixon kha 'impeachment' tih hmain a in 'resign' thung. Billionaire Environmentalist leh Democratic mi hausa Tom Steyer chuan Trump hi 'impeach' a nih theih nan dollar maktaduai 10 thleng sen inhuamin tunah hian hma a la mek a, "Rilru kim lo a ni tih a lang chiang a, nuclear ralthuam humtu a nih hi a him lo a ni," a ti a ni. Curtin hian Newspaper mai bakah Television pawh a thi tial tial tih a sawi a, ṭhangtharte chuan an phone-ah apps hmangin thil an ti vek tawh tih a sawi a, an newspaper pawh a hma chuan thawktu 400 nei kha khawl changkang (robot) hman nasat avangin mihring 25 chauh an chhawr tawh thu a sawi bawk.

US Congress-te pawisa avanga US-a hetianga fellowship nei thei hi kan nih avangin Congressman office kan tlawh ngei ngei a ngai a, Steve Stivers, Congressman Office kan tlawh a. Kan tlawh hma hian an Office hian India, USA leh Pakistan flag chu hmun khatah an lo zar a. Keimahni vanga an lo zar chu a ropui dangdai hle. An bial Counstituency Affairs Representative hi a hranin an lo nei thlap hi a ni a, bial an ngaipawimawh hle, a bial enkawltu Adam Slane chuan an bial enkawl dan tam tak min hrilh a. Keini rama MLA ten an bial an enkawl dan nen a danglam tam lutuk lo. Thil lian tham vak loah pawh an bial mipuite hian an phone-in an tibuai ve fo ṭhin a ni. Bial sawi takah chuan 'internship' kan neihna tur Ohio House-ah hian Thawhleh aṭanga Ningani chauh kan kal thei dawn a, hei hi a chhan chu Legislature-te hian hemi ni bak zawng hi an bial lama hun an hman thin vang a ni. Kum hnih term an chelha an bialah an awm tam hle, an tlin tuk aṭangin an campaign leh a tih theih.

Federal Judge Michael H. Watson : Judge hian Courtroom an lo nei zel a ni a, a Assistant nen ama Courtroom-ah ngei darkar khat chuang min kawm a, Federal Judge a ni a. An ram inrelbawl dan tlangpui min hrilh a, zawhna chhanna hun tam zawk kan hmang. Criminal case-te 'trial' chhung a rei lo hle maia kan inang lo hle a ni, case an chingfel zung zung.

Board of Directors, David Payne : Hei hi chawhnu lamah kan tlawh a, a 'interesting' khawp mai. Board of Elections, Franklin County hi Columbus-ah chuan a lian ber an ni a, Ohio-ah zawk a ni ang chu! Kan mi hmuh tur hi Deputy Director a ni a, Board-ah hian Republican party leh Democrats party a inzatchiah an awm tur tih a ni, Board of Directors pali; Director, Deputy Director, Chairman leh Vice Chairman an awm a. Party pahnih hian a inzatin an insem tawp. Anni hi an ram chhunga inthlan buaipuitu (Election Commission) kan tih ang kha an ni a, mahse party pahnihin an enkawl tawp a. Thawktu 44 an nei a, chu pawh party pahnih hian a inzat chiahin an insem leh mai.

Electronic Voting Touch Screen Voting Machine chu mi 33-in 'campaign' neiin 'hacked' a nih thu an sawi nasa niin David Payne chuan a sawi. Anmahni lo kala enfiah tura a koh chuan tumah an lo kal ngam leh lo a ti. Mak ve deuh chu Franklin County 'politics' chuan Columbus inthlan a hril thui hle tih Payne hian a sawi a, Columbus inthlan hian US President thlan a hril leh ṭhin a ti. A nihna takah chuan Ohio state hi US politics-ah hmun pawimawh ber a tih theih awm e, US President pawh Ohio aṭang hian mi pariat ngawt an lo thlang tawh nghe nghe.

Tunah hian inthlan an buatsaih mek a, US kalphung dangdai deuh chu Vote thlak tawp ni thlen hma ni 28 chhungin vote a thlak theih, kan kal lai pawh hian vote thlak an lo awm. He hmalakna hi ṭha viau angin lang mahse a buaipui a hautak thu Payne hian a sawi ve tho a, ni 28 chhungin Municipal inthlanah mi pahnih chiahin vote an thlak thu a sawi. "Ṭha tak anga lang, chin zel tlak loh hautak mai mai a ni em?" tia ka zawhna chu, "Danin ti turin min ti a, dan kan zawm ve mai a ni," tiin min chhang. Dan an dah lal hle. Hetih lai hian mipui tan chuan vote thlak lawk theih hi a hlu hle ang, ni 28 chhungin vote thlak theih vek a ni si a. President an thlan rualte hian an khawtlang hruaitu tur an thlang tel ṭeuh zel a, 'referendum' pawh an nei nghal ṭhin a ni.

An Electronic Voting Machine te min enpui vek a, an inthlan kalphung chipchiar taka min zirtir avangin inthlan buaipuitu nihna 'Election Poll Worker' batch min pe ṭheuh a ni.

- Zoa Tlau; Camp: Columbus, Ohio