Tu hnenah nge kan zualko ang le?

Mipuiin kan aiawhte kan thlan thinna ram (Demo­cracy) hi mipuite siam, mipuite ta, mipuite tan a ni.

Eng kan ti ta nge, he kan Zoramah hian a heti tak hlek lohna a rei ta hle!

Mipuiten kan siam sorkarna fawng vuantute'n kawng hrang hrangin min nghai­sa ta ṭhin chu a ni ber a, kan 'sepui ruah tuar' tlawk tlawk ta a nih hi mawle!

Hetiang laka ata hi tuin nge min chhanchhuak ang le? Mipuite hian chhantu puitu kan va ngai em!

Kawng chhia avangin khawpui leh thingtlangah mipuiin kum tin khel loin kan tuar mawlh mawlh a, sawi sen pawh a ni lo. Road tax chu kan pe ṭha, kawng ṭha kan nei thei chuang si lo.

Sorkar lei dawh a chim thul, thihna hial a thleng fo, mawhphurtute hrem, chhiat tawkte chhawmdawl an ni ṭhin em? Kan hria Tui bill kan pe, tui kan hnianghnar si lo!

Aizawl municipal corpora­tion hnuai­ah property tax a pung tual tual a, khawpui chang­kang kan neih phah chuang si lo. Traffic jam avangin mipuite tha leh zung, hun leh petrol a va luangral nasa em!

Kan airport neihchhun, kan chhuan kan duat em em, sak mek pawh a awm mai mai lai lah chu a chim dur mai...

Dan dik lova hausate (smuggler/ eiru) an tei suau suau a, inhmun loram, sumdawnna, nihna etc. ah mipui­te nekchep kan ni a, mipuite chhandamtu a la piang si lo!

Mipui chanai eiru ṭhintute hrem an tlem hle a, thubuai neite lah in thiam an chang fo si ṭhin. Bei a dawng a ni, chhantu kan nei si lo!

Tu hnenah nge kan zualko ang le?

- Lalngaihawma Pachuau