Politician finna phena mipui âtna...

Hman deuh khan Chief Minister Pu Zoramthanga hian Pu Lal Thanhawla damlo a kan kha kan la hre reng ang a. Pu Zorama khan fiamthu khan Pi Riliani kha a fiam vêl niin ka hria a, a video kha ka en ve ngei tih pawh ka la hre thei a ni.

Tun hnai deuh khan Pu Hawla leh Pu Tawnluia te thlalakhoan, nui säng lai hi ka hmù leh bawk a. Ngaihtuahna kal kual vêl chuan "Politician lian chuan lemchangin party lehlam an do a, an hnaia mite chuan tih takzetin ṭhenawma party dangte kan lo bei a, kan inbe hleithei si lo," tih hi a lo lang ta a ni.

Chief Whip lar tak mai, Pu TJ Lalnuntluanga khan Covid-19 laka kan him chhan chu Pu Zorama Pathian ṭih vang tih kha a sawi a ni awm a. Chu chu chanchinbu lamah a chhuak a, a lo chhuahna hi MNF party press release siam vang ni tain ka hria. Hei hi Pu Ngunlianchunga khan Assembly House lamah sawi chhuak lehin Pu TJ-a hian voice record a phût ta a, party Press Release ah khan voice record kha amah zawkin a phût let tlat a, House bathlar lamah pawh an buai zui a nih kha.

Ka rawn sawi chhuah tum tak chu veng mawng lama party worker in tibuai chu ni se an invaw thlu rem rum duh ang a, nimahsela MLA ve ve hi chu buai ve deuh phat a awm chung pawhin an buai zui tak tak lova, a party worker lubawk chin bawk hi an buai nasa leh ṭhin.

Pu Robert Romawia Royte chungchanga video darh chiam pawh kha kan la theihngilh lo ang a. Khangte kha mi pangngai chu ni se zak kimki chawi chawi emaw thinrim engphiarin an bei let anga thiam thute an sawi kual zuah zuah leh ngei ang. Chhungkaw leh darh theihna voice record leak out a nih kha a hunlai chuan a darh chak hle.

Nimahsela mi smart leh thil thlir thiam politician Pu Robert-a chuan a bei let duh miah lo; eptu lamin social media lama an beih chiam chiam pawhin a hunah chuan a ngawi tlat thei a ni. A chang leh amah berin fiamthu angin a han sawi zui ve leh bawk a, miin an beih zui pawhin a huat duh tlat loh avangin heti hian kan tawp san a, a nawi ral ta mai mai a ni.

Party worker naran chunga thleng ni se chhungkua a buai zui anga anmahni pawh an er letna lamah a buai zual viau thei a ni; mahse politician thiam chuan ngawih hun te an hre zel a ni. Heti taka beih hlawh a ni chung hian amah Pu Roberta hi chu kawng hrang hrangah hian puitling takin a awm thiam tlat a ni.

Pu Lalduhoma hi beih tawn ber pakhat chu a ni leh a, a voice record hlui leh tun hnaia a thusawi te an han dah kawp a. Tun hmaa a hawi lam leh tuna a hawi lam a inan loh chuan thlirna dang deuhah chuan sawi dan inmil lo hret hret chu awm tur a ni. Hemi piah lamah pawh hian amah mimal beihna na tak taka an tihna hi kei pawh hian ka lo hmù ve nual tawh a, mahse Pu Duhoma ropuina chu a kal ngaiin a kal miah miah thei.

Hetiang hian party worker-te hi midangin han beih rawn ve se chem sen an lek duh ang a, na takin an che zui ang tih hi a chiang a ni. Aman Pu Duhoma te hi mi tam tak chuan Pu Zorama nen hmelma emaw kan tih ṭhin laiin hman ni deuh mai khan Serchhipah sorkar function-ah hmun khatah thu an sawi a. Inhaw awmin an awm lo hrim hrim a, politics lama power inchuhna avanga an inbeihna hi mimal thil (personal) takin an la duh ngai lo tih kan hmù a ni.

Thil hi han thlir han thlir ila mipui nawlpui hriat loh hian kan hotute hi chu an lo inpawh ru em em a ni. Assembly Session lama na taka an inbeih vak zawh chiah hian chhun chawlhah an chawl hoa an nui leh bawk bawk ṭhin te an tia nih chu!

Politics hi mi tlemte hlawkna tura mi tam tak at sona hmun a ni tih hi a dik zui zel a ni. Politician tam tak hi chu thawhrim vang ni lova hausa tawntaw an nih tawh hlawm hi.

- Lalrindika